Debleskri gili 103 - O Debleskro Lab 2024 (Sinte-Manouche)

I gili pral o Debleskro baro lačepen

1 O Davidestar.

¹ O Davidestar. Miro tselo djiyestar sharau o baro Debles. Lauter, hoy an mande hi, sharell leskro Debleskro lab!

² Miro tselo djiyestar sharau o baro Debles, oun bistrau gar o lačepen, hoy yob mange kras.

³ Yob hi kova, kay miri tseli doosh mandar krik lella, kova, kay miro tselo nasslepen krik lella oun man sastes krella,

⁴ kova, kay man dran o merepen vin lella, kova, kay peskro lačepen oun kamlepen pral mande vin čorella,

⁵ kova, kay man čales krella peskro lačepah, oun man pale terno krella, oun zorelo har i adlari.

⁶ O baro Devel čivell o čačepen pre, oun dell kolende pengro čačepen, kay venn tele rikedo.

⁷ Yob moukas o Moses te djinell, hoy yob krella, oun kras glan i Israelende baro koova, kay kek vavar nay krella.

⁸ O baro Devel hi i lačo Devel, kay krell peskro dji pre peskre menshenge. Yob vell gar sik rhoyedo. Oun leskro lačepen herell gar pre.

⁹ Yob čingrell gar hako tsireske, oun ačell gar hako tsireske rhoyedo.

¹⁰ Yob dell men gar i phagi pal kova, hoy kram, oun dell men maro čilačepen gar pale.

¹¹ Yaake dour har o bolepen pral i phoub hi, yaake baro hi leskro lačepen kolenge, kay djivenn leha.

¹² Koy rig, kay o kham pre djal, hi dour krik kolatar, kay lo tele djal. Yaake dour har kay yek rig hi koy vavaratar, yaake dour čivas yob mari doosh mendar krik.

¹³ Yaake har i dad peskro dji pre krell peskre čavenge, yaake krell o baro Devel peskro dji pre kolenge, kay djivenn leha.

¹⁴ Yob djinell, kay menshe ham; te ham dran čik kerdo, bistrell lo gar.

¹⁵ I mensho hi har khass, har zenlepen, hoy pre-djas.

¹⁶ Palle phourdell i dourho pral vergel, oun krik hi lo, oun koy platsa, kay lo his, prindjrell les bouder gar.

¹⁷ O lačepen o baro Deblestar hi gar yaake. Kova ačella hako tsireske. An kek tsiro lell lo les krik kolendar, kay djivenn leha. Ninna lengre čavenge oun kolengre čavenge rikrell yob peskro lab,

¹⁸ kolenge, kay bistrenn gar, hoy yob lengre phourentsa vin kras, oun rikrenn pen ap leskre laba.

¹⁹ O baro Devel čivas peskri rayli beshepaskri an o bolepen. Oun yob hi o ray pral halauter.

²⁰ Sharenn o baro Debles, t'mer bolepangre, kay han leskre zorele kourepangre, oun krenn, hoy yob penell, oun shounenn ap leskre laba!

²¹ Sharenn o baro Debles, t'mer leskre bolepangre lourde, kay boudrenn leske oun krenn, hoy yob kamell!

²² Sharenn o baro Debles, t'mer lauter, kay van lestar kerdo! Sharenn les, kay t'mer ninna djivenna an leskro them! Ninna tou, miro dji, share o baro Debles!