Čačepangre 15 - O Debleskro Lab 2024 (Sinte-Manouche)

O Simson kourell pes i Filistarentsa

¹ Pal i tsiro, an kol divessa, kay anan le o djob dren, djas o Simson pash o kheer, kay leskri romni hi, oun anas lake i terni bouzni peha. Oun yob penas: “Me kamau pash miri romyate an lakri isema.” Oun lakro dad moukas les gar,

² oun penas ap leste: “Me patsom, te kameh lat bouder gar pale. Oun me dom lat tiro feteder maleste. Kanna dik, lakri terni pheen hi shoukeder har yoy. Le kolat!”

³ Kote penas o Simson ap leste: “Kava kopo hom gar me, koles doosh hi, te krau i Filistarenge čilačepen.”

⁴ Oun o Simson djas koy, oun tapras triin-sheel divye djoukle. Oun las i kasht, oun pandas hako kopo douy divye djoukle i poryentsa ap ko kasht khetne.

⁵ Oun rhačras palle ko kasht an. Oun moukas kol djoukle kote te nashell, kay o djob i Filistarendar tardo hi. Yaake rhačras o djob tele, ninna o djob, hoy khetne lino his. Oun i yag djas an i drakengre rouka, oun an i djeteskre rouka.

⁶ Oun i Filistarya poučan: “Koon his kova?” Oun lenge vas penlo: “O Simson, kova kay i čat o morshestar dran Timna las, oun kova peskri čat lestar pale krik las, oun lat leskro males das.” Kote djan i Filistarya pre, oun rhačran lat oun lakro dades.

⁷ Oun o Simson penas ap lende: “Te krenn t'mer savo koova, palle dau me gar palla, bis te dom t'men lauter pale.”

⁸ Oun yob das len zoreles khetne, oun djas tele oun djivas an koy barrengri grotta pash Etam.

⁹ Oun i Filistarya djan pre an o them Youda oun čivan pengre plarhtene khera troul o foro Lehi.

¹⁰ Kote poučan i morsha dran Youda: “Hoske djan t'mer ap mende pre?” Oun yon penan: “Mer kamah o Simsones te pandell, oun leha te krell, har yob mentsa kras.”

¹¹ Kote djan triin zerya morsha dran Youda tele pash koy grotta pash Etam, oun penan ap o Simson: “Djineh tou gar, te hi i Filistarya pral mende ray? Hoske kral tou kova mentsa?” Oun yob penas ap lende: “Yaake har yon les mange kran, yaake krom me les lenge.”

¹² Yon penan ap leste: “Mer ham kay, te pandas tout, oun te das tout an i vasta i Filistarendar.” Oun o Simson penas ap lende: “Denn t'men sovel, te perenn gar t'mer pral mande oun denn man temerl.”

¹³ Oun yon penan ap leste: “Na-a, mer kamah tout te pandell oun tout an lengre vasta te dell, oun či vavares. Mer kamah tout gar moulo te dell.” Oun yaake pandan le les douy neve shellentsa. Oun anan les le vin dran ko barrengri grotta.

¹⁴ Oun har lo an o foro Lehi vas, dan i Filistarya bari gole i barhtyatar. Oun o baro Debleskro dourho vas pral leste. Oun kol shelle troul leskre moussya van har layntikre thaba, ap kolende yag vas, oun peran tele.

¹⁵ Oun yob hatsas i mouyeskro kokalo i mouli eslatar, las les an o vast oun das leha 1.000 (yek zero) morshen moulo.

¹⁶ Oun o Simson penas: “I mouyeskro kokalo i eslatar lom, oun i zero morshen moulo dom. I mouyeskro kokalo i eslatar lom, oun i moulen yek ap o vavareste vitsrom.”

¹⁷ Oun har yob kova vin rakras, vitsras lo ko kokalo dran peskro vast. Oun doleske dan le koy platsa ko lab Ramat-Lehi.

¹⁸ Oun les his bari troush, oun das ap o baro Debleste gole, oun penas: “Tou dal man yaake bari zoor, te vom o zorleder pral i Filistarende. Oun kanna hounte merap i troushatar, oun perau an i vasta kolendar, kay gar činlo hi ap pengro mass.”

¹⁹ Kote phagas o Devel o baro bar pash o foro Lehi, oun dran kotar vas pani. Oun yob piyas, oun leskri zoor vas pale, oun yob vas pale pherdo djipen. Doleske dan le ko pani, hoy kote dran i phoub vas, o lab: Pani kolestar, kay gole das. Ninna gomme kava dives hi kava pani kote pash o foro Lehi.

²⁰ Oun an ko tsiro, kay i Filistarya i raya his pral o them, his o Simson biish bersha o čačepaskro ray pral o Israel.