Bičepangre 8 - O Debleskro Lab 2024 (Sinte-Manouche)

I patsle venna palla lino

¹ His mishto an o Sauleskre yaka, te maran le les. Pal ko dives lan le i patslen zoreles palla an o foro Yerusalem. Oun i patsle nashan an o them Youdea oun an o them Samaria. I Yezouseskre bičepangre ačan an o foro Yerusalem.

² Oun morsha, hoy ap o Debleskro drom djan, paskran o Stefanes oun rovan boud pral leskro merepen.

³ O Saulo kras lauter, te nay marell lo i tsele patslen. Yob djas an i khera, las len koy vin, morshen har djouvyen, oun vitsras len an o stilepen.

An o them Samaria

⁴ Kol patsle, kay ap o naashepen his, djan trouyel oun penan o lačo lab o Yezous Kristestar.

⁵ O Filipo djas an ko foro Samaria oun rakras kote o Yezous Kristestar.

⁶ Kol menshe dan yak ap kova, hoy o Filipo penas oun kras an o Debleskri zoor.

⁷ Boud menshendar tradas lo bengen vin. Kolla dan zoreles gole, har yon lendar vin djan. Oun boud menshe, kay his bango oun nay djan gar, van sasto.

⁸ Oun hakeno an kava foro his barhtelo pral kova, hoy koy djas.

⁹ An ko foro Samaria his ninna i morsh, kova his i dourkepaskro. Leskro lab his Simon. Yob penas pestar, te hi lo i baro morsh. Oun i menshe an ko foro kran bare yaka pral kova, hoy yob kras.

¹⁰ Oun halauter shounan ap leste, oun penan: “Ap ko morsheste hi o Debleskri bari zoor.”

¹¹ Peskro dourkepah tserdas lo len lauter ap peste. Doleske rikran yon boud lestar.

¹² Har kanna o Filipo lenge o Yezous Kristestar penas, koles o Devel bičras, te anell lo len pash o Debleste, patsan djouvya oun morsha ap kova, hoy o Filipo lenge penas. Oun yon moukan pen te taufrell.

¹³ Koy vas ninna o Simon patslo, oun moukas pes te taufrell. Palle ačas lo pash leste. Oun har o Simon ko baro oun zorelo koova dikas, hoy o Filipo an o Debleskri zoor kras, ačas leske o rakepen krik.

O dourkepaskro Simon

¹⁴ Oun kol Yezouseskre bičepangre an o foro Yerusalem shounan, kay kol menshe an o them Samaria patslo van. Oun yon bičran o Petres oun o Yohannes pash lende.

¹⁵ Kolla van an o them Samaria, oun mangan o Deblestar, te dell lo i patslende o Debleskro Dourho.

¹⁶ Kol patsle his kokres ap o lab maro rayestar Yezous taufedo. O Debleskro Dourho peras gomme gar ap lende.

¹⁷ Koy čivan o Petro oun o Yohanni i vasta ap lende, oun o Debleskro Dourho peras ap lende.

¹⁸ Har o Simon dikas, kay o Debleskro Dourho ap lende vas, har o Yezouseskre bičepangre i vasta ap lende čivan, kamas yob len love te dell,

¹⁹ oun penas ap lende: “Denn man ninna koy zoor, te lell hakeno, koneske me o vast pre čivau, o Debleskro Dourho!”

²⁰ O Petro penas ap leste: “Dja pash o bengeste, tou oun tire love! Tou patseh čačepah, te nay gineh tou i loventsa o Debleskri zoor!

²¹ Kava koova, hoy mer krah, hi o Debleskro koova oun gar tiro koova. Tiro dji hi gar čačo glan o Debleste.

²² Kanna, mouk tiro čilačo drom, oun pen o Debleske, te khaytell tout ko čilačo koova, hoy tou kral. Oun mange lestar, te lell lo koy doosh toutar!

²³ Me dikau, kay hal pherdo čilačo koova, oun ko čilačepen hi o ray pral toute.”

²⁴ Koy penas o Simon ap lende: “Mangenn o Deblestar, te vell kova gar pral mande, hoy t'mer penan!”

²⁵ Har o Petro oun o Yohanni i menshenge penan, hoy o Yezous penas oun kras, djan yon pale an o foro Yerusalem. Ap lengro drom pale van le an boud gaba an ko them Samaria oun sikran kote i menshende o Yezouseskro drom.

O Filipo vell bičedo pash i morsheste dran o them Etiopia

²⁶ O Debleskro bolepaskro penas ap o Filipo: “Ste pre oun dja ap ko drom, kay djal dran Yerusalem tele an ko foro Gaza. Ap ko drom hi gar boud menshe.”

²⁷ Koy stas lo pre oun djas kote. Ap ko drom his ninna i morsh dran o them Etiopia. Ap kava tsiro his i bari rani i rayetsa pral o them Etiopia. Oun ko morsh his i pralstouno an lakro them oun das garda ap lakro tselo bravlepen. Kova vas an o foro Yerusalem, te mangell yob o Debles an.

²⁸ Har yob pale ap o drom his, te djal lo khere, his yob an peskro vourdin beshdo, oun draveras ko liil, kay o Debleskro rakepaskro Yesaya činas.

²⁹ Koy penas o Debleskro Dourho ap o Filipeste: “Dja pash ko vourdin oun ač koy pashel!”

³⁰ Oun o Filipo nashas koy, oun shounas, har kova ko liil draveras, hoy o Debleskro rakepaskro Yesaya činas. Oun o Filipo poučas lestar: “Hayveh tou, hoy tou dravereh?”

³¹ “Na-a,” penas lo, “har nay hayvap, te penell mange kek, hoy koy činlo hi?” Oun yob mangas o Filipes, te vell yob pash leste an o vourdin, te beshell lo pes pash leste.

³² Kol laba, hoy yob draveras, his kolla: Yob his har i bakro, kay djal kote, kay vell lo maredo. Yob kras peskro mouy gar pre har i terno bakro, koleske činenn le i balla tele.

³³ Yon kran leha, har te vals lo či moldo oun rakran gar o čačepen, har anan le les glan i čačepangre. Kek nay rakrell leskre čavendar. Leskro djipen vas kay phoubyatar krik lino.

³⁴ Har ko pralstouno kova draveras, poučas lo o Filipestar: “Konestar rakrell o Debleskro rakepaskro? Rakrell yob pestar? Rakrell yob i vavarestar?”

³⁵ Koy penas o Filipo leske, hoy kol laba kamenn te penell, oun penas leske o lačo lab o Yezousestar.

³⁶ Koy van le pash o pani, oun ko pralstouno penas: “Koy hi pani. Hi mange čomone an o drom čiddo, te moukap man te taufrell?”

³⁷ “Te patseh tou o tselo djiyestar ap o Yezous Kristeste, nay krau me kova,” penas o Filipo. Penas ko pralstuno: “Me patsau, kay hi o Yezous Kristo o Debleskro čavo.”

³⁸ Oun yob penas, te ačell ko vourdin tardo. Oun kol douy, o Filipo oun o pralstouno, djan khetne an o pani, oun o Filipo taufras les.

³⁹ Har yon dran o pani vin djan, las o Debleskro Dourho o Filipes ap yek kopo kote krik. Oun ko pralstouno dikas les bouder gar. Oun yob djas barhteles peskro drom doureder.

⁴⁰ O Filipes hatsan le an o foro Ashdod. Oun yob djas trouyel, oun penas o lačo lab o Yezousestar an kol tsele forya. Oun yaake vas lo an o foro Cesarea.