Debleskri gili 145 - O Debleskro Lab 2024 (Sinte-Manouche)O Devel ačell hako tsiro o baro ray 1 Kay gili kras o David te sharell lo o Debles. 1 Kay gili kras o David te sharell lo o Debles. Me kamau tout te hadell, miro Debles. Tou hal o baro ray. Tout kamau me te sharell kanna oun hako tsiro. 2 Hako dives kamau man pash toute te parkrell. Kanna oun hako tsiro kamau tout te sharell. 3 Zorelo hi o baro Devel oun boud moldo, te vell lo sharedo. Kek hayvell, har baro yob hi. 4 Ninna mare čavengre čave sharenn, hoy tou kral, oun rakrenn pral tiro zorelo koova. 5 Yon rakrenn pral tiro raylepen oun barepen. Oun me moukau mange an o shero te vell, hoy tou kral oun hoy kek vavar nay krella. 6 Yon rakrenn pral tiri zoor, hoy yaake baro hi, te vell men daar. Oun me rakrau pral tiro raylepen. 7 Yon sharenn tiro baro lačepen, oun givenn pral tiro čačepen. 8 Lačes hi o baro Devel oun krell i menshenge peskro dji pre. Yob vell gar sik rhoyedo. Oun leskro kamlepen hi baro. 9 O baro Devel hi lačes ap hakeneste. Oun krell peskro dji pre halauterenge, kolen yob kras. 10 Kolla lauter, kay tou kral, mou sharenn le tout, baro Devel, mou parkrenn pen pash toute kolla, kay tire hi, 11 oun sharenn, havo raylo oun lačo baro ray tou hal. Mou penenn le, har baro tiri zoor hi, 12 te shounenn i tsele menshe, havo baro koova tou kral, oun havo raylo oun lačo ray tou hal pral mende. 13 Tou hal oun ačeh o baro ray kanna oun hako tsireske. O baro Devel rikrell peskre tsele laba, oun hi lačo an halauter, hoy krell lo. 14 O baro Devel rikrell hakenes, kay perell, oun hadell hakenes pale pre, kay tele dino hi. 15 Menshe oun firhe denn yak ap toute, te dess len pengro rhapen ap o čačo tsiro. 16 Tou kreh tiro lačo vast pre, oun deh lauteren, hoy djivenna, yaake boud te rhal, te venn le čalo. 17 An lauter, hoy o baro Devel krell, djal lo pal o čačepen. An lauter, hoy krell lo, hi lo lačo. 18 O baro Devel hi gar dour hakenestar, kay dell les an-gole, hakeneske, kay dell les an-gole an o čačepen. 19 Kolenge, kay o djiyestar ap leste shounenna, krell lo, hoy yon mangenna, oun shounell, har denn le gole, oun vell ap lengri rig. 20 Kolla, kay les o djiyestar kamenna, pral kolende rikrell lo peskre vasta. Kolla, kay čilačo koova krenna, moukell lo te merell. 21 Miro mouy te sharell o baro Debles! Lauter, hoy djivella, mou sharell koles, kay kokres o čačo Devel hi, – kanna oun hako tsiro! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.