Čačepangre 17 - O Debleskro Lab 2024 (Sinte-Manouche)

O Mika krell peske i debleskri figura

¹ Oun kote his i morsh ap i berge Efrayim, koleskro lab his Mika.

² Oun kova penas ap peskri date: “Me shounom, kay rakral bibarht pral koleste vin, kay čoras touke kol 1.100 (yek-sero-yek-sheel) roupene love. Dik, ko roup hi pash mande. Me kokres lom les.” Koy penas leskri day: “O baro Debleskri barht pral toute, miro čavo!”

³ Oun yob das kol 1.100 (yek-sero-yek-sheel) roupene love peskri date pale pale. Oun leskri day penas: “Me dau ko roup o baro Debleste, te vell kek bibarht ap toute, miro čaveste. Kol loventsa te vell i kashteni figura kerdo, pral kolate roup čoredo hi.”

⁴ Yob kamas gar oun das ko roup peskri date pale pale. Koy las leskri day 200 (douy-sheel) roupene love, oun das len ko morshes, kay shoukar koova dran sonakay krella. Oun kova kras i kashteni figura, oun čoras roup pral kolate. Oun koy figura vas čiddo an o Mikaeskro kheer.

⁵ Ko morshes Mika his i debleskro kheer peske oun peskri familyake. Oun yob kras i rashayeskri damdira oun khereskre debla, oun rodas yek peskre čavendar vin, te vell lo leskro rashay.

⁶ Oun an ko tsiro his kek baro ray pral o them Israel. Oun hakeno kras yaake, har mishto his an peskre yaka.

O Mika hatsell i rashay i Levitarendar

⁷ An ko tsiro djivas i terno morsh i menshendar Youda an o foro Betlehem an o them Youda. Oun kova his i Levitari.

⁸ Ko morsh djas vin dran o foro Betlehem, te rodell lo i kheer, kay nay ačell lo. Har djas lo yaake ap peskro drom, vas lo ap i berge Efrayim pash o kheer, kay o Mika djivas.

⁹ Oun o Mika penas ap leste: “Kay veh tou?” Oun yob penas ap leste: “Me hom i Levitari dran o foro Betlehem an o them Youda. Oun hom ap o drom, te djivap kote kay nay ačau.”

¹⁰ Koy penas o Mika ap leste: “Ač pash mande, oun ab miro rashay oun pen mange, hoy o Devel mandar kamell. Oun me dau tout koleske an o bersh deesh roupene love, ninna kova, hoy an-ripaske tout hounte vell, oun rhapen oun pipen.”

¹¹ Oun ko Levitari penas: “Ava, yaake hi mishto,” oun ačas pash o Mika. Oun koleske his lo har yek leskre čavendar.

¹² Oun o Mika das les koy boudi, te vell lo leskro rashay. Oun yob ačas an o Mikaeskro kheer.

¹³ Oun o Mika penas: “Kanna hi man i rashay an miro kheer. Doleske krell o baro Devel, te djal mange mishto.”