Čačepangre 8 - O Debleskro Lab 2024 (Sinte-Manouche)

O Gideon hi zorleder har i vavar Midianarya, hoy pral ačan

¹ I morsha dran o kheer Efrayim penan ap leste: “Har nay kral tou savo kova mentsa, te djal an o kourepen i Midianentsa, oun moukal men gar gole te dell?” Oun yon čingran zoreles ap leste.

² Oun yob penas ap lende: “Kova, hoy t'mer kran, hi boud bareder har kova hoy me krom. Kova hi yaake har an ko tsiro, kay i drake dren anlo venna: Kol palstoune drake hi feteder har i tsele vavar. Yaake hi kova, hoy o Efrayim kras, feteder har kova, hoy mire tsele menshe khetne kran.

³ An t'maro vast das o Devel kol pralstunen pral o Midian: o Oreb oun o Seeb. Oun hoy nay krom me? Te dikeh yek ap kova, hoy t'mer kran, krom me nay yaake boud har či!” Oun har yob yaake lentsa rakras, djas lengri rholi pale.

⁴ Oun o Gideon vas pash o pani Yordan, oun djas vergel kol 300 (triin sheel) morshentsa, hoy pash leste hi. Oun yon his khino, oun an lende his bouder kek zoor, fothe yon kol Midianarya palla lan.

⁵ Oun yob penas ap kol morshende an o foro Soukot: “Denn kol lourden, hoy pash mande hi, maro te rhal! Yon hi khino. Mer lah kol bare rayen pral o Midian palla: o Zeba oun o Zalmunna.”

⁶ I pralstoune an o Soukot penan: “O Zeba oun o Zalmunna hi gomme gar an tire vasta! Hoske das mer tire lourden te rhal?”

⁷ Kote penas o Gideon: “Čačepah, te das o baro Devel man o Zeba oun o Zalmunna an miro vast, dau me t'maro mass kol soubyengre kashtentsa dran o moulo tato them.”

⁸ Oun yob moukas o foro pal peste, oun djas pre an o foro Penouel. Oun penas emlige laba ap kolende, kay kote djivan. Kolla penan ninna kova, hoy i morsha an o foro Soukot penan.

⁹ Kote penas o Gideon ninna ap i morshende an o foro Penuel: “Te vau sasto pale, phagau kava baro zorelo kheer khetne.”

¹⁰ Oun o Zeba oun o Zalmunna his an o them Karkor. Oun 15.000 (deesh-te-panč-zerya) lourde his pash lende, lauter kolla, kay pral ačan kol tsele lourdendar, kay dran o them van, kay o kham pre djal. Kol vavar morsha, kay nay kouran pen o rhareha, van temerl dino. Kolla his 120.000 (sheel-te-biish-zerya) morsha.

¹¹ Oun o Gideon djas ko drom, kay kolla djan, kay an plarhtene khera djivenn. Ko drom djal pash i forya Noba oun Yogboha, ap koy rig, kay o kham pre djala. Oun yob peras pral i lourdende dran Midian kote, kay yon beshde hi, an ko tsiro, kay daran le gar, te merenn le.

¹² Oun kol douy bare raya pral o Midian, o Zeba oun o Zalmunna, nashan penge. Oun yob las len palla, oun tapras len. Oun lengre tsele lourde tapran i bari daar lestar!

¹³ Oun palle vas o Gideon, koleskro dad o Yoash hi, pale o kourepastar, oun djas ko drom tele, hoy i berga tele nashella, oun Heres kharella.

¹⁴ Oun yob tapras i čaves i menshendar dran o foro Soukot. Oun poučas les vin. Oun kova činas leske i laba pre kol 77 (efta-deesh-te-efta) pralstunendar oun phourendar an o foro Soukot.

¹⁵ Oun o Gideon djas pash kol morshende an o foro Soukot oun penas ap lende: “Dikenn kay, kate hi o Zeba oun o Zalmunna, kolentsa t'mer man praasan, har t'mer penan: O Zeba oun o Zalmunna hi gomme gar an tire vasta! Hoske das mer tire khine lourden te rhal?”

¹⁶ Oun yob las kol phoureden an o foro Soukot oun moukas len te dell soubyengre kashtentsa dran o moulo tato them.

¹⁷ Oun ko baro zorelo kheer an o foro Penouel phagas lo khetne. Oun das i morshen an ko foro temerl.

¹⁸ Oun yob rakras ap o Zeba oun o Zalmunna oun poučas lendar: “Har dikan kol morsha vin, kolen t'mer ap i berga Tabor temerl dan?” Oun yon penan: “Yaake har tou hal, yaake his yon ninna, hakeno lendar his har i rayeskro čavo.”

¹⁹ Kote penas lo: “Kolla his mire phrala, i čave miri datar his yon. Pash o djido Debleste dau me man sovel: Te moukans t'mer len te djivell, doms me t'men kanna gar temerl.”

²⁰ Oun yob penas ap o Yeter, leskro phoureder čaveste: “Ste pre! Oun de len temerl!” Ko čavo las peskro rharo gar glan. Yob daras, fothe terno his lo.

²¹ Kote penas o Zeba oun o Zalmunna: “Ste tou pre oun kre kova kokres! Havo morsh yek hi, sikrell pes an leskri zoor.” Kote stas o Gideon pre, oun das o Zeba oun o Zalmunna temerl. Oun djas koy oun las kol sonakangre paash-čonna hoy lengre khamelenge troul lengre menya hi.

O Gideon kamell gar o baro ray te vell

²² Oun i morsha dran o Israel, penan ap o Gideon: “Ab tou maro ray! Tou oun tire čave oun kolengre čave venn ray pral mende! Tou lal men dran i vasta kolendar dran o them Midian vin.”

²³ O Gideon penas ap lende: “Gar me kamau pral t'mende ray te vell, oun ninna mire čave venn gar ray pral t'mende. O baro Devel vell t'maro ray.”

²⁴ Oun o Gideon penas pale ap lende: “Yek kamau t'mendar te mangell: Denn man kol kanengre, hoy lan kolendar, kay kouran t'men lentsa!” Kolla his Ismaelarya oun doleske his len sonakangre kanengre.

²⁵ Oun yon penan: “O djiyestar dah len tout.” Oun yon čivan i plaashka ap i phoub, oun hakeno lendar vitsras kol kanengre pre, hoy yob i vavar lourdenge krik las.

²⁶ Oun kol sonakangre kanengre, hoy dan le o Gideoneske, his yaake biish kilogramme phares. Oun kote his ko tselo vavar koova gar pashel: kol tikne paash-čonna, kol kanengre oun kol kouč lole ripya, hoy i bare raya dran o them Midian hidjran. Vitar gar i verklia, hoy i khamele troul pengre menya hidjran, his kote pashel.

²⁷ Oun o Gideon kras dran ko sonakay yek devel. Oun čivas les pre an peskro foro, hoy kharella Ofra. Oun o tselo Israel vas koy, te mangenn le les an. Oun doleske peras o Gideon oun leskro tselo kheer o čačo dromestar tele.

O Gideoneskro merepen

²⁸ O Midian his yaake khetne dino, te his yon bouder gar zoreles doha, te kourenn le pen i Israelentsa. Yaake his kek kourepen an o them Israel 40 (star-deesh) bersha, yaake rah har o Gideon djivas.

²⁹ Oun o Gideon, kay kharas ninna Yeroub-Baal, koleskro dad o Yoash his, djas pale an peskro kheer oun djivas kote o tselo tsiro.

³⁰ Oun o Gideones his boud romya oun 70 (efta-deesh) morsh čave, hoy lestar his.

³¹ Oun les his ninna i vavar djouvel, kay djivas an o foro Sichem. Oun yoy las lestar i morsh čavo. Oun o Gideon das les o lab Abimelek.

³² Oun o Gideon vas boud phouro oun meras oun vas paskedo an o moulengro kheer peskro dadestar Yoash an o foro Ofra, ko foro, kay i Abiyesarya djivan.

I Israelitarya mangenn neves i rhorhene Deblen an

³³ Oun har o Gideon meras, djan i Israelitarya o Debleskro dromestar tele oun nashan pale kol deblenge palla, kay kharenn Baal. Oun yon kran o debles Baal-Berit pengro devel,

³⁴ oun bistran pengro baro Debles, koles, kay len dran o vast kolendar zoryah vin las, hoy troul lende djivan oun pen lentsa kouran.

³⁵ Oun ninna o tselo lačo koova, hoy o Gideon i Israelenge kras, his lenge gar boud moldo, oun yon his gar lačes ap leskre čavende, kay pal leste van.