Debleskri gili 144 - O Debleskro Lab 2024 (Sinte-Manouche)Hoy o baro ray David o Deblestar mangella 1 I gili o Davidestar. 1 I gili o Davidestar. Sharedo vell o baro Devel, kay rikrell peskre vasta pral mande. Yob sikrell mange, har te kourap man. Mire vastenge sikrell lo har te dap i rhareha. 2 Yob vell ap miri rig, oun hi mange har i zorelo kheer, kay nay khatrau man, oun kek man an-taprell. Yob rikrell peskre vasta pral mande, Ap leste rikrau man. Yob stakrell i menshen dran vavar themma tel mire herya. 3 Baro Devel, hoy hi o mensho, tou te deh yak ap leste? Hoy hi o mensho, kay hounte merell, tou te dikeh ap leste? 4 Har i dourho hi lo. Leskro djipen djal trouyel har i souni. 5 Baro Devel, čip o bolepen ap i rig oun ab tele! Tape i berge an, te vell yagakro dourho vin! 6 Biče tiri yag, hoy ap o bolepen pral oun tele djal! De tire fayle karye ap kolende, kay ap mande djan! 7 Rike mange tiro vast dran o bolepen! Tape man, oun le man vin dran kava baro pani, dran i vasta kol vavar menshendar! 8 Kolengro mouy rhorhepen rakrella, ninna te denn le pen sovel. 9 Miro Devel, me kamau touke i nevi gili te givell. Ap i deesh-doryengri bashepaskri kamau touke te bashrell. 10 Tou kreh, te vell yek themeskro ray zorleder har ko vavar. Oun tou kreh, te vell tiro boudepaskro, o David, gar maredo o rhareha. 11 Tape man, oun le man vin dran i vasta kol vavar menshendar! Kolengro mouy rhorhepen rakrella, ninna te denn le pen sovel. 12 Mouk mare morsh čaven har rouka te vell, hoy baro venna an pengri terni zoor. Oun mare čen mouk shoukar te vell, har kol shoukar figure an o rayeskro kheer. 13 Mouk mare djobengre khera pherdo te vell, te vell men boud lačo rhapen te rhal. Mouk mare bakren zerya terne te lell, ava, deesh-zerya an mare gaba. 14 Mare groumya te nashrenn kek pengre ternendar, hoy gar boldo hi. Kek ropaskri gole te vell shounlo ap mare dromma! 15 Barhteles hi kol menshe, kolenge yaake djala! Ava, barhteles hi kol menshe, kolengro Devel o baro Devel hi! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.