Bičepangre 6 - O Debleskro Lab 2024 (Sinte-Manouche)

O čingepen mashkral i patslende

¹ An kol divessa, kay i patsle boudeder van, djas i čingepen mashkral i patslende, kay rakran hebretikes, oun kol patslende, kay rakran grichtikes. Mashkral kolla, kay rakran grichtikes, his djouvya, kolengre romma moulo his. Oun kolla lan gar yaake boud rhapaske har kolla, kay rakran hebretikes. Doleske his kolla, kay rakran grichtikes, rhoyedo ap kolende, kay rakran hebretikes.

² Koy dan kol deesh-te-douy Yezouseskre bičepangre kol tsele patslen khetne gole, oun penan: “Hi gar mishto, te das mer o rhapen vin, oun men vals bouder kek tsiro, te penas i menshenge o Debleskro lab.

³ Doleske, mire phrala, rodenn mashkral t'mende efta morshen vin! Kolla hounte venn morsha, kay hi pherdo Debleskro Dourho oun gosvepen. Kolla hounte lenn koy boudi ap pende.

⁴ Mer kamah o Debles an-mangell, oun i menshenge o Debleskro lab te penell.”

⁵ Ko rakepen his i tsele patslenge mishto. Yon rodan o Stefanes vin, koles his i zorelo patsepen oun his i morsh pherdo Debleskro Dourho. Yon rodan ninna vin o Filipo, o Prokoro, o Nikanor, o Timon, o Parmenas oun o Nikolaus. Kova his i gricho dran o foro Antiochia, kay las i biboldengro patsepen an oun patsas kanna ap o Yezouseste.

⁶ Kol morshen anan le pash o Yezouseskre bičepangre. Kolla čivan i vasta ap lende, oun mangan o Debles, te dell lo len zoor oun gosvepen an lengri boudi.

⁷ O Debleskro lab vas boud oun boudeder menshenge penlo, oun boud van patslo. An o foro Yerusalem van ninna boud rashaya patslo.

O Stefano vell stildo

⁸ O Stefano his i morsh pherdo Debleskro lačepen oun Debleskri zoor. Yob kras boud baro oun zorelo koova an o Debleskri zoor mank i biboldende.

⁹ Kote van bibolde pash leste. Kolla van dran boud biboldengre kangria. Yon his Libertarya, morsha dran i forya Kirene oun Alexandria, oun dran i themma Cilicia oun Asia. Oun yon rakran o Stefaneha oun čingran pen leha.

¹⁰ O Debleskro Dourho das les gosvepen, te nay rakras kek lendar leske pale.

¹¹ Palle anan le morshen ap lengri rig. Oun kolla anan rhorhepen ap o Stefaneste pre. Yon penan: “Mer shounam, kay penas yob djoungele laba pral o Moseste oun pral o Debleste.”

¹² Yon kran kol tsele menshen divyo, ninna kol biboldengre phoureden oun čačepangren. Oun yon van ap leste pre, tapran les, oun anan les glan i pralstoune biboldende.

¹³ Kolla, kay rhorhepen ap leste pre anan, kolla penan: “Kava morsh moukell gar tele te rakrell lo djoungele laba pral o Debleskro baro kheer oun pral o Moseskre laba.

¹⁴ Mer shounam, har yob penas: O Yezous dran Nazaret phagell o Debleskro baro kheer tele oun krella, te hounte rikras mer bouder gar ap kova, hoy o Mose menge penas.”

¹⁵ Oun kol tsele pralstoune dikan ap o Stefaneste, har leskro mouy vas yaake har i Debleskro bolepaskro.