Debleskri gili 135 - O Debleskro Lab 2024 (Sinte-Manouche)Mangenn o djido Debles an! 1 Halleluya! Sharenn o baro Debles! Sharenn les, t'mer boudepangre o baro Deblestar, 2 t'mer, kay tardo han an o baro Debleskro kheer, ap koy platsa glan o kheer maro Deblestar. 3 Sharenn o baro Debles! Lačo hi o baro Devel. Hadenn les t'maro bashepah. Kamlo hi lo menge. 4 O baro Devel rodas peske o Yakobeskre menshen vin, ava, o Israel las lo, te vell lo leskro. 5 Kanna djinau: O baro Devel hi o pralstouno. Maro baro Devel hi bareder har hako vavar devel. 6 Lauter, hoy yob kamell te krell, krell lo an o bolepen oun ap i phoub, an o baro pani, oun an o telstunepen. 7 Yob moukell volke pral i phoub pre te djal, dell brishin ap i phoub, ninna koy yag, hoy ap o bolepen pre oun tele karye dell. Yob anell o baro dourho vin, hoy pral i phoub phourdell. 8 Yob hi kova, kay das i phoureder morsh čaven moulo an o them Egiptia pash i menshende, ninna pash i firhende, 9 oun sikras baro koova oun peskri bari zoor ap toute, Egiptia, oun ap tiro baro ray oun leskre tsele boudepangre. 10 O baro Devel hi kova, kay vas zorleder har boud themma, oun zorele bare rayen moulo das: 11 O Sihon, ko baro ray pral i Amorarya, oun o Og, ko baro ray pral Bashan, oun i tsele bare raya an o them Kanaan. 12 Lengre themma das lo peskre menshende Israel, te venn le lengre. 13 Baro Devel, tiro lab ačella hako tsirenge. Tiro barepen ačella yaake rah, har menshe koy hi. 14 O baro Devel anell peskre menshenge o čačepen, oun krell peskro dji pre peskre boudepangre. 15 I debla i vavar menshendar hi dran roup oun sonakay, Menshenge vasta kran len. 16 I mouy hi len, oun rakrenn gar. Yaka hi len, oun dikenn gar. 17 Kanda hi len oun shounenn gar. Len hi kek dourho an lengro mouy. 18 Kolla, kay save deblen krenna, oun ap lende patsenna, venn yaake har yon. 19 T'mer dran o kheer Israel, sharenn o baro Debles! T'mer rashaya dran o kheer Aron, sharenn o baro Debles! 20 T'mer dran o kheer Levi, sharenn o baro Debles! T'mer lauter, kay djivenn o baro Debleha, sharenn les! 21 Sharedo vell o baro Devel ap i berga Sion! An o foro Yerusalem hi lo khere. Halleluya! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.