Daniel 12 - O Debleskro Lab 2024 (Sinte-Manouche)

Ko tsiro, kay i moule pre stenna

¹ Oun an ko tsiro stell o bolepaskro Mikael pre, kova, kay ap i rig tire menshendar hi. Ko tsiro hi yaake pharo, har das kek vavar glan kova, yaake rah har menshe koy hi. Oun an ko tsiro venn tire menshe vi-lino dran i bari bibarht, lauter kolla, kay an o Debleskro liil dren činlo hi.

² Oun boud kolendar, kay tel i phoub čiddo his oun sovan, kolla stenn pre, ko yek o djipaske, hoy gar pre herella, oun ko vavar i bari ladjake oun o praasepaske, hoy bouder gar pre herella.

³ Oun kolla, kay hayvan o Debleskro drom, hi har i momeli ap o bolepen. Oun kolla, kay sikran i vavarende o čačo drom, hi har i bolepangre momlia hako tsireske.

⁴ Oun tou Daniel, rike kava lab khatemen. Oun pande i dori troul kava liil oun čip tiro sikepen pre, te nay krell les kek pre, bis ko tsiro vella, kay i phoub bouder gar rah koy hi. Palle rodenn boud koy dren oun hayvenn boud oun boudeder.

⁵ Oun me, o Daniel dikom: Douy vavar his koy tardo, ko yek ap kay rig o lengsto panyestar oun ko vavar ap koy vavar rig.

⁶ Oun yob penas ap ko morsheste, kay an layntikre koola rido his, oun pral ko lengsto pani tardo his: “Kaana hi ko tsiro, kay kava baro zorelo koova pre herella?”

⁷ Oun me shounom ko morshes, kay an layntikre koola rido his, oun pral ko lengsto pani tardo his. Oun kova hadas peskro čačo oun peskro servo vast pre ap o bolepen, oun das pes sovel pash koleste, koleskro djipen gar pre herella, oun penas: “Yek tsiro oun douy tsirya oun i paash tsiro. Oun ap ko tsiro, kay o Debleskre menshe pale khetne djivenna, oun bouder gar kate te kote tradedo hi, palle hi kova lauter kerdo.”

⁸ Oun me shounom kova oun hayvom les gar. Oun me penom: “Miro ray, har djal lauter vin?”

⁹ Oun yob penas: “Dja koy, Daniel! Kal laba ačenn khatedo oun dre-pandlo, bis te vell ko tsiro, kay i phoub bouder gar rah koy hi.

¹⁰ I djia boud menshendar venn djoudjo kerdo oun venn thodo, har sonakay an i yag thodo vell. Oun i čilače krenn doureder o čilačepen. oun hayvenn kava koova gar. Kokres kolla, kay o Debleskro drom prindjrenna, hayvenn ninna kava koova.

¹¹ Oun ko tsirestar, kay anenn le bouder gar hako dives firhen o Debleske, oun kay čivenn le koy djoungeli čilači figura pre, hi 1.290 (yek-sero-douy-sheel-te-enya-deesh) divessa.

¹² Barhtelo hi kova, kay vin rikrell bis te 1.335 (yek-sero-triin-sheel-te-triyanda-te-panč) divessa trouyel hi.

¹³ Oun tou, Daniel, ač o Debleha tiro tselo djipen! Oun palle sob! Te hi kay phoubyakro tsiro trouyel, steh tou pale pre o djipaske oun leh tiro bravlepen.”