Debleskri gili 118 - O Debleskro Lab 2024 (Sinte-Manouche)Penenn i menshenge, hoy o Devel lauter kras 1 Parkrenn t'men pash o baro Debleste! Yob hi kamlo, oun leskro lačepen ačella hako tsireske. 2 Yaake hounte penenn i Israelitarya: Leskro lačepen ačella hako tsireske. 3 Yaake hounte penell o Aroneskro kheer: Leskro lačepen ačella hako tsireske. 4 Yaake hounte penenn kolla, kay djivenn o baro Debleha: Leskro lačepen ačella hako tsireske. 5 Har tapras man i daar, dom me gole ap o baro Debleste, oun yob shounas man, oun kras miro dji zoreles. 6 O baro Devel hi pash mande. Me darau gar. Hoy nay krell man i mensho? 7 O baro Devel hi pash mande, te vell lo ap miri rig tardo. Yaake dikau mire yakentsa, har čivell lo kolen tel mande, kay kamenn mange čilačepen. 8 Hi feteder te rikras men ap o baro Debleste, har te rikras men ap i menshende. 9 Hi feteder te rikras men ap o baro Debleste, har te rikras men ap i rayende. 10 Boud menshe his troul mande, kay kaman mange čilačepen. An i zoor o baro Deblestar nay tradom len pale. 11 Haki rigyatar van le ap mande pre. An i zoor o baro Deblestar nay tradom len pale. 12 Yon peran ap mande pre har i bine. An i zoor o baro Deblestar nay tradom len pale. Har i yag sik vin djal, hoy an i soubyengre bourra rhačell, yaake sik his le krik. 13 Har dan le man i zoreli dap, te perap, vas o baro Devel ap miri rig. 14 Lestar vell miri zoor. Leske givau miri gili. Yob vas oun las man vin dran i čilače vasta. 15 Shoun koy gili, hoy givenn o Debleskre menshe barhteles an pengre khera: “O baro Devel hi o zorleder. Yob hi o zorleder an o kourepen. 16 Leskro čačo vast hi hadedo: Yob hi o zorleder an o kourepen.” 17 Me merau gar. Na-a, ačau djido, oun penau i menshenge, hoy o baro Devel lauter kras. 18 Ninna te das lo man zoreles, moukas lo man gar te merell. 19 Krenn mange i bare voudya pre an o Debleskro kheer, te djap dren, te parkrap man pash miro baro Debleste. 20 Kate hi o baro Debleskro voudar: i Debleskre menshe djana kote dren. 21 Me parkrau man pash toute, te shounal tou man, oun val ap miri rig. 22 Ko bar, hoy i boudepangre ap i rig vitsran, kova vas ko zorelo bar, ap koleste o kheer tardo hi. 23 O baro Devel kras kova. Oun kova hi menge i baro koova, hoy hayvah gar. 24 Kava hi o dives, hoy o baro Devel kras. Givenn oun khelenn i barhtyatar pral leste! 25 Baro Devel, ab ap mari rig! De men barht, te djal lauter mishto! 26 Sharedo vell kova, kay vell an o baro Debleskro lab. Kate, dran o Debleskro kheer rakrah o Debleskri barht pral t'mende vin. 27 O baro Devel hi kokres o Devel. Kamles dikell lo ap mende. Avenn, lenn palmtikre patria an o vast, oun djan khelepah glan o Debleskri rhačepaskri! 28 Tou hal miro Devel. Pash toute kamau man te parkrell. Miro Devel, tout kamau me te sharell. 29 Parkrenn t'men pash o baro Debleste! Yob hi kamlo, oun leskro lačepen ačella hako tsireske. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.