Debleskri gili 20 - O Debleskro Lab 2024 (Sinte-Manouche)I mangepen o baro rayeske 1 I gili o rayeske pral i gipangre. O David kras kay gili. 2 Mangau o baro Debles, o Yakobeskro Debles, te shounell lo tout ap o dives, kay i bibarht pral toute vell. Mou rikrell yob peskro vast pral toute! 3 Mou vell lo dran leskro kheer ap tiri rig! Oun dran o foro Sion bičrell lo touke zoor! 4 Mou bistrell lo kek lačo koova, hoy tou leske anal, oun dikell lačes ap kol firhen, hoy tou leske rhačral! 5 Mou dell lo tout lauter, hoy tiro dji kamella, oun krell, te djal touke lauter mishto, hoy tou touke glan lal! 6 Palle kamah mer te givell i barhtyatar. Oun sharah maro Debles oun hidjrah o themeskri plarhta, te sikras, kay yob tout zoreles kras pral kolende, kay kouran pen touha. O baro Devel mou dell tout lauter, hoy tou lestar mangeh! 7 Kanna djinau, kay vell o baro Devel ap i rig kolestar, koles yob vin rodas, te vell lo baro ray. Dran o bolepen, kay yob khere hi, shounell lo ap leste, oun peskri bari zoryah vell lo ap leskri rig. 8 Vavar menshe patsenna ap i zoor pengre grayendar oun vourdya. Mer dah gole ap maro baro Debleste. 9 Yon hi kolla, kay phagenn khetne oun perenn. Mer ačah tardo oun dah gar palla. 10 Baro Devel, ab o baro rayeske ap i rig! Mou shounell lo men ap o dives, kay dah ap leste gole! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.