Debleskri gili 140 - O Debleskro Lab 2024 (Sinte-Manouche)Le man vin dran i vasta i čilačendar! 1 I gili o rayeske pral i gipangre. Kay gili kras o David. 2 Baro Devel, le man vin dran i vasta kol čilačendar! Khate man glan i marepangre! 3 Kolen hi čilačepen an o dji, oun krenn čingepen hako dives. 4 Lengre čipya denn čourye har sapengre čipya, lengre laba anenn o merepen. 5 Baro Devel, de ap mande yak, te taprenn man i čilače gar! Khate man glan i marepangre, glan kolende, kay kamenn te perap! 6 Kol pre-phourde čivan mange dorya vin, te stakrap dren oun perap. Yon čivan i netsa vin ap miro drom, te taprenn le man. 7 Me penom ap o baro Debleste: Tou hal miro Devel. Baro Devel, shoun, har ap toute rovau! 8 Baro Devel, miro ray, tou hal o zorelo ap miri rig. Tou rikreh tire vasta pral mande an o kourepaskro tsiro. 9 De kol čilačen gar, hoy yon kamenna! Kova, hoy yon pen glan lan, mouk gar te djal, te hadenn le pen gar! 10 Kolla, kay troul mande hi, kamenn mange bibarht. Mouk koy bibarht ap lende pale te djal! 11 Mouk yagakre barra ap lende te perell! Vitse len an i yag! Mouk len te perell an o telstunepen, yaake te nay stenn le bouder gar pre! 12 Koles i čilači čip hi, koles te vell kek barht an kava them! Oun i marepangre, te venn le tradedo i bibarhtyatar oun hounte perenn! 13 Me djinau, te lell o baro Devel i čorvelengro koova an peskro vast, oun dell yak, te lenn le pengro čačepen. 14 Ava, i tsiro vella kolenge, kay an o čačepen tardo hi, te sharenn le tout. Oun kolla, kay o čačo drom djan, djivenna pash toute. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.