Debleskri gili 143 - O Debleskro Lab 2024 (Sinte-Manouche)Baro Devel, de man kek phagi! 1 I gili o Davidestar. 1 I gili o Davidestar. Baro Devel, shoun miro mangepen! De yak ap miro ropen! Tou hal lačo oun čačo! Doleske shoun man! 2 De man, tiro boudepaskres, kek phagi; glan toute hi kek mensho an o čačepen tardo. 3 Kova, kay mange čilačepen kamell, lell man palla, stakrell miro djipen an i phoub. Me hom har an i stilepen, kay kali rat hi, hom har kolla, kay meran glan i rah tsiro. 4 Bari daar hi an miro dji. Miri tseli zoor, hoy an mande his, nashrom. 5 Mange djal kova an o shero, hoy tou lauter kral glan i rah tsiro. Pral kova, hoy tire vasta kran, rakrau miro djiyeha. 6 Mire vasta hadau pre pash toute. Har i trouk them troushella pal pani, yaake troushell miro dji pal toute. 7 Baro Devel, shoun man sik! Man hi bouder kek zoor. Ma khate tout mandar, te vap gar har kolla, kay hounte merenn. 8 Ap i tsalla mouk man tiro lačepen te shounell. Me dikau ap toute. Sike man havo drom me hounte djap. Miro dji nashell pal toute. 9 Baro Devel, le miro djipen vin dran i vasta kolendar, kay ap mande djan. Pash toute vau, te khatrap man. 10 Sike mange, hoy touke shoukar hi, te krap me, tou hal miro Devel. Tiro lačo dourho mou sikrell man o čačo drom. 11 Baro Devel, rike tire vasta pral miro djipen yaake har penal. Tou hal an o čačepen tardo. Doleske le man vin dran i bibarht! 12 Tou hal yaake lačo ap mande. Doleske le kolen krik, kay ap mande djan, oun mare lauteren, kay mange miro djipen phares krenn. Me hom tiro boudepaskro! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.