Bičepangre 5 - O Debleskro Lab 2024 (Sinte-Manouche)

O Ananias oun i Safira

¹ I morsh, kay kharas Ananias, leskri romni kharas Safira, yon khetne bikran i kotar phoub.

² Oun yob rikras love peske pale. Leskri romni djinas kova. Oun yon anan gar i tsele love glan o Yezouseskre bičepangre.

³ O Petro penas ap o Ananias: “Hoske kral tou o bengeske tiro dji pre? Hoske rhorhral tou o Debleskro Dourhes, oun rikral love touke?

⁴ Tou nay rikrals tiro kotar phoub. Oun har bikral les, nay rikrals kol love ninna. Har nay kral tou savo koova? Tou rhorhral gar i menshen. Tou rhorhral o Debles.”

⁵ Har o Ananias kol laba shounas, peras yob khetne oun meras. Oun i bari traash vas ap kolende, kay shounan kova.

⁶ Koy stan i terne morsha pre, oun čivan pral leste i kotar plarhta, hidjran les vin oun paskran les.

⁷ Pal i tsiro vas leskri romni dren oun djinas gar, hoy koy djas.

⁸ O Petro poučas latar: “Lan t'mer yaake boud love, har t'mer koy kotar phoub bikran?” “Ava, yaake boud love lam,” penas li.

⁹ O Petro penas ap late: “Hoske kran t'mer kova vin, oun rhorhran o Debles? Kol morsha, kay paskran tiro romes, hi glan o voudar tardo, oun hidjrenn ninna tout vin.”

¹⁰ Koy peras li khetne oun meras. Oun har i terne morsha dren van, hatsan le lat moules, hidjran lat vin, oun paskran lat pash lakro romeste.

¹¹ Koy vas i bari traash pral i tsele patslende oun pral kolende, kay shounan kova.

O Debleskri zoor sikrell pes

¹² Oun o Yezouseskre bičepangre kran boud baro oun zorelo koova an o Debleskri zoor ap i menshende. Oun i tsele patsle his an o Salomeskri bari isema an o Debleskro baro kheer khetne.

¹³ Kol vavar, kay gar patsle his, trashan, te beshenn le pen pash lende. Ninna te trashan le lendar, rakran le lendar mishto.

¹⁴ Boud morsha oun djouvya patsan ap o Yezouseste oun van i patslentsa khetne.

¹⁵ Oun i menshe hidjran pengre nasselen ap i dromma, oun čivan len kote ap o čiben. Yon penan penge, te vell o Petro koy pashel oun leskro shatto perell ap lende, venn le sasto.

¹⁶ Ninna dran vavar forya, hoy troul o foro Yerusalem čiddo his, anan yon i nasselen oun kolen, kay an lende benga his. Oun lauter van sasto.

O Yezouseskre bičepangre venna palla lino

¹⁷ Ko baro rashay oun kol Sadducarya, kay pash leste his, kolla zilveran ap o Yezouseskre bičepangre,

¹⁸ oun tapran len, oun vitsran len an o stilepen.

¹⁹ An i rati vas i bolepaskro o Deblestar oun kras kol voudya an o stilepen pre, oun anas len vin, oun penas ap lende:

²⁰ “Djan an o Debleskro baro kheer, oun penenn i menshenge halauter pral o djipen, hoy gar pre-herella.”

²¹ Har yon kova shounan, djan yon taysarlake an o Debleskro baro kheer oun sikran i menshende o Debleskro drom. Ko baro rashay oun kolla, kay pash leste his, dan i pralstoune bibolden khetne gole, ninna i tsele phoureden an o them Israel. Oun yon bičran i klisten an o stilepen, te anenn le len glan lende.

²² Oun har yon an o stilepen djan, his yon bouder gar kote. Oun kol kliste van pale oun penan:

²³ “Ko stilepen his pandlo, oun kol lourde his glan o voudar tardo. Oun har i lourde menge pre pandan, his kek dren.”

²⁴ Har ko pralstouno klisto pral o Debleskro baro kheer oun kol bare rashaya kova shounan, djinan yon gar, hoy te patsenn le, oun poučan pendar har kova doureder djala.

²⁵ Koy vas yek oun penas lenge: “Kol morsha, kay t'mer stildo čivan, hi an o Debleskro baro kheer tardo, oun penenn i menshenge o Debleskro lab.”

²⁶ Koy djas ko pralstouno klisto kol vavar klistentsa an o Debleskro baro kheer, oun lan i Yezouseskre bičepangre vin. Kova kran le kek zoryah. I kliste daran i menshendar, te marenn le len i barrentsa.

²⁷ Oun yon anan len glan kol tsele pralstunende, kay khetne van. Oun o baro rashay penas ap lende:

²⁸ “Mer dam t'men zoreles trad, te rakrenn t'mer či bouder o Yezousestar. Oun kanna vell lestar rakedo an o tselo foro Yerusalem. Oun t'mer penenn, kay mer maram les. Kamenn t'mer, te vell leskro rat pral mende?”

²⁹ O Petro oun i vavar Yezouseskre bičepangre penan: “Mer hounte shounas ap o Debleste boudeder har ap i menshende.

³⁰ Ko Devel mare phourendar moukas o Yezouses i moulendar pre te stell, koles, kay t'mer ap o troushel dan oun maran.

³¹ Koles hadas o Devel oun beshas les ap peskri čači rig, te vell lo ray oun lell i menshen dran o čilačepen oun o merepen vin. Kova kras o Devel, te moukenn i menshe an o them Israel pengro phouro djipen, yaake te nay lell lo lengri doosh lendar krik.

³² Kova dikam mer oun penah nay t'menge, oun o Debleskro Dourho ninna. Koles dell o Devel kolende, kay shounenn ap leste.”

³³ Har yon kova shounan, van yon rhoyemen ap lende, oun kaman len te marell.

³⁴ Mank kol pralstunende his i Farisari, leskro lab his Gamaliel. Yob his i biboldengro čačepaskro oun an-diklo pash i tsele biboldende. Oun kova stas pre oun penas: “Bičrenn len i tikno tsiro vin!”

³⁵ Oun pale penas lo: “Morshale an Israel, denn garda oun dikenn, hoy t'mer kal menshentsa kamenn te krell!

³⁶ Glan i tsiro his i morsh, kova kharas Theudas. Yob patsas pestar, te his lo i baro. Star-sheel morsha his pash leste, kay shounan ap leste. Palle vas lo moulo dino. Oun har yob moulo his, ačan yon gar khetne. Oun kek rakrell bouder lendar.

³⁷ Koy pal vas i morsh dran o them Galilea, kova kharas Youdas. Kova his an ko tsiro har i laba i biboldendar pre činlo van. Kova anas boud menshen ap peskri rig, te krenn le i kourepen i Remaryentsa. Ko Youdas vas ninna moulo dino, oun kolla, kay pash leste his, hi gar bouder koy. Oun kek rakrell bouder lendar.

³⁸ Oun kanna penau me t'menge: Moukenn t'mare vasta kal menshendar! Moukenn len te djal! Te hi ko koova i menshendar, palle ačella ko koova gar.

³⁹ Te hi ko koova o Deblestar, palle nay phagenn les gar. Denn yak, te čingrenn t'mer gar ap o Debleste.” Oun yon shounan ap o Gamaliel.

⁴⁰ Palle dan yon o Yezouseskre bičepangren gole, dan len dava i čoupniyah, oun dan len trad, te rakrenn le bouder gar o Yezousestar. Oun palle moukan le len te djal.

⁴¹ Koy djan yon penge i pralstunendar. Oun yon his barhtelo, te hi le o Debleske yaake boud moldo, te rodas lo len vin, te rhan le dava o Yezouseske.

⁴² Yon moukan gar tele, te penenn le o lačo lab o Yezous Kristestar. Hako dives djan le an o Debleskro baro kheer oun pash i menshende an i khera, oun sikran len o Yezouseskro drom.