Debleskri gili 147 - O Debleskro Lab 2024 (Sinte-Manouche)Hoy o Devel lauter peskre menshenge kras 1 Halleluya! Sharenn o baro Debles! Lačo hi, te givas gilya maro Debleske! Shoukar oun mishto hi, te bashras leske. 2 O baro Devel čivella Yerusalem pale pre, oun lauteren, kay krik tradedo van, anell yob pale khetne. 3 Kolen, kay lengro dji phagedo hi, krell lo pale sasto, oun kolenge, kay doukedo hi, čivell lo i pandepen pre. 4 Yob ginell i bolepangre momlia tele oun kharell lengre laba. 5 Baro hi o Devel, maro ray, oun les hi bari zoor. Kova lauter, hoy yob an peskro gosvepen krella, hayvah nay gar. 6 O baro Devel hadell kolen pre, kay tele rikedo hi, oun i čilačen vitsrell lo tele ap i phoub. 7 Givenn i gili o baro Debleske! Parkrenn t'men pash leste! Bashrenn maro Debleske ap i harfa! 8 Yob čivell volke ap o bolepen, dell brishin ap i phoub, moukell o zenlepen bares te vell ap i berge. 9 I firhende dell lo pengro rhapen, ninna i terne korake, hoy pal rhapen gole denna. 10 I grayengri zoor hi leske gar shoukar, vitar gar i morshengri zoor. 11 O baro Debleske hi kolla shoukar, kay leha djivenna oun ap leste dikenna, te vell lo lenge lačes. 12 T'mer menshe an o foro Yerusalem, sharenn o baro Debles! T'mer dran o foro Sion, hadenn t'maro Debles! 13 Kol bare foreskre voudya krell lo zoreles, oun ap t'mare čavende čivas lo peskri barht. 14 Kek kourepen vell an t'maro them, oun o lačeder djob dell lo t'men te rhal. 15 Yob penell, hoy te djal ap i phoub. Oun sik djal kova, hoy penas lo. 16 Yaake moukell lo gib te perell, parno har bakrengro bal, oun vitsrell djayedo pani har yagakri čik. 17 Bare brishineskre barra vitsrell lo ap i phoub; oun bičrell baro shilapen. Koon nay ačell an kava shilapen? 18 Yob penell i lab, oun o gib vell pani; yob bičrell i dourho, hoy phourdell pral i phoub, oun o pani, hoy djayedo his, nashella palle. 19 O Yakobeskre menshen moukell lo peskro lab te shounell; oun ap i Israelitarya penell lo, hoy lo lendar kamell, oun dell len peskre čačepaskre laba. 20 Kova kras lo kek vavar menshenge. Leskre čačepaskre laba prindjrenn yon gar. Sharedo vell o baro Devel! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.