Debleskri gili 107 - O Debleskro Lab 2024 (Sinte-Manouche)

Kolla, kay vin lino hi dran i bibarht, parkrenn pen pash o Debleste

¹ Sharenn o baro Debles. Yob hi lačo. Leskro lačepen ačell hako tsireske.

² Kova te penenn i vi-line menshe, kolen o baro Devel vin las dran i vasta kolendar, kay len pandan.

³ Yob anas len khetne dran boud themma, kotar, kay o kham pre-djala, kotar, kay o kham tele djal, kotar, kay o kham gar vell, oun kotar, kay o kham pralstounes tardo hi.

⁴ Mank lende his save menshe, kay his nashedo an o moulo tato them. Kek drom hatsan le, vitar kek foro, kay menshe djivenna.

⁵ Yon bokan oun troushan, oun patsan bouder gar, te venn le vin.

⁶ Har lenge yaake djoungeles djas, dan le gole ap o baro Debleste. Oun yob las len vin dran lengri daar.

⁷ Oun yob sikras len o čačo drom, yaake te van le an i foro, kay menshe djivenna.

⁸ Yon hounte parkrenn pen pash o baro Debleste, te vas lo yaake lačes ap lende, oun kras baro shoukar koova ap i menshende.

⁹ Kolen, kay his len troush, das lo doha te piyell, oun kolen, kay his len bok, das lo boud lačo rhapen.

¹⁰ Vavar his beshdo an o stilepen, kay his kek momeli, kokres kali rat. Lengre vasta oun herya his pandle an saster oun doukran len.

¹¹ Yon shounan gar ap o Debleste, kay hi o Devel pral halauter, oun čivan leskre laba ap i rig.

¹² Doleske moukas lo len khetne te phagell. Yon his koy čiddo, oun kek his koy, kay hidjrals len pre.

¹³ Har lenge yaake djoungeles djas, dan le gole ap o baro Debleste. Oun yob las len vin dran lengri daar,

¹⁴ oun anas len vin dran i kali rat, kay kek momeli his, oun kras lengre sasterne shelle pre.

¹⁵ Yon hounte parkrenn pen pash o baro Debleste, te vas lo yaake lačes ap lende, oun kras baro shoukar koova ap i menshende,

¹⁶ te das lo sasterne voudya dren, oun phagas sasterne pandepangre.

¹⁷ Vavar kran dinelo koova, peran o Debleskro drom tele, oun anan doosh ap pende. Doleske djas lenge yaake djoungeles,

¹⁸ te nay rhan le bouder či, oun his boudeder moulo har djido.

¹⁹ Har lenge yaake djoungeles djas, dan le gole ap o baro Debleste. Oun yob las len vin dran lengri daar,

²⁰ oun rakras i lab, oun yon vas sasto. Oun yob las len vin dran o merepen.

²¹ Yon hounte parkrenn pen pash o baro Debleste, te vas lo yaake lačes ap lende, oun kras baro shoukar koova ap i menshende.

²² Ninna hounte anenn le leske shoukar koova, te parkrenn le pen pash leste. Oun i barhtelo djiyeha hounte rakrenn le kolestar, hoy yob lenge kras.

²³ Vavar ouleran ap i shiffe vin ap o baro pani, te bikrenn oun parenn le.

²⁴ Kolla dikan, hoy o baro Devel nay krell, oun havi zoor les pral o baro pani hi.

²⁵ Yob rakras, oun i zorelo dourho phourdas, hoy o pani pral oun tele das.

²⁶ Oun o shiffo vas pre hidjedo an o bolepen, oun peras pale tele an o telstunepen. Oun i morsha an o shiffo dan gole i daryatar,

²⁷ oun nay rikran pen gar ap i herya, har te vans le mate, oun djinan bouder gar, hoy te krenn le.

²⁸ Har lenge yaake phares his, dan le gole ap o baro Debleste, oun yob las len vin dran pengri daar,

²⁹ oun kras, te phourdas o zorelo dourho bouder gar. Oun o pani čivas pes pale.

³⁰ Oun yon van barhtelo, te čivas pes lauter. Oun yob anas len pash o them, kay yon nay ačan.

³¹ Yon hounte parkrenn pen pash o baro Debleste, te vas lo yaake lačes ap lende, oun kras baro shoukar koova ap i menshende.

³² Yon hounte sharenn les kote, kay yon khetne venna, oun hadenn les kote, kay i phoureder khetne venna.

³³ Dran o them, kay pani nashell, kras lo i moulo them, oun moukas kol lengste panya bouder gar te nashell.

³⁴ Yaake vas i phoub, kay boud djob oun zenlepen baro vas, i moulo londo them. Kova kras lo dran o čilačepen kol menshendar, kay kote djivenn.

³⁵ Oun pale moukas lo an o moulo them boud pani te nashell, oun dran i trouk phoub pani te vell.

³⁶ Oun moukas kolen, kay bokenn, kote te djivell, oun kolla kran penge kote i foro,

³⁷ oun čivan djob an i phoub, ninna drakengre rouka, oun anan boud rhapen dren.

³⁸ Oun yob das len barht, oun yon van boud oun boudeder. Oun yob das len ninna boud firhen.

³⁹ Pale van le tikno rikedo, oun i bibarht his zoreles ap lende. Oun yon van tikno oun tikneder.

⁴⁰ Koy moukas lo ladj ap lengre raya te perell, oun yon hounte nashan an o moulo them trouyel, kote kay kek drom hi.

⁴¹ I čorvelen las lo vin dran lengri bibarht, oun kras, te van yon pale boud, yaake har bakre, hoy venn boud oun boudeder.

⁴² Kova dikenn kolla, kay o čačo drom djan, oun hi barhteles, oun i čilačenge vell o mouy pandlo.

⁴³ Koon gosevo hi, bistrell kova gar, oun hayvell, har lačo o baro Devel hi.