Debleskri gili 17 - O Debleskro Lab 2024 (Sinte-Manouche)Baro Devel, de man miro čačepen! 1 I mangepen o Davidestar. 1 I mangepen o Davidestar. Baro Devel, shoun, hoy toutar mangau: De man miro čačepen! De yak, har dau ap toute gole! Shoun miro mangepen, hoy vell dran i mouy, hoy gar rhorhella! 2 Rake tou mange lačes! Tou dikeh, ap havi rig o čačepen hi. 3 Tou djineh, hoy mange an o shero djal. Ninna an i rati dikal palla, har an miro dji vi-dikella, oun hatsal či an mande, hoy gar mishto hi. Ninna kek čilačo lab vas dran miro mouy vin. 4 Yaake har i menshe krenna, krau me les gar. Me rikrau man ap tire laba, oun djau gar ap čilače dromma. 5 Mire pire djan ap tiro drom oun peran gar tele. 6 Me dau ap toute gole, oun tou, mo Devel shouneh man. Risse tiro kand pash mande, oun shoun, hoy me ap toute rakrau! 7 Sike tiro lačepen, tou, kay leh kolen dran i čilače vasta vin, kay pen pash toute khatrenna, 8 Rike tiro vast pral mande, yaake har te voms tiri yak. Khate man yaake har i čirklo peskre čaven tel peskre moussya khatrell! 9 Tou dikeh kol čilačen, kay i zoryah ap mande pre djan, kolla, kay haki rigyatar ap mande venna, te denn le man. 10 Lengre djia pandenn le, te khaytell len kek, oun pengro mouyeha krenn le pen bares. 11 Kay mer ninna djah, yon hi troul mende oun lenn men an i yak, te stakrenn le men an i phoub. 12 Yon hi har i levo, hoy khatedes beshdo hi, oun ap yekeste lourella, hoy yob nay rhal. 13 Baro Devel, ste tou pre, čip tout lenge an o drom! Stake len khetne! Ab oun le tiro rharo, oun le miro djipen vin dran i vasta kol čilačendar. 14 Baro Devel, tiro vasteha le man vin dran o vast kol menshendar, kay djivenn i phoubyake. Lengro bravlepen lenn yon an kava djipen! Tou kreh lengro per pherdo ko koova, hoy tou lenge deh. Ninna lengre čave venn čalo, oun moukenn pral pengre čavenge. 15 Me krom, hoy čačo hi. Doleske nay dikau tout. Te djangrau pre, dikau me tout oun hom čalo i barhtyatar. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.