Daniel 3 - O Debleskro Lab 2024 (Sinte-Manouche)

O Neboukadnezar krell i sonakaskri figura, kolat hounte mangell hakeno an

¹ O baro ray Neboukadnezar kras i sonakaskri figura, hoy shob-deesh (60) moussya bares oun shob moussya bourhles his. Oun yob čivas lat pre an o bourhlo them Doura. Ko them Doura his an o them Babilonia.

² Oun o baro ray Neboukadnezar bičras morshen vin, te anenn le khetne i tsele pralstunen, bare lourden, themeskre rayen, čačepangre morshen, lovengre pralstunen, rakepangre, pralstoune kliste oun lauteren, kay his penepaske pral vavarende. Kolla te venn pashel, te vell koy figura o ersto kopo an-mangedo.

³ Oun yon halauter van oun his tardo glan koy figura.

⁴ Oun yek, kay vin gole dell, hoy o baro ray kamella, stas pre oun das gole: “Menshale dran hako them oun rakepen, shounenn, hoy o baro ray t'menge penell:

⁵ Te shounenn t'mer o bashepen ap i phourdepangre, ap i doryengre bashepangre oun ap i tsele vavar bashepangre, palle hounte vitsrenn t'men tele glan koy sonakaskri figura, hoy moukas o baro ray Neboukadnezar pre te čivell.

⁶ Oun kova, kay vitsrell pes gar tele oun mangell koy figura gar an, kova vell sik lino oun an i bobeskri yag vitsedo.”

⁷ Oun kol tsele menshe, kay khetne van dran hako them oun dran hako rakepen, shounan o phourdepaskro bashepen oun o bashepen ap kol doryengre bashepangre oun ko tselo vavar bashepen. Koy vitsran le pen tele ap i phoub glan koy sonakaskri figura, hoy moukas o baro ray Neboukadnezar pre te čivell.

Ap o Danieleskre triin malende vell doosh anlo

⁸ An ko tsiro van Babilonarya oun phoukran ap i biboldende.

⁹ Oun yon penan ap o baro rayeste Neboukadnezar: “O baro ray te djivell hako tsireske!

¹⁰ Tou, maro baro ray rakral oun penal: Hakeno, kay shounell o phourdepaskro bashepen, o bashepen ap i doryengre bashepangre oun ko vavar bashepen, kova hounte vitsrell pes tele oun hounte mangell koy sonakaskri figura an.

¹¹ Oun kova, kay vitsrell pes gar glan late tele oun mangell lat gar an, kova hounte vell an i bobeskri yag vitsedo.

¹² Oun kate hi biboldengre morsha, hoy tou dren čival an pengri boudi, te venn le pralstoune an o them Babilonia. Kolla krenn gar, hoy tou penal, oun sharenn tiro debles gar oun mangenn koy figura gar an, hoy tou moukal pre te čivell. Kolla hi o Shadrak, o Meshak oun o Abed-Nego.”

¹³ Oun i bari rholi tapras o Neboukadnezar. Oun yob penas, te anenn le kol triin morshen glan leste. Oun i morsha van glan leste anlo.

¹⁴ Oun o Neboukadnezar poučas lendar: “Hi kova čačo, Shadrak, Meshak, oun Abed-Nego? Kamenn t'mer gar miro debles te sharell, oun koy sonakaskri figura gar an-mangell, hoy moukom pre te čivell?

¹⁵ Kanna shounenn: Yaake sik, har shounenn t'mer o phourdepaskro bashepen oun bashepen ap i doryengre bashepangre oun ko tselo vavar bashepen, vitsrenn t'men tele ap i phoub, oun mangenn koy figura an, hoy me krom! Te vitsrenn t'men gar glan late ap i phoub, palle venn t'mer gomme kate an i bobeskri yag vitsedo! Oun koon hi ko devel, kay nay lell t'men vin dran miro vast?”

¹⁶ Oun o Shadrak, o Meshak oun o Abed-Nego penan ap o baro rayeste Neboukadnezar: “Mer hounte penas touke kate či!

¹⁷ Maro Devel, koles mer an-mangah, te kamell yob, palle nay lell lo men vin dran i bobeskri yag oun dran tiro vast.

¹⁸ Oun ninna te kamell lo kova gar te krell, tou djiness: Mer sharah tiro debles gar, oun mangah gar koy sonakaskri figura an, hoy tou moukal pre te čivell.”

O Devel hi pash i triin morshende an i bobeskri yag

¹⁹ Kote vas o Neboukadnezar yaake pherdi rholi, te vas leskro mouy lolo i rholyatar pral o Shadrak, o Meshak oun o Abed-Nego. Oun yob penas zoreles, te vell o bob efta kope yaake tateder kerdo, har glan ko tsiro.

²⁰ Pale penas lo peskre zorleder lourdenge, te pandenn le o Shadrak oun o Meshak oun o Abed-Nego, oun te vitsrenn le len an koy bobeskri yag.

²¹ Oun kolla pandan len oun vitsran len an koy bobeskri yag. Len his gomme pengre tsele koola ap pende: lengre baya, rholopya oun stadja.

²² Oun yaake har o baro ray penas, te krenn le, rhačras i yag an o bob zoreles, yaake zoreles, te tapras li kol morshen, kay kol trinen, o Shadrak oun o Meshak oun o Abed-Nego pre anan. Oun kol morsha rhačran pre.

²³ Oun o Shadrak oun o Meshak oun o Abed-Nego peran pandles an i yag.

²⁴ Oun ap yek kopo kras o baro ray Neboukadnezar bare yaka. Oun yob stas ap peskre herya, oun poučas kol pralstunendar, kay pash leste hi: “Moukam mer gar triin morshen te pandell oun len an i yag te vitsrell?” “Ava, baro ray, yaake hi!” penan le.

²⁵ Yob penas: “Me dikau star morshen, kay an i yag trouyel djan. Oun yon hi bouder gar pandlo, oun kek doukepen hi ap lende. Oun ko starto dikell vin har i bolepaskro.”

I triin mala venn vin lino dran i yag

²⁶ Oun o Neboukadnezar djas pash ko voudar ko bobestar oun das gole: “Shadrak, Meshak oun Abed-Nego, t'mer boudepangre o pralstouno Deblestar, avenn koy vin, oun venn pash mande!” Oun o Shadrak, o Meshak oun o Abed-Nego djan vin dran i yag.

²⁷ Oun i pralstoune, i bare lourde, o themeskre raya oun vavar pralstoune o baro rayestar van khetne, oun dikan penge kol morshen an, oun dikan, kay i yag kek zoor pral kolende his. Oun i balla ap lengre sherya his gar rhačedo. Oun lengre baya his gar paash. Oun ap lende soungas nay kek i yagakri khand.

O Neboukadnezar sharell o baro Debles

²⁸ Oun o Neboukadnezar penas: “Sharedo vell o Devel, koles o Shadrak oun o Meshak oun o Abed-Nego an-mangenn. Yob bičras peskro bolepaskres oun las peskre boudepangren dran o merepen vin. Kolla rikran ap leste, oun shounan gar ap miro lab, oun dan pengro djipen an o merepen. Yon kaman kek vavar debles an-mangenn har pengro Debles kokres.

²⁹ Oun yaake penau me kanna: Koon i tsele menshendar dran hako them oun rakepen rakrell djoungeles pral ko Debleste, koles o Shadrak oun o Meshak oun o Abed-Nego an-mangenn, kova vell an kotya dino. Oun koleskro kheer vell pash dino. Hi kek vavar devel, kay nay lell yekes yaake dran o merepen vin har yob.”

³⁰ Pal kova das o baro ray kol triin morshende boud penepaske an o them Babilonia.

³¹ O baro ray Neboukadnezar moukas i liil te činell ap i menshende dran hako them oun hako rakepen, kay ap i tseli phoub djivenna. “Bari barht t'menge!

³² Mange hi shoukar, te penap t'menge ko baro koova, hoy o pralstouno Devel ap mande kras, hoy kek vavar nay krella.

³³ Har baro hi kova, hoy yob krell! Har zorelo hi lo oun krell, hoy kek vavar nay krella! Yob hi oun ačell o ray kanna oun hako tsireske.”