Čačepangre 7 - O Debleskro Lab 2024 (Sinte-Manouche)

O Gideon hi zorleder har i Midianarya

¹ Oun sik taysarlakro djas o Gideon, kay kharell ninna Yeroub-Baal, peskre tsele lourdentsa, hoy pash leste hi, pash o pani, hoy kharella Harod. Oun kote čivan le pengre plarhtene khera pre. Yaake his i lourde dran o them Midian serves lendar pash koy tikni berga More an o telstouno them.

² Oun o baro Devel penas ap o Gideon: “Tout hi boud lourde, hoy pash toute hi. Yaake nay dau i Midianarya gar an t'mare vasta. O Israel nay sharals pes oun nay penals: Mare vasta his, hoy men vin lan!

³ Oun kanna de gole glan i kanda i tsele lourdendar: Kones daar hi, kova djal i berga Gilead tele oun djal khere!” Kova kras o Gideon. Oun 22.000 (biish-te-douy-zerya) morsha djan khere. Oun 10.000 (deesh-zerya) morsha ačan pash o Gideon.

⁴ Oun o baro Devel penas ap o Gideon: “Kol lourde hi gomme boud. An len pash o pani tele! Me kamau kote vin rodell, koon touha djal. Oun kolen, hoy me tout sikrau, kolla djan touha! Oun hakenes, hoy touke penau, te djal lo gar touha, kova djal gar touha!”

⁵ Kote anas o Gideon i lourden tele pash o pani. Oun o baro Devel penas ap o Gideon: “Hakeno, kay piyell o pani peskri čipyah har i djouklo, koles čip ap yek rig! Oun kolen, kay ap pengre čanga djan, te piyenn le, čip ap i vavar rig!”

⁶ Oun kolla, kay piyan pengri čipyah har i djouklo, his 300 (triin-sheel) morsha. Oun kol vavar djan tele ap pengre čanga oun anan o pani pengre vastentsa pash o mouy.

⁷ Oun o baro Devel penas ap o Gideon: “Kol triin-shelentsa, kay o pani pengre čipyentsa piyan, kamau me i Midianarya an tiro vast te dell, oun o Israel dran lengre vasta vin te lell. Kol vavar lourden mouk khere te djal!”

⁸ Oun yon lan kolendar, kay khere djan, lengro rhapen oun pipen oun lengre phourdepangre pash pende. Oun yaake bičras o Gideon i tsele lourden pale pale pash pengre plarhtene khera. Kokres kol triin-sheel rikras lo pash peste. Oun kol tsele lourde dran o them Midian his tella glan leste an o telstouno them.

⁹ Oun an koy rat penas o baro Devel ap o Gideon: “Ste pre, oun dja tele kote, kay i Midianarya čiddo hi! Me dom len an tiro vast.

¹⁰ Oun te dareh tou tele te djal, palle le tiro boudepaskres, o Poura, peha, te djal lo touha tele.

¹¹ Oun kote shouneh tou, hoy yon rakrenn. Oun te shounal tou kova, palle venn tire vasta zoreles, yaake te nay djah tou tire lourdentsa tele, te kourenn le pen lentsa.” Oun o Gideon oun leskro boudepaskro, o Poura, djan tele kote, kay kol lourde hi, kay yak denn.

¹² Oun i Midianarya oun i Amalekarya oun lauter, kay van kotar, kay o kham pre djal, his kote čiddo an o telstouno them oun čakran o them har i stepangre. Yaake boud his le. Oun lengre khamele his yaake boud, te djinas kek, har boud yon hi. Kolla his yaake boud har i santa pash o baro pani.

¹³ Oun har o Gideon koy tele vas, penas yek morsh peskro maleske peskri souni. Oun yob penas: “Shoun, man his i souni: I maro dran djob peras i berga tele pash i platsa, kay i Midianarya hi. Oun o maro vas pash o plarhteno kheer, oun das les trouyel, yaake te peras lo khetne. Oun o pralstouno kotar vas tella, oun o telstouno kotar vas pral.”

¹⁴ Oun leskro maal penas: “Kava hi či vavar har o rharo o Gideonestar, koleskro dad o Israelitari Yoash hi. Koles das o Devel i tsele Midianarya pengre tsele lourdentsa an leskro vast.”

O Devel hi ap i rig o Gideonestar

¹⁵ Oun har shounas o Gideon koy souni oun kova, hoy kamas kay souni te penell, kote čivas lo pes ap i čanga glan o Debleste oun sharas les. Oun djas pale pash i platsa, kay i Israelengre lourde hi, oun penas: “Hadenn t'men! O baro Devel das i Midianarya oun lauter, kay pash lende hi, an t'maro vast.”

¹⁶ Oun dran kol triin shelendar čivas yob triin kope sheel morshen khetne. Oun hakenes das lo i phourdepaskri oun i khoro. Oun an ko khoro his i kasht, hoy rhačell.

¹⁷ Oun yob penas ap lende: “Dikenn ap mande oun krenn yaake, har me krau! Kanna djau pash i lourdengri platsa. Denn yak, hoy kote krau! Oun krenn mange lauter palla!

¹⁸ Čivenn t'men troul i tseli platsa! Oun te phourdau me an i phourdepaskri, me oun kolla, kay pash mande hi, palle phourdenn t'mer ninna an t'mare phourdepangre, oun denn gole: Kouras men o baro Debleske oun o Gideoneske!”

¹⁹ Oun o Gideon oun kol sheel morsha, kay leha djan, van pash koy platsa mashkral an i rat. Oun o Gideon oun kol morsha troul leste phourdan an i phourdepangre, oun dan kol khore paash, hoy an lengre vasta hi.

²⁰ Kanna phourdan kol triin-sheel lourde an pengre phourdepangre, oun dan pengre khore paash. Oun yon rikran pengro servo vasteha o kasht, hoy rhačell, oun pengro čačo vasteha pengri phourdepaskri, te phourdenn le dren, oun dan gole: “Kouras men o baro Debleske oun o Gideoneske!”

²¹ Oun yon ačan kote tardo, kay le his, troul koy tseli platsa trouyel. Oun kol tsele Midiantikre lourde nashan har divyes ap koy platsa trouyel, dan bari gole oun kaman te nashenn penge.

²² Oun har kol triin sheel morsha an pengre phourdepangre phourdan, kras o baro Devel, te kouras pes ap i platsa hakeno hakeneha. Oun yon lauter nashan bis pash o foro Bet-Shitta ap o drom pash o foro Zereda, oun ninna bis pash o foro Abel-Mehola pash o foro Tabbat.

²³ Oun i morsha an o them Israel van khetne gole dino: dran o kheer Naftali, dran o kheer Asser, oun dran o tselo kheer Manasse. Oun yon lan i Midianarya palla.

²⁴ Oun o Gideon bičras morshen an i berge Efrayim, oun moukas kote te penell: “Avenn tele, oun čivenn t'men i morshenge dran Midian an o drom! Denn yak ap i panyengre platse bis pash o foro Bet-Bara oun ninna ap o pani Yordan, te nashenn le penge gar koy vergel!” Koy van i tsele morsha dran Efrayim khetne kharedo. Oun yon kran yaake har o Gideon penas.

²⁵ Oun yon tapran douy morshen, kay pralstoune his pral i Midianarya. Lengre laba his Oreb oun Seeb. Oun yon dan o Oreb temerl pash i baro bar. Kova vas pal leste kharedo: bar Oreb. Oun o Seebes dan le temerl pash i molyakro stakepaskro. Koles dan le o lab Seeb. Oun yon lan i Midianarya palla. Oun i shere kol douyendar, o Oreb oun o Seeb, anan le pash o Gideon vergel o pani Yordan.