Debleskri gili 148 - O Debleskro Lab 2024 (Sinte-Manouche)O Debleskro raylepen an o bolepen oun ap i phoub 1 Halleluya! Sharenn o baro Debles, t'mer an o bolepen! Sharenn les, t'mer kay han dour pral an o bolepen! 2 T'mer tsele bolepangre, sharenn les! T'mer leskre kourepangre, sharenn les! 3 T'mer, kham oun čon, sharenn les! Ninna t'mer bolepangre momlia, sharenn les! 4 Tou, o pralstouno bolepen, share les! Tou, o pani, hoy pral o bolepen hi, share les! 5 T'mer lauter, sharenn o baro Debles! Yob rakras, oun yon van kerdo. 6 Yob čivas len ap pengro drom. Oun kote ačenn le hako tsireske. Yob penas lenge, har dour nay djan le, oun yon nay stakrenn gar vergel. 7 Sharenn o baro Debles, t'mer kay han tele ap i phoub: bare panyengre firhe oun lauter, hoy an i telstoune panya djivella; 8 yag, brishineskre barra, gib oun yagakro dourho, oun o zorelo phourdepen, hoy krell, hoy yob penell. 9 Sharenn les, t'mer bare oun tikne berge; t'mer rouka, ap kolende roukengre baro venna rhapaske, ninna t'mer soubyengre rouka, 10 t'mer divye firhe oun khereskre firhe, tikne firhe oun čirkle! 11 Sharenn les, t'mer bare raya ap kay phoub t'mare menshentsa, t'mer pralstoune oun čačepangre raya; 12 terne morsha oun terne ča, phoure oun terne! 13 Kolla lauter mou sharenn o baro Debleskro lab. Leskro lab hi bareder har i tsele vavar laba. Leskro raylepen djal pral i phoub oun o bolepen. 14 Yob das peskre menshende i zoor pral i vavar menshende. Sharenn les, t'mer, leskre menshe, t'mer dran o Israel, kay han pash leste. Sharedo vell o baro Devel! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.