Čačepangre 10 - O Debleskro Lab 2024 (Sinte-Manouche)

I čačepangre raya Tola oun Yayr

¹ Oun pal o Abimelek stas i morsh pre, te lell lo o Israel vin dran i čilače vasta. Kova his o Tola. Leskro dad his o Pouva, oun koleskro dad his o Dodo i menshendar Issakar. O Tola djivas an o foro Shamir an i berge Efrayim.

² Oun yob his 23 (biish-te-triin) bersha o čačepaskro ray pral o Israel. Oun palle meras lo, oun vas paskedo an o foro Shamir.

³ Oun pal leste stas o Yayr pre. Kova hi i menshendar Gilead. Oun yob his 22 (biish-te-douy) bersha o čačepaskro ray pral o Israel.

⁴ Oun koles his triyanda morsh čave, kay ap triyanda bourike klissan. Oun len his triyanda forya. Kolla his an o them Gilead oun kharenn gomme kava dives: Yayreskre forya.

⁵ Oun o Yayr meras, oun vas an o foro Kamon paskedo.

O Debleskri rholi vell pral o Israel

⁶ Oun i Israelitarya kran pale kova, hoy čilačes his glan o baro Debleskre yaka. Oun yon mangan i vavar deblen an: ko debles, kay kharell Baal, oun i debletsa, kay kharell Astarte, oun kol deblen, kay mangenn kol menshe an, kay djivenn an Syria, an Sidon, an Moab, an Ammon oun an Filistia. Oun i Israelitarya moukan o baro Debles oun mangan les bouder gar an.

⁷ Kote rhačas i bari rholi pre an o baro Debleste ap i Israelitarya. Oun yob das len an i vasta i menshendar dran i themma Filistia oun Ammon.

⁸ Oun 18 (deesh-te-orhta) bersha lan yon kol Israelitaryen palla, kay djivenn ap i vavar rig o panyestar Yordan an o them Gilead, kay i Amorarya djivan, oun kran lenge o djipen phares.

⁹ Oun i Ammonarya djan pral o Yordan, te marenn le pen i menshentsa dran Youda, Benyamin oun Efrayim. Oun yaake vas i bari daar pral o Israel.

¹⁰ Oun kote dan i Israelitarya ap o baro Debleste gole oun penan: “Mer kram čilačepen ap toute, te moukam tout, maro Debles, oun mangam o debles Baal an.”

¹¹ Oun o baro Devel penas ap lende: “Hi gar yaake, te rikran t'men i Egiptarya tele oun i Amorarya, i Ammonarya, i Filistarya,

¹² i Sidonarya, i Amalekarya oun i Maonarya? Oun har t'mer ap mande gole dan, lom me t'men dran lengre vasta vin.

¹³ Oun t'mer, hoy kran t'mer? T'mer moukan man oun mangan vavar deblen an. Doleske kamau t'men bouder gar vin te lell dran i vasta kolendar, kay t'men tele rikrenn.

¹⁴ Djan koy oun denn ap kol deblende gole, hoy t'mer t'menge vin rodan, te venn kolla t'menge ap i rig an ko tsiro, kay t'maro djipen pharo hi.”

¹⁵ I Israelitarya penan ap o baro Debleste: “Mer lam bari doosh ap mende! Kre tou mentsa, har tou kameh. Kokres kava yek kopo le men gomme vin dran kolengre vasta!

¹⁶ Oun yon vitsran kol vavar deblen pendar krik oun mangan o baro Debles an. Koy khaytas les, te vell o Israeleske yaake pharo kerdo.”

O čačepaskro ray Yefta

¹⁷ Oun i Ammonarya van khetne gole dino, oun čivan pengre plarhtene khera pre pash o foro Gilead. Oun i Israelitarya van khetne pash Mispa.

¹⁸ Oun i pralstoune pral kol Israelitarya, kay djivenn an Gilead, penan yek ap o vavareste: “Koon hi ko morsh, kay glan vin djal, te marell lo pes i lourdentsa dran o them Ammon? Kova te vell o pralstouno pral lauterende, kay djivenn an Gilead.”