Debleskri gili 104 - O Debleskro Lab 2024 (Sinte-Manouche)

O baro Devel kras i phoub shoukar

¹ Miro tselo djiyestar sharau o baro Debles. Miro baro Devel, har baro hal tou! An shoukapen oun raylepen hal tou rido.

² Har i baya čival i bari momeli troul toute. Tou tserdal o bolepen bourhlo har i bari plarhta,

³ oun kral touke i kheer pral i panya. Tou oulereh ap i volke har ap i vourdin, oun i vinta hidjreh tout.

⁴ O dourho, hoy phourdell tel o bolepen, hi tiro bičepaskro. Oun i yag hi tiro boudepaskro.

⁵ Tou čival i phoub zoreles tardo, te ačell li tardo hako tsireske.

⁶ I panya čakran lat har i ripen, oun o pani his pral haki berga tardo.

⁷ Har čingral ap leste, djas o pani pale, glan tiri gole nashas lo peske,

⁸ oun nashas i berge pral tele an i tala, yaake dour har tou penal.

⁹ Tou penal, har dour i panya nay djan, oun doureder nay djan le gar. I douyto kopo hounte djal o pani gar pral i tseli phoub.

¹⁰ An o telstouno them moukeh tou tikne panya dran i phoub te vell, te nashenn le mank i berge.

¹¹ Yaake vell i vesheskre firhen te piyell, oun i divye bourike nay piyenn, bis te hi len bouder kek troush.

¹² Pral lende an i rouka hi i čirkle beshdo oun givenna.

¹³ Dran o bolepen deh tou brishin ap i berge, oun kreh te vell i phoubyat doha pani.

¹⁴ Tou moukeh i firhenge o khass bares te vell, oun djob oun zenlepen i menshenge. Yaake anell lenge i phoub lengro rhapen vin:

¹⁵ i mool, hoy o mensheskro dji barhteles krella, o djet, hoy leskro mouy shoukar krella, oun o maro, hoy o menshes zoreles krella.

¹⁶ Ninna i bare rouka lenn doha pani, kol cedertikre rouka ap i berga Libanon, hoy tou, baro Devel, kote an i phoub čival.

¹⁷ An kol rouka krenn i tikne čirkle pengre khera, oun i storke beshenn pral ap i rouka.

¹⁸ An i bare berge djivenn i divye bouzya. Oun mank i barra hi i bergetikre shoshoya khere.

¹⁹ Tou kral o moonto, te sikrell lo men i deesh-te-douy čonna an o bersh. O kham djinell peskro tsiro, har lo tele djala.

²⁰ Tou peneh, te vell rati, oun koy venn i tsele veshengre firhe vin.

²¹ Kol terne divye margodje denn gole pal mass, oun mangenn o Deblestar pengro rhapen.

²² Te djal o kham pre, tserdenn le pen pale, oun čivenn pen tele an pengro khatepen.

²³ Palle djan i menshe vin ap pengri boudi oun boudrenna bis ap i rat.

²⁴ Baro Devel, har baro oun boud hi kova, hoy tou halauter kral! Har goseves kral tou halauter! I phoub hi pherdo o tselo koova, hoy tou kral.

²⁵ Kote hi o baro pani, baro oun bourhlo. Oun firhe hi dren: bare oun tikne, yaake boud, te nay djinell kek har boud.

²⁶ I shiffe oulerenn pengro drom; oun koy hi o baro panyeskro firho, o Leviatan, hoy touke kral, te kheless tou leha.

²⁷ Kolla lauter denn yak, kaana tou veh, te dess len te rhal ap o čačo tsiro.

²⁸ Tou deh len, oun yon lenn les. Tou kreh tiro vast pre, oun yon lauter venn čalo.

²⁹ Tou te djah lendar krik, taprell len i daar. Tou te leh lendar o dourho, merenn le, oun venn pale čik.

³⁰ Tou te bičreh tiro djipaskro dourho, venn le kerdo, oun tou deh nevo djipen ap i phoub.

³¹ O Debleskro raylepen mou ačella hako tsiro! Mou vell lo barhtelo pral kova, hoy yob kras!

³² Yob dikell i phoub an, oun yoy trissella. Yob taprell i berge an, oun i yagakri tampa djal pre dran lende.

³³ Kamau te givell o baro Debleske, yaake rah har djivau, kamau te bashrell miro Debleske, yaake rah me hom.

³⁴ Mou vell miri gili leske shoukar! Me hom barhtelo pral miro baro Debleste.

³⁵ Mou ačenn kolla gar djido ap i phoub, kay o Debleskro drom moukan. Mou vell ko tsiro, kay hi bouder kek čilače koy! Miro tselo djiyestar sharau o baro Debles. Sharedo vell o baro Devel!