Debleskri gili 146 - O Debleskro Lab 2024 (Sinte-Manouche)O Devel rikrell hako tsiro pash peskre menshende 1 Halleluya! Miro dji sharell o baro Debles. 2 Yaake rah har me djivau, kamau o baro Debles te sharell. Yaake rah har hom ap kay phoub, kamau leske te bashrell. 3 Rikrenn t'men gar ap t'mare pralstunende! Menshe hi le oun nay lenn t'men gar vin dran i bibarht. 4 O menshengro djipen ačell gar. Oun yob vell pale čik i phoubyatar. Ko dives, kay merell lo, djala lauter nashedo, hoy yob peske glan las. 5 Barhtelo hi kova, koleske o Yakobeskro Devel ap i rig vell, ava, kova hi barhtelo, kay kokres ap peskro baro Debleste dikell. 6 Yob hi o Devel, kay o bolepen oun i phoub kras, oun o baro pani, oun kova, hoy dren hi. Yob hi kova, kay hako tsiro peskro lab rikrell, 7 oun kolen pengro čačepen dell, kay tele rikedo venn. Kolen, kay bokenn, dell lo te rhal. O baro Devel hi kova, kay i stilde vin lell dran o stilepen. 8 O baro Devel krell, te nay dikenn i korele pale. O baro Devel hadell kolen pale pre, kay tele dino hi. O baro Devel kamell kolen o djiyestar, kay an o čačepen tardo hi. 9 O baro Devel dell ap i vi-themarya yak, oun hi ap i rig kol čavendar, kolen kek dad bouder hi, oun ap i rig kol djouvyendar, kolengro rom meras. I čilačenge čivell lo barra an lengro drom. 10 O baro Devel hi o baro ray hako tsireske. Yob hi tiro Devel, Sion, kanna oun hako tsiro. Sharedo vell o baro Devel! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.