Debleskri gili 10 - O Debleskro Lab 2024 (Sinte-Manouche)Mo Devel, hoske hal tou yaake dour mandar? 1 Baro Devel, hoske hal tou yaake dour mandar krik? Hoske khatreh tou tout mandar an o čilačo tsiro? 2 O čilačo hi pre-phourdo oun lell i čorvelen palla, oun krell lentsa ko čilačo koova, hoy leske an leskro shero trouyel djal. 3 Yob sharell pes pral kova, hoy lo kamell te krell. Oun kova, kay i meen gar pherdo lell, praasella o baro Debles oun sal pral leste. 4 O čilačo rikrell o nak pral oun penell peske: O Devel poučell gar palla. Lauter, hoy leske an o shero trouyel djala, hi: Dell kek Devel. 5 Lauter djal leske, har yob kamella. Te deh tou leste i phagi, patsell lo kova gar, yaake dour hal tou lestar krik. Yob čoungrell ap lauterende, kay leske an o drom tardo hi. 6 Yob penell peske an peskro dji: Či nay vitsrell man trouyel. Kek bibarht vell ap mande. 7 Yob koshell, rhorhell oun dell trad. Leskro rakepen anella douka oun bibarht. 8 Khatemen pal i khera hi lo beshdo, oun čorrhanes dell lo kolen moulo, kay ap lende kek doosh hi. Leskre yaka djan o čorveleske palla. 9 Čorrhanes khatedo har i levo an i bourra, yaake lourell yob ap o čorveleste, oun taprell les an peskri netsa oun tserdell les krik. 10 Yob djal tele ap i čanga oun stell ap o čorveleste, oun peskri zoryah vitsrell lo les an i čik. 11 An peskro dji penell lo peske: “O Devel djinell kova gar. Yob das gar yak pre oun dikell či.” 12 Ste pre, baro Devel! Mo Devel, hade tiro vast! Ma biste i čorvelen! 13 Hoske nay praasell tout kova, kay kamell toutar či te djinell? Hoske nay penell lo an peskro dji: “O Devel poučella gar palla.” 14 Tou dikal les. Tou deh yak ap kolende, kolenge le o djipen phares krenn, oun djineh lengre douka, oun leh lengro koova an tiro vast. Ava, i čorvele čivenn pengro djipen an tiro vast. Tou hal ap i rig kolendar, kolen kek dad bouder hi. 15 Phage i zoor kol čilačendar oun midjak menshendar, hoy len pral i vavarende hi! De len pengri phagi, te krenn le bouder kek čilačo koova! 16 O baro Devel hi o baro ray kanna oun hako tsiro. Kolla, kay gar ap leste patsenna, djan penge dran leskro them. 17 Kova, hoy i čorvele toutar mangenna, shouneh tou, mo baro Devel. Tou kreh lengro dji zorelo, oun tiro kand hi lenge pre. 18 Oun tou deh o čačepen i čorvelenge oun kolenge, kay len kek dad bouder hi, yaake te nay krell bouder kek mensho i vavarenge daar ap kay phoub. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.