Debleskri gili 109 - O Debleskro Lab 2024 (Sinte-Manouche)

O mangepen yekestar, kay hi an i vasta kolendar, kay kamenn les te marell

1 I gili o rayeske pral i gipangre. Kay gili kras o David.

¹ I gili o rayeske pral i gipangre. Kay gili kras o David. Tou, miro Devel, tout sharau oun givau gilya touke, ma rike tout pale! Kre čomone!

² Čilače menshe rakrenn djoungeles pal mande, oun anenn rhorheno koova ap mande pre.

³ Pengre čilače čipyentsa doukrenn le man, oun čingrenn ap mande, ninna te krom me lenge či.

⁴ Yon kamenn mange čilačepen, ninna te hom kamlo ap lende. Me mangau toutar lačepen lenge.

⁵ Har homs lenge lačo, dan le man čilačepen pale. Har sikrom len miro kamlepen, dikan le čilače yakentsa ap mande.

⁶ Čip i čilačes pral leste, kay dell les gar o čačepen. Čip yekes ap leskri čači rig, kay anell doosh ap leste pre!

⁷ Te vell lo glan i čačepangre raya anlo, mouk kolen i phagi pral leste vin rakrell. Te mangell lo tout, dik ap leskro mangepen, har te vals kova i doosh.

⁸ Mouk les sik te merell, oun leskri boudi te lell i vavar dren.

⁹ Leskre čaven vell kek dad, oun leskri romyat vell bouder kek romes.

¹⁰ Kre, te venn leskre čave vin tradedo dran pengro kheer, hoy paash dino vas, oun hounte nashenn trouyel, oun mangenn penge maro.

¹¹ Kova, kay leske love patsas, kova lell lestar lauter, hoy les hi. Menshe, kay gar lestar hi, lenn lauter, koleske yob boudras.

¹² Kek te krell leske lačepen, oun kek krell peskro dji pre leskre čavenge.

¹³ Kre, te merenn kolla vin, kay pal leste venna. Leskre čavengre čaven venn kek čave bouder, yaake te vell lengro lab bistedo.

¹⁴ Baro Devel, ma biste i doosh leskre phourendar! Ma biste o čilačo koova, hoy leskri day kras!

¹⁵ Mouk kova, hoy le kran, hako tsiro glan tire yaka te vell! Kre, te vell leskro lab bistedo an o tselo them!

¹⁶ Yob kras kek lačepen i vavarenge. I čorvelen oun bibarhtelen las yob palla, ninna koles, kay les kek zoor bouder his, te dell lo les moulo.

¹⁷ Yob kamas o praasepen. Yaake mou vell kova ninna ap leste! Yob kamas gar te rakrell i barht pral yekeste vin. Kanna, mou ačell i barht dour lestar!

¹⁸ Yob rivas o praasepen an har i gad. Doleske mou djal o praasepen an leste dren har pani, hoy piyell lo, oun har djet, koleha makell lo pes dren.

¹⁹ Mou ačell o praasepen ap leste čiddo har i ripen, oun har i pereskri dori, hoy yob hako dives troul peste čivella.

²⁰ Kova vell i phagi o baro Deblestar kolenge, kay doosh ap mande pre anenn oun čilačo koova pral mande rakrenn.

²¹ Tou, miro baro Devel, ab mantsa, te hadap tiro lab. Me rikrau ap tiro lačepen. Ab ap miri rig oun le man vin dran i čilače vasta!

²² Me hom čorvelo oun kek hi ap miri rig. Miro dji hi phagedo.

²³ Miro djipen nashella mandar yaake har o dives, te vell i rat. Oun me vau krik phourdedo har i stepaskro.

²⁴ Rhom či yaake boud divessa, te hi mire heryen bouder kek zoor, oun man hi kek thulepen ap i kokale.

²⁵ Kolla, kay anan doosh ap mande pre, san pral mande. Te dikenn le man, rissrenn le pengre yaka.

²⁶ Miro baro Devel, ab ap miri rig! Tou hal yaake lačo. Sike tiro lačepen ap mande!

²⁷ Mouk len te dikell, te kreh tou kova, te vell kova lauter toutar.

²⁸ Yon te praasenn man, palle de tou man barht! Yon te hadenn pen ap mande pre, palle kre, te hounte ladjenn le pen! Yaake te nay sau me pale!

²⁹ An i ladj ap kolende lauterende, kay anan doosh ap mande pre. Lengri ladj mou vell yaake baro, te venn le latar čakedo har i bayah.

³⁰ Me kamau man te parkrap pash o baro Debleste o tselo djiyestar, oun les sharell glan boud menshende.

³¹ Yob vell o čorveleske ap i rig, oun lell les vin dran i vasta kolendar, kay penenn: “Yob hounte vell maredo.”