Debleskri gili 21 - O Debleskro Lab 2024 (Sinte-Manouche)

O baro ray parkrell pes pash o baro Debleste

¹ I gili o rayeske pral i gipangre. O David kras kay gili.

² Baro Devel, har barhtelo hi o baro ray pral tiri zoor! Tou hal ap leskri rig. Doleske bashrell leskro dji.

³ Kova, hoy yob o djiyestar kamas, dal tou les, oun kova, hoy yob toutar mangas, rikral gar pale.

⁴ Tou čoral pral leste barht pral barht, čival shereskro sonakay ap leskro shero.

⁵ Djipen mangas lo toutar, oun tou dal les leste: o djipen, hoy gar pre-herella, dal tou les.

⁶ Tou hal ap leskri rig oun kral leskro raylepen bares. Shoukapen oun barepen čival tou ap leste.

⁷ Tiri barht hi ap leste hako tsiro. Tou hal pash leste. Doleske bashrell leskro dji.

⁸ O baro ray patsell ap o baro Debleste, ko Debleste pral halauter. Oun dran o Debleskro lačepen nay ačell o baro ray zoreles tardo.

⁹ Tiro vast hatsell hakenes, kay kamell touke čilačepen te krell. Tiro čačo vast hatsell kolen, kay pen ap toute rhoyrenna.

¹⁰ Tou rhačreh len har an i bobeskri yag, an ko tsiro, kay tou moukeh tout te dikell. Tiri rholi rhačrell har i yag, oun rhal len pre.

¹¹ Kek lengre čavendar ačenn djido, gar yek lendar ačell ap kay phoub.

¹² Yon van khetne oun rakran, har nay krenn le touke čilačepen. Či, hoy kamenn le touha te krell, djal lenge mishto.

¹³ Tou leh tiro bogo oun rikreh ap lende, oun kreh, te rissrenn le pen trouyel oun nashenn penge.

¹⁴ Baro Devel, hade tout an tiri zoor! Palle givah touke gilya oun sharah tiri zoor.