Debleskri gili 114 - O Debleskro Lab 2024 (Sinte-Manouche)

Har i Israelitarya dran Egiptia djan, kras o Devel baro koova

¹ Har o Israel dran o them Egiptia vin djas, har o Yakobeskre menshe kol menshen moukan, kolengro rakepen yon gar hayvan,

² koy vas o them Youda kova them, kay le o baro Debles an-mangan. Oun o Israel vas kova them, pral koleste yob o baro ray hi.

³ Har van le pash o baro pani, nashas o pani peske. Har van le pash o pani Yordan, djas o pani pale.

⁴ I berge stan har bakre, oun i tikne berge har terne bakre.

⁵ “Tou baro pani, hoy his touha, te nashal touke, oun touha, tou pani Yordan, te djal pale?

⁶ Oun t'mer berge, hoy his t'mentsa, te stan har i bakre? Hoy his t'mentsa, t'mer tikne berge, te stan har terne bakre?”

⁷ O baro Devel his koy. Doleske vas kova yaake. Hakeno ap i phoub hounte trissell glan o baro Debleste, ko Debleste o Yakobestar.

⁸ Yob hi kova, kay kras pani dran i baro bar, oun moukas dran barra tikne panya te nashell.