Debleskri gili 105 - O Debleskro Lab 2024 (Sinte-Manouche)

O Debleskro drom peskre menshentsa

¹ Parkrenn t'men pash o baro Debleste, oun hadenn leskro lab! Penenn i menshenge an i vavar themma kova, hoy yob kras!

² Givenn oun bashrenn leske! Rakrenn pral ko tselo baro koova, hoy yob lauter kras!

³ Sharenn koles, koon kokres o čačo Devel hi! Avenn barhteles pral leste, t'mer, kay rodenn o baro Debles!

⁴ Poučenn pal o baro Debleste, oun pal leskri zoor! Avenn glan leste hako tsiro!

^5-6 T'mer, kay venn pal o Abraham, o Debleskro boudepaskro, t'mer čave o Yakobestar, koles yob vin rodas, ma bistrenn, hoy yob lauter kras an peskri bari zoor, kova, hoy kek vavar nay kras! Ma bistrenn, har yob o čačepen pral i menshende vin rakras!

⁷ O baro Devel hi maro Devel, oun o čačepaskro ray pral i tseli phoub.

⁸ An kek tsiro bistrell lo peskri sovel, hoy lo mentsa dren djas. Peskro lab, hoy das lo, ačella yaake rah har menshe ap i phoub djivenna.

⁹ Kova hi ko lab, hoy das lo o Abrahameste, koy sovel, hoy das lo o Isaakeste,

¹⁰ oun pal leste o Yakobeste, oun das peskro vast pre, te ačell kava lab i Israelenge hako tsireske.

¹¹ Yob penas: “Touke dau kava them Kanaan, kova hi ko them, hoy t'menge vell.”

¹² An ko tsiro his le gar boud, gar boudeder har i vast pherdo, oun his vi-themarya an o them.

¹³ Oun yon djan yek themestar an o vavar, djan trouyel an boud rayengre themma.

¹⁴ Oun o Devel das yak, te taprell len kek an. Oun i bare rayen pral kol themma das lo trad oun penas lenge:

¹⁵ “Lenn i vasta krik mire menshenge, kolen mange vin rodom! Ma krenn čilačepen kolenge, kay mire rakepangre hi!”

¹⁶ Oun yob moukas i bari bok an o them te vell, te das bouder kek maro.

¹⁷ [Oun yon djan an o them Egiptia.] Glan lende bičras lo i morshes. Kova his o Yosef. Yob vas i ginlo boudepaskro.

¹⁸ Leskre herya pandan le an sasterne shelle, oun troul leskri meen čivan le saster,

¹⁹ bis te vas ko tsiro, kay ko lab čačo vas, hoy o Yosef o baro Deblestar las oun glan-vi penas.

²⁰ Oun o baro ray bičras yekes koy, te moukell lo les vin dran o stilepen. Oun o baro ray pral menshende an boud themma moukas les vin.

²¹ Oun kras, te vas o Yosef o pralstouno pral leskro kheer, oun čivas lauter, hoy les his, an leskre vasta.

²² Yob te sikrell o baro rayeskre boudepangre, hoy te krenn le. Kol pralstunende pral o them sikras lo, har te krenn le o feteder o themeske.

²³ Palle vas o Yakob an o them Egiptia, oun o Israel his i vi-themari an o them o Hameskre čavendar.

²⁴ O baro Devel moukas peskre menshen boud oun boudeder te vell. Yaake van le bareder oun zorleder har kolla, kay len tikno rikrenn.

²⁵ Kolenge das lo an o dji, te dikenn le čilače yakentsa ap o Debleskre menshende, oun kran lenge midjak koova.

²⁶ Yob bičras peskro boudepaskres, o Moses, oun o Arones, koles yob peske vi-rodas.

²⁷ Oun yon kran baro koova an o Debleskri zoor mank i Egiptarya, savo koova, hoy kek vavar nay kras an o them o Hameskre čavendar.

²⁸ O baro Devel bičras i tamlepen, te vas kales, har rati. I Egiptarya shounan gar ap leskre laba.

²⁹ Yob kras rat dran i tsele panya i Egiptarendar, oun moukas i mače kote dren te merell.

³⁰ Yob kras o tselo them pherde djambe, ninna kote, kay i bare raya sovenna, his le.

³¹ Yob penas, te venn matsille, hoy čourye denn, oun boud matsille van an o tselo them.

³² Har dikan i Egiptarya ap brishin, bičras lo lenge barrengro brishin an lengro them, ninna yag, hoy pral oun tele djas ap o bolepen.

³³ Lengre drakengre rouka oun faygetikre rouka das lo tele, oun phagas i tsele rouka an lengro them.

³⁴ Yob penas, te venn stepangre, oun stepangre van, yaake boud, te nay penas kek, kitse yon hi.

³⁵ Oun kolla rhan lauter pre, hoy baro vas an lengro them, ninna o djob ap i harhetikri phoub.

³⁶ Yob das o phoureder morsh čaves moulo haki datar an o them Egiptia. Kolla his lengre dadengri feteder zoor.

³⁷ Har anas o baro Devel i Israelitaryen vin, lan le roup oun sonakay pentsa. Oun kek lendar his nasselo oun hounte ačas pale.

³⁸ I Egiptarya daran lendar, oun his barhtele, har djan yon penge.

³⁹ O baro Devel khatras peskre menshen tel i folka, oun rati sikras len i yag o drom.

⁴⁰ Yon mangan lestar mass, oun yob moukas pesse čirkle te vell. O mareha dran o bolepen kras lo len čalo.

⁴¹ Yob phagas i baro bar, oun pani nashas vin, oun nashas an o moulo them har i lengsto baro pani.

⁴² Yob bistras gar peskro Debleskro lab, hoy das lo peskro boudepaskres, o Abraham.

⁴³ Har anas lo peskre vi-rodede menshen vin, sanas lengro dji. Oun yon givan i barhtyatar.

⁴⁴ Yob das len o them vavar menshendar, oun halauter, hoy kolen his, das lo lende, te vell kova lengro.

⁴⁵ Kava kras lo, te rikrenn le leskre laba, oun shounenn ap kova, hoy yob lenge penas. Sharedo vell o baro Devel!