Čačepangre 13 - O Debleskro Lab 2024 (Sinte-Manouche)

O Simson vell boldo

¹ Oun i Israelitarya kran pale, hoy čilačes hi glan o baro Debleskre yaka. Oun o baro Devel das len an i vasta i Filistarendar. Oun kolla his i raya pral lende star-desha bersha.

² An ko tsiro djivas i morsh an o foro Zora. Kova his dran o kheer Dan. Koleskro lab his Manoa. Oun leskri romni nay las kek čaven.

³ Oun o bolepaskro o baro Deblestar moukas pes latar te dikell oun penas ap late: “Tou djineh, te nay leh kek čaven. Kanna djiness, tou veh vavarčandes oun leh i morsh čaves.

⁴ De yak, oun ma pi mool, vitar kek vavar zorelo pipen! Oun ma rha čomone, hoy pale-čiddo hi!

⁵ Ko čaves, kay leh, vell i morsh, kay o Debleske hi peskro tselo djipen foun ko dives, kay vell lo ap i phoub. Leskre balla venn gar činlo. Oun yob lell o Israel vin dran i vasta i Filistarendar.”

⁶ Oun koy djouvel djas pash peskro romeste oun penas ap leste: “I Debleskro morsh vas pash mande. Oun yob dikas vin har i bolepaskro o Deblestar, yaake te lom daar. Oun doleske poučom me lestar vitar gar, kay yob vella. Oun yob penas mange gar, har yob kharella.

⁷ Yob penas ap mande: Tou veh vavarčandes oun tou leh i morsh čaves. Oun kanna pi kek mool oun kek vavar zorelo pipen! Oun rha či, hoy pale-čiddo hi. Tiro čavo vell i morsh, kay o Debleske hi foun tiknes pre bis te merell lo.”

⁸ Kote mangas o Manoa o baro Debles oun penas: “Miro ray, mangau tout, biče gomme yek kopo ko Debleskro morshes pash mende, koles tou menge bičral, te sikrell lo men, har mer ko čaveha, kay boldo vell, trouyel hounte djas.”

⁹ Oun o Devel shounas, hoy o Manoa lestar mangas. Oun o bolepaskro o Deblestar vas pale pash koy djouvel, har li vin beshdo his ap i harhetikri phoub. Oun lakro rom, o Manoa, his gar pash late.

¹⁰ Kote nashas li sik pash peskro romeste, oun penas ap leste: “Dik, ko morsh hi pale kay, kova, kay ko vavar dives pash mande vas.”

¹¹ Kote kras pes o Manoa pre, oun djas pal peskri romyate, vas pash ko morsheste oun penas ap leste: “Hal tou ko morsh, kay miri romyah rakras?” Oun kova penas: “Me hom kova!”

¹² Oun o Manoa penas: “Te vell kova yaake, har tou les penal, hoy hounte kras pale leha? Hoy nay krell lo, oun hoy nay krell lo gar?”

¹³ Kote penas o bolepaskro o baro Deblestar ap o Manoa: “Kolestar lauterestar, hoy tiri romyake penom, hounte rikrell li pes pale:

¹⁴ Lauterestar, hoy ap o drakengro rouk bares vas, rhal li či. Oun mool oun zorelo pipen piyell yoy gar. Oun pale-čiddo rhapen rhal li gar. Kava lauter, hoy lake penom, hounte rikrell li.”

¹⁵ Oun o Manoa penas ap o bolepaskro o baro Deblestar: “Mangau tout, ač i tikno tsiro, bis te kram touke i terni bouzni rhapaske.”

¹⁶ O bolepaskro o baro Deblestar penas ap o Manoa: “Ninna te rikrals man kay, me rhaus tiro rhapen gar. Tou te kameh, nay rhačreh koy bouzni o baro Debleske.” O Manoa hayvas gomme gar, te hi lo o bolepaskro o baro Deblestar.

¹⁷ Oun o Manoa penas ap leste: “Har khareh tou? Te vell kova yaake har tou les penal, palle kamah men pash toute te parkrell.”

¹⁸ O bolepaskro o baro Deblestar penas ap leste: “Hoske poučeh tou pal miro lab? Kova hi i lab, hoy vell gar kharedo.”

¹⁹ Kote las o Manoa i tikni bouzni, oun koy pashel maro, maras lat, oun rhačras i bouzni oun o maro ap i baro bar o baro Debleske, kay zorelo koova krella. Oun o Manoa oun leskri romni his koy pashel tardo oun dikan kova.

²⁰ Oun har i yag ap o bar pre djas an o bolepen, koy djas o baro Debleskro bolepaskro ninna pre an koy yag. Oun o Manoa oun leskri romni dikan kova, oun vitsran pen ap i phoub ap pengro mouy.

²¹ Kanna hayvas o Manoa: Kova his o bolepaskro o baro Deblestar. Oun pal kova dikan le les bouder gar.

²² Oun o Manoa penas ap peskri romni: “Kanna hounte meras! Mer dikam o Debles!”

²³ “Na-a”, penas leskri romni, “te kamals o baro Devel men te marell, palle lals lo gar ko firhes oun ko maro dran maro vast, hoy leske dam oun leske rhačram. Oun yob sikrals men gar kava lauter, hoy dikam, oun penals menge gar kanna savo koova.”

²⁴ Oun koy romni las i morsh čaves, oun das les o lab Simson. Oun ko čavo vas baro, oun o baro Devel čivas peskri barht ap leste.

²⁵ Oun o dourho o baro Deblestar vas ap leste o ersto kopo, har his lo ap i platsa Makaneh-Dan mashkral i forya Zora oun Eshtaol.