Debleskri gili 19 - O Debleskro Lab 2024 (Sinte-Manouche)

Lauter, hoy o baro Devel kras oun penas, hi shoukar

¹ I gili o rayeske pral i gipangre. O David kras kay gili.

² O bolepen sikrella, har baro oun raylo o Devel hi, oun i bolepangre momlia sikrenna, hoy yob lauter kras.

³ Yek dives penell les o vavareske oun yek rat i vavarake.

⁴ Kek labentsa rakrenn le. Oun lengri gole vell gar shounlo.

⁵ Lengro rakepen djal an hako them, oun vell shounlo ap i tseli phoub. O Devel kras i kheer o khameske an o bolepen.

⁶ Taysarlake djal o kham vin har i biyabeskro dran peskri isema, oun har i zorelo naashepaskro hi lo barhtelo, te nashell peskro drom.

⁷ O kham djal pre ap koy yek rig o bolepastar, oun nashell peskro drom bis ap i vavar rig, oun glan leskro tatepen ačella či khatedo.

⁸ O baro Debleskre laba hi lauter čačo oun krenn mare djia zorelo. O baro Debleskro rakepen hi lačo, oun krell i dinelen gosevo.

⁹ Kova, hoy o baro Devel menge penell, te kras mer, hi čačo, oun krell maro dji barhtelo. Kova, hoy lo mendar kamell, nay hayvell hakeno. Kova hi har i momeli, hoy sikrell men o drom.

¹⁰ Te hadau o baro Debles pre, hi kova mishto. Hako tsiro vell lo hadedo. O čačepen, hoy o baro Devel vin rakrella, hi lauter lačo oun čačo.

¹¹ Leskro čačepen hi koučeder har o sonakay, har o rayleder sonakay, oun goudleder har o gvin, har o djoudjeder gvin.

¹² Miro ray, me moukau tire laba ap miro dji te rakrell. Koon rikrell pes ap lende, koleske djal mishto.

¹³ Kek mendar djinell haki doosh, hoy lo ap peste anas. Le koy doosh mandar krik, hoy anom ap mande oun djinau kova gar!

¹⁴ Mouk man gar khetne kolentsa te djal, kay hi pre-phourde, te tserdenn le man gar ap lengri rig. Yaake vell kek doosh ap mande, oun me krau kek baro čilačo koova.

¹⁵ Mouk o rakepen, hoy vell dran miro mouy, oun kova, hoy rakrau an miro dji, shoukar te vell touke! Baro Devel, tou rikreh man, oun hal kova, kay man vin las dran o čilačepen.