Debleskri gili 102 - O Debleskro Lab 2024 (Sinte-Manouche)

I bibarhtelo dell gole ap o Debleste

¹ I mangepen yekestar, koleske gar mishto djal, oun koles bouder kek zoor hi, oun kay glan o baro Debleste peskri dji vin čorella.

² Baro Devel, shoun miro mangepen! Shoun, har dau ap toute gole!

³ Ma dja krik mandar ap kava dives, kay mange ropaske hi! Risse tout pash mande ap kava dives, kay ap toute gole dau! Shoun man sik!

⁴ Mire divessa djan trouyel har i tampa hoy djal dran i yag pre. Mange hi tato, har vals i yag an mande.

⁵ Miro dji hi phagedo, oun les hi bouder kek zoor yaake har o khass, hoy tele dino vas. Bistrau ninna miro maro te rhal.

⁶ Me hom yaake sano, kay nay dikeh i kokale, yaake boud rovau oun dau gole.

⁷ Me vom har i divyo čirklo an o moulo them, har i ratsyakro čirklo, hoy djivell mank i barra i paash-dino forestar.

⁸ Rati sovau gar, dau gole har i čirklo, hoy kokres hi oun pral ap o kheer beshdo hi.

⁹ Hako dives sanenn kolla pral mande, kay kamenn mange čilačepen, oun praasenn man.

^10-11 An tiri rholi dal tou man trad, hadal man pre oun vitsral man pale tele ap i phoub. Doleske rhau yagakri čik har maro. Oun mire sva perenn an miro pipen.

¹² Miro djipen djal peske har o dives, te vell i rat, har o khass, hoy tele merell an o kham.

¹³ Tou, baro Devel, ačeh hake tsirenge, tout denn le an-gole an ko tsiro, hoy vella.

¹⁴ Ste pre oun ab pale kamles ap i menshende an o foro Sion. O tsiro vas, te less lengri doosh lendar krik. Kanna hi o čačo tsiro kay.

¹⁵ Tire boudepangre kamans, te vell o foro neves kerdo. Lenge hi ropaske pral i barra ko tele-phagedo forestar.

¹⁶ I menshe an i tsele themma trashenn palle glan toute, o baro Debleste. Oun i tsele bare raya ap kay phoub vitsrenn pen tele glan tiro raylepen.

¹⁷ O baro Devel čivell o foro Sion pale pre, oun moukell pes te dikell an peskro raylepen.

¹⁸ Yob shounell o mangepen kolendar, hoy mouklo van. Ap lengro mangepen dikell yob lačes.

¹⁹ Činenn kal laba pre kolenge, kay pal mende venna, yaake te sharenn ninna kolla menshe o baro Debles!

²⁰ O baro Devel dikas pral tele dran o pralstunepen, kay lo khere hi. Dran o bolepen dikas lo tele ap i phoub,

²¹ te shounell lo o ropen kolendar, hoy stilde hi, te krell lo i shelle pre kol menshendar, kay an o merepen hi.

²² Yaake te sharenn le o baro Debles ap i berga Sion, an o tselo foro Yerusalem hadenn le leskro lab,

²³ ap ko tsiro, kay venn menshe dran i tsele rayengre themma kote khetne, te mangenn le o baro Debles an.

²⁴ Har homs gar doureder har mashkral ap miro drom, phagas yob miri zoor, moukas man sikeder phouro te vell.

²⁵ Me penom: Mo Devel, le man gar krik ap o paash drom miro djipastar! Tiro djipen herell gar pre, an kek tsiro.

²⁶ Tou kral i phoub glan rah tsirya, oun tire vasta kran o bolepen.

²⁷ Yon ačenna gar. Tou hal kova, kay ačella. Yon venn phouro oun djan paash har i ripen. Tou čiveh len ap i rig har phoure ripya oun leh touke neve. I phoure hounte djan penge.

²⁸ Tou ačeh yaake har tou hal, oun djiveh hako tsiro.

²⁹ Mare čaven moukeh tou an o them te djivell, oun ninna lengre čave venn bares glan toute.