Debleskri gili 138 - O Debleskro Lab 2024 (Sinte-Manouche)O Debleskre dromma hi raylo 1 I gili o Davidestar. 1 I gili o Davidestar. Parkrau man pash toute miro tselo djiyeha. Touke givau miri gili, oun kek vavar debleske. 2 Glan tiro Debleskro kheer perau tele, oun parkrau man pash toute, te kral tiro dji mange pre oun rikral tiro lab. Ava, tou dal men boudeder har menge penal. Tiro lab hi rayleder har i tsele vavar. 3 Ap ko dives, hoy me ap toute gole dom, shounal tou man, oun dal man pale bari zoor. 4 Baro Devel, i tsele raya ap kay phoub sharenn tout, te shounenn le tire laba, hoy dran tiro mouy djana. 5 Yon givenna pral kova, hoy tou kral: Tiro raylepen hi baro. 6 Ava, ninna te hal yaake dour pral halauter, dikeh tou kolen, kay tele rikede hi. Oun kol pre-phourden prindjreh foun doural. 7 Ninna te hom an i daar, deh tou man nevi zoor, oun čiveh tout kolenge an o drom, kay kamenn mange čilačepen te krell. Tiri zoryah veh tou ap miri rig. 8 Baro Devel, tou leh miro koova an tiro vast. Baro Devel, tiro lačepen ačella hako tsireske. Ma mouk kova, hoy lal an tiro vast! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.