Debleskri gili 108 - O Debleskro Lab 2024 (Sinte-Manouche)O baro Devel hi o zorleder pral kolende, kay leskre menshenge čilačepen krenn 1 I gili o Davidestar. 2 Miro Devel, miro dji hi pale zorelo. Me kamau touke te givell oun te bashrell, ava, kova kamau me. 3 Bashrenn, t'mer miri harfa oun miri gitarra! Kava dives kamau me o kham pre te djangrell. 4 Baro Devel, me kamau tout te sharell, mank i menshende dran boud themma touke gilya te givell. 5 Tiro lačepen hi yaake baro, te djal lo pral o bolepen, oun tiro čačepen yaake dour har i volke nashenn. 6 Sike tiro barepen ap o bolepen, miro Devel, oun tiro raylepen ap i tseli phoub! 7 Ab ap mari rig tiro zorelo vasteha oun le men, kolen tou kameh, vin dran i čilače vasta! Shoun, har dau ap toute gole! 8 O Devel rakras an peskro kheer, kay yob djivell: “Me vom o zorleder”, dell lo gole i barhtyatar. “Me dau o foro Sichem mire menshende, oun ninna i tala Soukot. 9 O them Gilead hi miro, oun o them Manasse hi miro. O them Efrayim hi miri sasterni stadi, oun o them Youda hi kova, koles penepaske hi. 10 O them Moab hi miro thopaskro čaro. Ap o them Edom vitsrau miro kirarh. Pral i Filistarya dau vi-gole, te vom lengro ray.” 11 Koon anell man an ko zorelo foro? Koon sikrell man o drom an o them Edom? 12 Koon nay krell kova, har tou kokres, mo Devel, kay moukal men? Djah tou gar vin mare lourdentsa an o kourepen? 13 Ab tou ap mari rig oun le men vin dran i čilače vasta! Te hi menshe ap mari rig, hi kova čičeske oun či moldo. 14 Maro Debleha krah mer baro koova. Oun yob stakrell kolen khetne, kay yaake zoreles ap mende djan. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.