Debleskri gili 119 - O Debleskro Lab 2024 (Sinte-Manouche)

O raylepen an o Debleskre laba

¹ Har barhtelo hi kolla, kay yaake djivenna, te hounte čingrell o Devel gar lentsa, kolla, kay ap o baro Debleskro drom djana.

² Har barhtelo hi kolla, kay yaake djivenn, har yob lenge sikras, oun pengro tselo djiyestar ap leste shounenn.

³ Kolla krenn kek čilačepen oun djan ap o Debleskre dromma.

⁴ Tou, baro Devel, penal menge, hoy te kras mer, te rikras mer kova hako tsiro.

⁵ An miro tselo djipen kamoms te krap, hoy mandar kameh.

⁶ Te dau yak ap tire laba, krau či te hounte ladjap man.

⁷ Me parkrau man pash toute o tselo djiyestar, te sikreh tou mange tire čačepaskre laba.

⁸ Me kamau te krap, hoy mandar kameh. Ma mouk man kokres!

⁹ Har nay djal i terno morsh peskro drom yaake, te ačell peskro djipen djoudjo? Kova nay krell lo, te rikrell lo pes ap tiro lab.

¹⁰ Miro tselo djiyeha rodau tout. Ma mouk man te moukap tire laba.

¹¹ Me rikrau tiro lab an miro dji, te anap kek doosh ap mande.

¹² Sharedo vess tou, mo baro Devel! Tou sikral mange, hoy mandar kameh.

¹³ Me penau i vavarenge, har tou o čačepen vi-rakral.

¹⁴ Me hom yaake barhtelo pral tiro drom, kay tou mange sikral, har te djivap. Kova hi mange shoukeder har i baro bravlepen.

¹⁵ Me rakrau kolestar, hoy tou menge penal, te kras kova, oun dau yak, te ačap ap tiro drom.

¹⁶ Mange hi shoukar, te krap, hoy tou mandar kameh, oun bistrau tire laba gar.

¹⁷ Ab lačes ap mande, tiro boudepaskro, te djivap oun rikrap tiro lab.

¹⁸ Kre mange i yaka pre, te nay dikap har shoukar hi te djap tiro drom.

¹⁹ Me hom gar khere ap kay phoub. Mouk man te hayvap tire laba!

²⁰ Miro dji rhačrell, te dikap har tou rakreh o čačepen vin.

²¹ Tou čingreh pral kolende, kay phourdenn pen pre. Praasedo hi kolla, kay moukan tire laba.

²² Mouk kek ladj ap mande te vell! Mouk len gar pral mande te sal! Me djau miro drom yaake har tou mange sikral.

²³ I raya hi khetne beshdo, oun rakrenna, har te krenn le mange čilačepen. Me hom tiro boudepaskro oun bistrau gar, hoy tou mandar kameh.

²⁴ Tire laba, hoy sikrenn mange, har te djivap, krenn man barhtelo. Yon hi mange har i lačo maal, ap koleste me shounau.

²⁵ An i čik hom vitsedo. De man pale nevi zoor yaake har tou mange penal!

²⁶ Me penom touke lauter dran miro djipen, oun tou shounal man. Sike mande, hoy mandar kameh!

²⁷ Mouk man te hayvap, hoy tire laba mange kamenn te penell. Yaake te rakrap pral ko baro zorelo koova, hoy tou kral.

²⁸ Miro dji rovell yaake te hi man bouder kek zoor. De man pale nevi zoor, yaake har penal.

²⁹ Rike man pale i rhorheno dromestar! An tiro lačepen sike man, har te djap ap tiro drom.

³⁰ Me kamau tiro drom an o čačepen te djal, oun yaake djivell har tire čačepaskre laba menge penenn.

³¹ Me rikrau man zoreles ap tire laba, hoy mange sikrenn, har te djivap. Baro Devel, ma mouk i vavaren pral mande te sal!

³² Miro dji hi dour pre, te krap lauter yaake har tou mandar kameh.

³³ Sike tou man, baro Devel, har te krap kova lauter yaake, har tou mandar kameh, te djivap miro tselo djipen yaake, har tou kameh.

³⁴ Mouk man lauter hayvell, te dap yak ap tiro drom, oun shounap ap toute o tselo djiyestar.

³⁵ Ab mange ap i rig, te rikrap tire laba! Shoukar hi le mange.

³⁶ Kre te dikap ap tire laba, hoy mange sikrenn, har te djivap, oun dikap gar ap o bravlepen!

³⁷ Kre, te dikap gar ap kova, hoy či moldo hi, oun de man pale nevi zoor ap tiro drom!

³⁸ Me hom tiro boudepaskro. Rike mange tiro lab, ko lab, hoy tou lauterenge dal, kay moukenn tout pengro ray te vell.

³⁹ Le mandar koy ladj krik, kolatar darau. Yaake har tou o čačepen an o vast leh, hi mishto.

⁴⁰ Pen mange, hoy te krap touke! Tou hal an o čačepen tardo. De man pale nevi zoor an miro djipen!

⁴¹ Baro Devel, ab mange lačes, oun ab mange ap i rig yaake har tou penal,

⁴² te vell man i lab, hoy penau koleske, kay praasell man. Me lau tout pash tiro lab.

⁴³ Kre te penap hako tsiro o čačepen! Me dikau ap toute, har tou o čačepen an o vast leh.

⁴⁴ Me kamau tiro drom te djal kanna oun hako tsiro.

⁴⁵ Hoy tou mange penal, krau me. Doleske djau barhteles miro drom.

⁴⁶ Glan i bare rayende rakrau kolestar, hoy tou menge penal, hoy te kras mer, oun ladjau man gar.

⁴⁷ Kamau tire laba o djiyestar, oun hom barhtelo te rikrap man ap lende.

⁴⁸ Me hadau tire laba pre, oun kamau len o djiyestar, oun moukau len an miro shero trouyel te djal.

⁴⁹ Ma biste tiro lab, hoy dal tou man, tiro boudepaskres! Dikau ap tiro lab, te vell yaake har tou les penal.

⁵⁰ Har mange o djipen phares his, dal tou man nevi zoor. Tiro lab moukas man pre djivell.

⁵¹ Ninna te sanenn pre-phourde menshe pral mande, moukom gar tiro drom.

⁵² Baro Devel, te vell mange an o shero, har lal tou an o phouro tsiro o čačepen an o vast, palle krell kova miro dji pale zorelo.

⁵³ I rholi taprell man, te dikau, har i čilače moukan tiro drom.

⁵⁴ Kate ap kay phoub, kay me gar khere hom, givau gilya pral tire laba.

⁵⁵ Rati veh tou mange an o shero, baro Devel, te djap ap tiro drom.

⁵⁶ Mange hi shoukar te krap kova, hoy tou menge penal.

⁵⁷ Me penom mange: O baro Devel hi o pralstouno an miro djipen. Pal leskre laba kamau te djivell.

⁵⁸ Miro tselo djiyeha rodau me tiro kamlepen. Ab mange lačes yaake har tou les penal.

⁵⁹ Me dau yak, har me miro djipen djivap, oun djau tiro drom yaake har tou les menge sikral.

⁶⁰ Me tradom man, oun krau sik, hoy tou mandar kameh.

⁶¹ I čilače čivan dorya vin troul mande, te perap dren. Me bistrau tiro drom gar.

⁶² Mashkral an i rat stau me pre, te sharap tout, kay lal tou o čačepen an o vast.

⁶³ Me rikrau man pash kolende, kay djivenn touha oun krenn, hoy tou peneh.

⁶⁴ Baro Devel, lačo hal i menshenge ap i tseli phoub. Sike mande, hoy tou mandar kameh!

⁶⁵ Tou hals lačes ap mande, tiro boudepaskro, yaake har tou kova penal.

⁶⁶ Sike mande te hayvap oun djinap, hoy te krap! Tire laba hi mishto. Kova patsau.

⁶⁷ Har djom tiro dromestar tele, dal tou man i phagi. Kanna rikrau tiro lab.

⁶⁸ Tou hal lačo oun kamlo. Sike mande, hoy tou mandar kameh!

⁶⁹ Kol pre-phourde anan rhorhepen pre ap mande. Miro tselo djiyestar krau me kova, hoy tou menge penal.

⁷⁰ Kolla menshe pandan pengre djia, te hayvenn le gar tiro lab. Me hom barhtelo, te djap tiro drom.

⁷¹ His mishto mange, te dal man i phagi, te shounap ap toute oun krau hoy tou mandar kameh.

⁷² Tiro drom kamau me boudeder har boud zerya kotya sonakay oun roup.

⁷³ Tire vasta kran man oun rikran man. Kre, te hayvap tire laba!

⁷⁴ Kolla, kay djivenn touha, venn barhtelo, te dikenn le, har patsau ap tiro lab.

⁷⁵ Baro Devel, me djinau, tou te deh i phagi, djah tou pal o čačepen. Touke his čačo har dal man i phagi.

⁷⁶ Kre miro dji pale zorelo dran tiro lačepen, yaake har tou penal ap mande, tiro boudepaskro.

⁷⁷ Kre tiro dji mange pre, te djivap! Me hom barhtelo, te djap tiro drom.

⁷⁸ Kre, te hounte ladjenn pen kol pre-phourde, kay rhorhepen ap mande pre anan. Miro djiyeha rakrau pral kova, hoy tou menge penal, te kras mer.

⁷⁹ Ah, te rikrens kolla pash mande, kay djivenn touha oun prindjrenn tire laba, hoy menge sikrenn, har te djivas.

⁸⁰ Mouk miro dji ap tiro drom te ačell, te krap, hoy mandar kameh, yaake te hounte ladjap man gar.

⁸¹ Miro dji nashell pal toute: Ab ap miri rig! Me dikau ap toute, te rakress mantsa.

⁸² Me dikau mange i yaka vin pal kova, hoy tou mange penal. Kaana veh tou, oun khosseh mange i sva tele?

⁸³ Me perom an mande khetne har i molyakro gono, hoy pash i yag čiddo hi. Ninna te hi man bouder kek zoor, bistrau me gar, hoy tou mandar kameh.

⁸⁴ Har rah, baro Devel, rikreh tout pale, bis te deh kolen i phagi, kay man, tiro boudepaskres, palla lenn.

⁸⁵ Kol pre-phourde kran rhebya, te perap dren, kolla, kay djan gar ap tiro drom.

⁸⁶ Tire tsele laba hi o čačepen. Kol pre-phourde lenn man palla oun anenn rhorhepen ap mande pre. Ab ap miri rig!

⁸⁷ His bouder gar boud, palle marans le man an kava them. Me moukom gar tire laba, hoy menge penenn, hoy te kras mer.

⁸⁸ Tou hal yaake lačo, de man pale nevi zoor, te rikrap tire laba, hoy sikrenn menge har te djivas.

⁸⁹ Baro Devel, tiro lab ačella hako tsireske, oun hi zoreles tardo an o bolepen.

⁹⁰ Tiro čačepen ačell yaake rah har menshe koy hi. Tou kral i phoub oun yoy ačella tardo.

⁹¹ Yaake har tou kamal, hi li gomme kava dives tardo. Lauter ap i phoub hounte krell, hoy tou kameh.

⁹² Te voms gar barhtelo te djap tiro drom, palle meroms, yaake phares his miro djipen.

⁹³ An kek tsiro kamau te bistrap hoy tou menge penal, te kras mer. Dran tire laba rikreh tou man djido.

⁹⁴ Me hom tiro oun kamau te krap, hoy mange peneh. Doleske ab ap miri rig!

⁹⁵ I čilače lenn man an i yak, te denn le man moulo. Me dau yak ap tire laba, hoy menge sikrenn, har te djivas mer.

⁹⁶ Me dikom te ačell či, vitar gar kova, hoy mishto hi. Tiro lab kokres ačella tardo.

⁹⁷ O djiyestar kamau tiro drom te djal. O tselo dives hi tire laba an miro shero.

⁹⁸ Tire laba hi hako tsiro miro bravlepen, oun krenn man gosveder har kolen, kay mange čilačepen kamenn.

⁹⁹ Me rakrau miro djiyeha pral tire laba, hoy menge sikrenn, har te djivas. Doleske hayvau boudeder har mire sikepangre.

¹⁰⁰ Me krau, hoy tou menge penal. Doleske hayvau boudeder har i phoure.

¹⁰¹ Hako čilačo dromestar rikrom mire herya pale, te rikrap tiro lab.

¹⁰² Me krau pal tire čačepaskre laba. Tou hals miro sikepaskro.

¹⁰³ Tiro lab hi har i goudlo rhapen mange, ava, goudleder har gvin hi lo.

¹⁰⁴ Tiro lab krell man gosevo. Doleske nay dikau gar rhorhene dromma glan i yaka.

¹⁰⁵ Tiro lab hi har i momeli, hoy sikrell, kay te djap, ava, i momeli ap miro drom.

¹⁰⁶ Me dom man sovel, oun me kamau lat te rikrell: Kamau te djap pal tire čačepaskre laba.

¹⁰⁷ Miro dji hi phares doukedo, baro Devel. De man pale nevi zoor yaake har tou mange penal!

¹⁰⁸ Baro Devel, dik lačes ap mire laba, kolentsa parkrau man pash toute. Sike mande tire čačepaskre laba.

¹⁰⁹ Miro djipen hi hako tsiro gar dour o merepastar. Tiro drom bistrau me gar.

¹¹⁰ I čilače čivan dorya vin, te taprenn le man. Me moukau gar tire laba, hoy menge penenn, hoy te kras mer.

¹¹¹ Tire laba, hoy menge sikrenn, har te djivas, hi mange kouč oun ačenna mange hako tsiro. Ava, yon hi kolla, hoy miro dji barhteles krenn.

¹¹² Me krau miro dji pre, te krap, hoy tou mandar kameh kanna oun hako tsiro.

¹¹³ Me rhoyrau man ap kolende, kolen douy djia hi, tiro drom kamau me o djiyestar.

¹¹⁴ Tou hal kova, pash koleste man khatrau, oun koon peskre vasta pral mande rikrella. Doleske dikau ap tiro lab, hoy tou man dal.

¹¹⁵ Djan pale mandar, t'mer, hoy krenn o čilačepen! Me rikrau ap i laba miro Deblestar.

¹¹⁶ Rike man ap o djipen yaake har dal man tiro lab. Ma mouk man čičeske ap toute te dikell.

¹¹⁷ Hade man pre, te nay taprell man kek, oun me kamau hako tsiro te krell, hoy mandar kameh.

¹¹⁸ Kolen, kay gar krenna, hoy lendar kameh, tradeh tou toutar. Lengro rhorhepen hi čičeske.

¹¹⁹ I čilačen khosseh tou krik kay phoubyatar har čik. Doleske kamau me tire laba, hoy menge sikrenn, har te djivas.

¹²⁰ Toutar darau yaake, te trissau. Tou deh i phagi kolen, kay shounan gar ap toute.

¹²¹ Me krau o čačepen, oun djau o čačo drom. De man gar an o vast kolendar, kay kamenn ap mande pre te djan.

¹²² Me hom tiro boudepaskro. Rake mange mishto, te nay djan gar i pre-phourde i zoryah ap mande pre.

¹²³ Mire yaka nashenn pal toute: Le man vin dran o čilačepen, yaake har tou penal an tiro čačepen.

¹²⁴ Ab lačes mange, kay tiro boudepaskro hom, oun sike mange, hoy tou mandar kameh.

¹²⁵ Tiro boudepaskro hom me. Mouk man tire laba te hayvell, hoy menge sikrenn, har te djivas.

¹²⁶ Kanna hi o tsiro, kay o baro Devel hounte krell čomone. Yon peran tiro dromestar tele.

¹²⁷ Me kamau tire laba boudeder har o sonakay, ava, boudeder har o lačeder sonakay.

¹²⁸ Tire tsele laba, hoy menge penal, hi mange mishto. Kamau či te djinell i rhorheno dromestar.

¹²⁹ Tire laba, hoy sikrenn menge, har te djivas, kolla sikrenn tiri bari zoor. Doleske rikrau len o djiyestar.

¹³⁰ Te hayvah tiro lab, palle krell men kova barhtelo, oun ninna kolla, kay či djinenn, venn gosevo.

¹³¹ Me krau miro mouy dour pre, oun piyau tiro lab, yaake boud troush hi man pal tire laba.

¹³² Risse tout pash mande, oun ab mange lačes, yaake har kolenge hal, kay kamenn tout o djiyestar.

¹³³ Mouk te ačap zoreles ap tiro drom, yaake har tou penal, te vell o čilačepen kek ray pral mande!

¹³⁴ Le man vin dran i vasta kolendar, kay man tikno rikrenn, oun me kamau kova te krell, hoy tou menge penal.

¹³⁵ Dik lačes ap mande, tiro boudepaskro, oun sike mange, hoy tou mandar kameh!

¹³⁶ Rovau boud sva pral kolende, kay moukenn tiro drom.

¹³⁷ Baro Devel, tou hal an o čačepen tardo, oun tire čačepaskre laba hi mishto.

¹³⁸ Tire laba, hoy sikrenn menge, har te djivas, kolla lauter hi čačo oun mishto.

¹³⁹ I rholi tapras man oun kamas man pre te rhačrell, har dikom, kay bistran kolla tire laba, kay mange o djipen phares krenna.

¹⁴⁰ Tire laba hi lačo oun čačo, oun me, tiro boudepaskro, kamau len miro tselo djiyeha.

¹⁴¹ Ninna te hom gar an-diklo, oun i menshe dikenn tele ap mande, bistrau me či, hoy menge penal, te kras mer.

¹⁴² Tiro čačepen ačella hako tsiro, oun tiro drom hi čačo.

¹⁴³ Ninna te hi miro djipen pharo oun i daar tapras man, hom barhtelo pral tire laba.

¹⁴⁴ Tire laba, hoy menge sikrenn, har te djivas, ačenna hako tsiro čačo. Sike mande, har te hayvap len! Palle djivau.

¹⁴⁵ O tselo djiyeha dom me gole. Shoun man, mo baro Devel! Me kamau lauter te krell, hoy tou mandar kameh.

¹⁴⁶ Ap toute dom me gole. Ab ap miri rig! Me kamau man te rikrap ap tire laba, hoy mende sikrenn, har te djivas.

¹⁴⁷ Sik taysarlakro dau me gole ap toute, te vess ap miri rig, oun dau yak, te rakreh ap mande.

¹⁴⁸ Ninna an i rat djangrau pre, oun rakrau miro djiyeha pral tire laba.

¹⁴⁹ Shoun man, hoy me penau! Baro Devel! Tou hal yaake lačo! De man pale nevi zoor tire čačepaskre labentsa!

¹⁵⁰ Kol čilače, kay man palla lenn, hi bouder gar dour mandar. Tiro dromestar hi le dour.

¹⁵¹ Baro Devel, tou hal pash mande. Oun tire tsele laba hi o čačepen.

¹⁵² I rah tsiro prindjrau tire laba, hoy menge sikrenn, har te djivas. Tou kral, te ačenn le hako tsireske.

¹⁵³ Dik, har djoungeles mange djal oun le man vin dran i bibarht! Tiro drom bistrom me gar.

¹⁵⁴ Le tou miro koova an tiro vast, oun le man vin dran i čilače vasta! De man pale nevi zoor yaake har tou mange penal!

¹⁵⁵ I čilače krenn gar, hoy tou lendar kameh. Doleske čiveh tou len gar an o čačepen.

¹⁵⁶ Baro Devel, tou kreh tiro dji dour pre menge. De man pale nevi zoor tire čačepaskre labentsa!

¹⁵⁷ Boud hi kolla, kay man palla lenna, oun les mange phares krenna. Me moukau gar tire laba, hoy menge sikrenn, har te djivas.

¹⁵⁸ Me nay dikau kol phoukepangren gar glan i yaka, kay rikrenn pen gar ap tire laba.

¹⁵⁹ Dik, har me kamau tire laba, hoy menge penenn, hoy te kras mer. Baro Devel, tou hal yaake lačo, de man pale nevi zoor!

¹⁶⁰ Tiro tselo lab hi o čačepen. Oun tire tsele čačepaskre laba ačenna hako tsireske.

¹⁶¹ Raya lenn man palla, ninna te krom me lenge či, tire laba kokres hi kolla, kay me darau man lendar.

¹⁶² Pral tiro lab hom yaake barhtelo har yek, kay las boud bravlepen.

¹⁶³ Rhorhepen hi mange djoungelo, oun me nay dikau les gar glan i yaka. Tiro drom kamau me o djiyestar.

¹⁶⁴ Yaake har tou o čačepen vi-rakreh, hi kova mishto. Oun me sharau tout koleske efta kope an o dives.

¹⁶⁵ I bari barht hi kolen, kay tiro drom kamenna. Yon perenn gar tiro dromestar tele.

¹⁶⁶ Baro Devel, dikau ap toute, te čivess man an o čačepen, oun krau, hoy mandar kameh.

¹⁶⁷ Miro tselo djiyeha rikrau man ap tire laba, hoy menge sikrenn, har te djivas, oun kamau len boud oun boudeder.

¹⁶⁸ Me rikrau tire laba, hoy menge penenn, hoy te kras oun har te djivas; lauter, hoy krau, dikeh tou.

¹⁶⁹ Baro Devel, shoun miro ropen! Mouk man tire laba te hayvell, yaake har tou penal!

¹⁷⁰ Shoun koy gole miro djiyestar! Le miro djipen vin dran i bibarht yaake har tou mange penal!

¹⁷¹ Tou sikreh mange, hoy mandar kameh. Doleske kamell miro mouy touke te givell.

¹⁷² Miri čip kamell tiro lab te givell. Tire tsele laba hi mishto oun čačo.

¹⁷³ De man tiro vast, hoy hadell man! Me krom miro dji pre, te rikrap tire laba, hoy menge penenn, hoy te kras mer.

¹⁷⁴ Baro Devel, miro tselo djiyeha kamau, te čivess man an o čačepen. Me hom barhtelo te djap tiro drom.

¹⁷⁵ Mouk man te djivell, te sharap tout, kre man zoreles tire čačepaskre labentsa.

¹⁷⁶ Me hom har i bakro, hoy nashedo djas. Rode man, tiro boudepaskres, me bistrom tire laba gar!