Čačepangre 5 - O Debleskro Lab 2024 (Sinte-Manouche)

I Debora givell i gili

¹ Ap ko tsiro givas i Debora kay gili khetne o Barakeha, koleskro dad o Abinoam his.

² Sharas o baro Debles! Čače morsha anan o Israel an o kourepen. Pendar vin djan i kourepangre lentsa.

³ Shounenn, t'mer bare raya! Denn yak, t'mer pralstoune, me givau oun bashrau o baro Debleske, – o Debleske pral o Israel.

⁴ Baro Devel, har tou tele val dran o them Seir, har tou val dran o them Edom, kote trissas i phoub, oun brishin vas dran o bolepen, boud pani ap i phoub.

⁵ I berge trissan glan o baro Debleste, kay sikras pes ap i berga Sinay glan peskre menshende Israel. Lengro Devel hi lo, – yob, o baro Devel.

⁶ An ko tsiro, har o Shamgar djivas, koleskro dad o Anat hi, ninna an ko tsiro, har i Yael djivas, his kek mensho ap i dromma, oun kolla, kay ap kol bare dromma vin djans, hounte djans čorrhanes, ap tikne khatemen dromma.

⁷ Kek gole vas shounlo an i gaba an o Israel. Palle stas i Debora pre, i day an o Israel.

⁸ Mire menshe rodan penge vavar debla! Kote vas o kourepen glan lengre voudya. Oun pash 40.000 (star-deesh-zerya) morsha an Israel vas kek rharo hatslo, vitar kek shilto.

⁹ Miro dji hi i pralstunenge an Israel, oun i lourdentsa, kay pendar vin djan an o kourepen. Kolenge parkrenn t'men pash o baro Debleste!

¹⁰ T'mer, kay ap i parne bourike klissenna, oun t'mer, kay ap i stakepangre beshenna, oun t'mer, kay ap o drom djan: Givenn!

¹¹ Shounenn, har bashrenn le pash o pani, kote kay denn le pengre firhen te piyell. Kote sharenn le ko baro koova, hoy o baro Devel kras, ava, o baro koova, hoy kras lo ap peskre menshende Israel, har djan le dran lengre forya.

¹² Dja glan! Dja glan, Debora! Dja glan, gib i gili! Dja glan, Barak, tou o Abinoameskro čavo! Oun le stildo kolen, hoy tou tapral!

¹³ Kol čače morsha, hoy pral ačan, djan tele pash pengre pralstunende. O baro Debleskre menshe djan mantsa khetne an o kourepen, te kourenn le pen leske.

¹⁴ Dran o Efrayim van kolla, kay dran o them Amalek van. Pal lende vas o Benyamin peskre lourdentsa, dran o Makir van i pralstoune, oun dran o Zabulon i bare lourde.

¹⁵ Oun i raya dran o Issakar djan khetne i Debora an o kourepen. Yaake har o Issakar kras ninna o Barak oun nashas pal leste i berga tele. An o them Ruben his le beshdo pash o pani oun rakran boud oun rah.

¹⁶ Hoske ačal tou pash tire bakre? Kamal tou i bashepen te shounell, hoy i bakrengre kran? Ava, pash o Ruben rakran le boud oun rah.

¹⁷ Oun i morsha dran o Gilead ačan ap i vavar rig o panyestar Yordan. Oun o Dan? Hoy krell yob? Pash peskre shiffe ačell yob. Pash o baro pani djivell o Asser. Oun kote ačas lo ninna beshdo.

¹⁸ Dikenn ap kolende dran o Zabulon oun dran o Naftali: Kolla hi morsha, kay daran gar, te denn le pengro djipen an o merepen, oun djan kek daryah an o kourepen.

¹⁹ Kote van le, kol bare raya pral o them Kanaan! Yon van oun maran pen mentsa. Ava, an o foro Taanak pash o pani Megiddo maran le pen mentsa. Rup hidjras kek lendar khere.

²⁰ Ninna i bolepangre momlia djan an o kourepen. Ap lengre dromma djan le ap o Sisera pre.

²¹ Oun ko phouro tikno pani, ko pani Kishon, tserdas leskre lourden krik. Doureder, doureder! Te vas zoreles an o kourepen!

²² Kote nashan i graya sikeder. Klak-klak, klak-klak, shounenn koy bari gole, hoy lengre pire kran!

²³ Praasenn o foro Meros, penas o baro Debleskro bolepaskro. Praasenn kolen, hoy an ko foro djivenn! Ava, praasenn len! Yon van gar ap o baro Debleskri rig, oun djan gar an o kourepen khetne kol čače morshentsa.

²⁴ O Debleskri barht vell pral i Yael, kolakro rom o Heber hi, ko Kenari! O Devel dell lat boudeder barht har i tsele vavar djouvyen, kay djivenn an i plarhtene khera!

²⁵ O Sisera, pani mangas lo, oun thoud das li les, an i kouč čaro das li les smentana te piyell.

²⁶ Lakro vast tapras i saster, oun lakro čačo vast i sasterno depaskro, kolentsa das li leskro shero paash. An leskro shero djas ko saster dren oun vas pale vin.

²⁷ Mashkral lakre herya phagas lo khetne, peras lo tele, oun koy his lo čiddo. Khetne phagas lo, tele peras lo, moulo hi lo.

²⁸ Oun leskri day dikas dran i vali, dikas darenes mashkral kol kashta vin. Kay ačell leskro vourdin? Hoske vell lo gar? Hoske shounau i graya gar?

²⁹ Oun lakre gosveder djouvya penan lake kava. Oun yoy penas les lenge palla:

³⁰ Čačepah hatsan le boud, hoy yon peha lenn, shoukar bravlepen hakeneske: Yek rakli, douy raklia hako morsheske, oun kouč shoukar ripya o Sisereske, ninna menyakre dikle, kay shoukar koova dren sido hi.

³¹ Maro baro Devel, yaake hounte merenn lauter, hoy tout gar kamenna. Kolla, kay kamenn tout o tselo djiyestar, yon te venna raylo har o kham, har djal lo pre an peskri zoor! Oun pal kova his an o them 40 (star-deesh) bersha kek kourepen.