Debleskri gili 139 - O Debleskro Lab 2024 (Sinte-Manouche)O Devel prindjrell man mishto 1 I gili o rayeske pral i gipangre. Kay gili kras o David. 1 I gili o rayeske pral i gipangre. Kay gili kras o David. Baro Devel, tou dikeh an miro dji oun prindjreh man mishto. 2 Tou prindjreh miro beshepen oun miro tardepen. Tou hayveh foun doural, hoy an miro shero trouyel djal. 3 Te djau vin, oun te hom čiddo, tou hal pash mande. Mire tsele dromma, tou prindjreh len. 4 O lab hi gomme gar ap miri čip, koy djineh tou, baro Devel, hoy kamau te rakrap. 5 Haki rigyatar lal tou man trouyel, oun rikreh tiro vast pral mande. 6 Tou prindjreh man yaake mishto, kova hi mange bares oun phares. Me nay hayvau kova gar. 7 Kay djau me nay, te vap dour toutar? Kay nashap, kay tou man gar dikeh? 8 Te djoms an o bolepen pre, palle hal tou koy. Te čivoms man pash i moulende, ninna kote vals tou koy. 9 Te hadoms man har i čirklo oun djoms kote, kay o kham pre-djala, oun moukoms man tele pal o baro pani, kay o kham tele djal, 10 ninna kote taprals man tiro vast oun rikrals man. 11 Oun penaus me: “Kali rat te khatrell man, oun tamlepen te vell troul mande”, 12 palle vals touke i rat gar kali, ava, i rat vals har o dives, oun o tamlepen har i momeli. 13 Tou kral lauter, hoy an mande hi. An miri date čival man khetne. 14 Me parkrau man pash toute, te kral man yaake shoukar. Ap mande dikau, lauter hoy kreh, hi yaake mishto, te ačell mange o rakepen krik. 15 Me homs gar khatedo glan toute, har kral man kote, kay kek dikell, har vom i ternepen an miri dakro per. 16 Tou dikal man, har gar kerdo homs, oun hako dives miro djipastar his činlo an tiro liil, har gomme kek lendar koy his. 17 Phares te hayvell hi mange kova, hoy tou an tiro shero rakreh, mo Devel. Har boud hi kova! 18 Te kamoms les tele te ginell, vals kova boudeder har i santa pash o baro pani. Te stau pre o vavar dives, hom gomme pash toute. 19 Mo Devel, kamoms te dess tou i čilačen moulo! Kamoms, te djan penge kolla, kolen doosh ap o rat i vavarendar hi! 20 Yon, kay praasenn tout oun hadenn pen ap toute, lenn tiro lab an o mouy te rhorhenn le. 21 Baro Devel, hounte rhoyrap man gar ap kolende, hoy pen ap toute rhoyrenn? Mange vell djoungeles, te dikau kolen, kay hadenn pen ap toute. 22 Kolla, kay kamenn tout gar, kamau me vitar gar. Ava, nay dikau len gar glan mire yaka. 23 Dik an miro dji, miro Devel, oun dik, hoy lauter koy dren hi! Oun le man an o yak, oun dik, hoy mange an o shero trouyel djala! 24 Oun te dikeh, te hom ap i drom, hoy toutar krik djala, palle ab oun le man pale ap ko drom, hoy pash toute djala! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.