Debleskri gili 110 - O Debleskro Lab 2024 (Sinte-Manouche)

O baro ray hi ninna o rashay oun ačell hako tsiro

1 I gili o Davidestar.

¹ I gili o Davidestar. O baro Devel penas ap miro baro rayeste: “Besh tout ap miri čači rig! Kamau te čivap kolen tel tire herya, kay touke čilačepen kamenn.”

² O baro Devel kras, te val tou baro ray ap i berga Sion, oun yob krell tiro them baro oun bareder. “Ab ray”, penell lo, “pral lauterende, kay hadan pen ap toute.”

³ Tou te deh tire lourden gole, venn le lauter o djiyestar touha. Shoukar an-rido hi kol terne morsha, kay venn pash toute ap o Debleskri berga, raylo har o dives, te djal o kham pre.

⁴ O baro Devel das pes sovel, oun yob las lat gar pale. Yob penas: “Tou hal rashay hako tsireske, savo har o Melkisedek his.”

⁵ O baro Devel hi ap tiri čači rig tardo, oun dell bare rayen khetne ap ko dives, kay leskri rholi vella,

⁶ oun yob o čačepen vin rakrella, oun an hake themma boud menshen i phagi della. Palle hi boud menshe moulo čiddo ap o bourhlo them. Boud pralstoune venn khetne dino.

⁷ O baro ray piyell dran o pani, hoy pash leskro drom nashell, oun lell nevi zoor oun vell o zorleder.