Bičepangre 27 - O Debleskro Lab 2024 (Sinte-Manouche)

Ap o drom an o foro Rom

¹ Har kran le vin, te oulerah mer ap o shiffo an o them Italia, dan le o Paules oun vavar stilden an i vasta i baro lourdestar. Leskro lab his Yulio. Kova his i pralstouno pral kol lourdende, kay o baro rayeskre lourde kharedo venna.

² Mer djam ap o shiffo. Kova vas dran o foro Adramitsyon oun ouleras an kol forya, kay pash o pani an o them Asia čiddo hi. Mentsa vas ninna i morsh dran o foro Tessalonika. Leskro lab his Aristarko.

³ O vavar dives vam an o foro Sidon. O Yulio his kamlo ap o Pauleste, oun moukas les pash peskre malende te djal, te venn kolla leske koy.

⁴ Har mer doureder ouleram, phourdas i baro dourho pral o baro pani. Doleske ouleram mer ap koy rig ko themestar Ciprus, kay ko baro dourho gar yaake zoreles phourdas.

⁵ I themma Cilicia oun Pamfilia moukam mer čačes čiddo, oun vam an ko them Lycia an o foro Mira.

⁶ Koy hatsas ko baro lourdo i shiffo, hoy vas dran o foro Alexandria, oun kamas an o them Italia te oulerell. Oun mer djam ap ko shiffo.

⁷ Boud divessa vam gar sik doureder, oun maram men tele, te vas pash ko foro Knidus. O baro dourho phourdas yaake zoreles pral o pani, te nashte djam gar, kay kamam. Yaake ouleram pash o them Kreta, oun doureder troul ko kotar them, kay kharella Salmone.

⁸ Menge his phares, te vas doureder. Palle vam ap i vavar rig, kay kharella Lači platsa. Koy pashel hi o foro Lasea čiddo.

⁹ Har kote vam, nashram boud tsiro. O vend his glan o voudar, oun mer lam daar, te ouleras doureder. Doleske penas o Paulo ap lende:

¹⁰ “Morshale, te oulerah mer ap o pani doureder, dikau me, te vella boud bibarht ap mende. Gar kokres o shiffo nay djal paash oun kova, hoy koy pre hi, djal nashedo. Ninna boud mendar nay tassenn.”

¹¹ Ko baro lourdo shounas boudeder ap koleste, kay oulerell ko shiffo oun ap koleste, kay hi o ray pral ko shiffo, har ap o Pauleste.

¹² Kote, kay maro shiffo čiddo his, his gar mishto, te ačas mer pral o vend. Doleske kaman i boudester morsha doureder te oulerell, te venn yon glan o vend an o foro Fenix. Kava his o feteder foro an o them Kreta, kay yon nay ačans pral o vend.

Ap o divyo pani

¹³ Har i lačo baro dourho phourdas, patsan le, kay ko tsiro vas, te nay oulerams doureder. Oun yon ouleran, yaake neesh har djala, langs ko them Kreta.

¹⁴ Pal i tikno tsiro phourdas o baro dourho zoreles dran i vavar rig. Ko dourho kharella Eurakulon.

¹⁵ Kava zorelo dourho tapras o shiffo, oun mer nay rikram les bouder gar, yaake zorelo his lo. Koy moukam mer o shiffo yaake te djal, har ko baro dourho kova kamas.

¹⁶ Mer ouleram doureder ap o pani pash ko them Kavada, oun mer maram men tele, te nashras gar o tikno bero.

¹⁷ Yon tserdan les pre, oun palle pandan le shelle troul o tselo shiffo, te djal lo gar paash. Halauter daran, te nay oulerals o shiffo ap i barra, kay glan o them Libia tel o pani hi. Doleske vitsran le ko sasterno shello an o pani tele, hoy rikrell o shiffo pale, te djal lo gar yaake sik. Oun yon moukan o shiffo yaake te djal har o baro dourho les pral o pani phourdas.

¹⁸ Ko baro dourho phourdas yaake zoreles, kay vitsran le o vavar dives boud koova an o pani, hoy kaman le an vavar forya te anell.

¹⁹ O triinto dives vitsran yon kova an o pani, hoy ap o shiffo his, te nay oulerell lo.

²⁰ Boud divessa nay dikam o kham oun i bolepangre momlia gar, yaake zorelo phourdas o baro dourho pral o baro pani, oun das zorelo brishin. Koy patsam mer, kay nashrah mer maro djipen.

²¹ Har rhan le i rah tsiro či, djas o Paulo mashkral lende, oun penas: “Morshale, t'mer hounte shounans ap mande, oun ačans an o them Kreta. Yaake vals i tseli bibarht gar pral mende.

²² Kanna penau t'menge: Denn gar pre! Kek t'mendar merella. Kokres kava shiffo djal paash.

²³ Kay rat vas i bolepaskro pash mande. Koles bičras miro Devel, koleske boudrau.

²⁴ Kova penas ap mande: Ma traash, Paulo! Tou hounte vess glan o baro rayeste an o foro Rom anlo. O Devel shounas tout: Kek ap kava shiffo merella.

²⁵ Doleske morshale, ma trashenn! Me patsau o Debles, lauter vell yaake, har yob mange penas.

²⁶ O baro dourho phourdell men ap i tikno kotar them an o baro pani.”

²⁷ Mer hams deesh-te-star divessa ap o baro pani Adria. An koya rat patsan kol boudepangre ap o shiffo, te dikenn le i kotar them.

²⁸ Koy vitsran yon i saster an o pani, hoy ap i shello pandlo hi, te dikenn le, har dour kova tele djala. Kova djas star-deesh metarya dour tele. I kotar doureder kran yon kova pale, oun dikan, kova djas triyanda metarya dour tele.

²⁹ Koy trashan le, te oulerenn le ap i bare barra, hoy tel o pani his. Oun yon vitsran star sasterne shelle, pal o shiffo an o pani, te vell lo gar krik tserdedo. Oun o shiffo ačas kote čiddo, bis te vas o vavar dives.

³⁰ Kol boudepangre ap o shiffo kaman penge čorrhanes mendar te djal, oun penan rhorhenes ap i vavarenge: “Mer moukas ko tikno bero an o pani, te nay vitsras ninna glan o shiffo sasterne shelle an o pani.”

³¹ O Paulo penas ap ko baro lourdeste oun ap kol lourdende: “Te ačenn kolla gar ap o shiffo, ham mer lauter nashedo.”

³² Koy dan i lourde kol shelle tele, oun moukan ko tikno bero an o pani te perell.

³³ Oun har bouder gar yaake tamlo his, penas o Paulo ap lauterende, te rhan yon čomone: “T'mer maran t'men deesh-te-star divessa tele,” penas yob, “oun an ko tselo tsiro rhan t'mer či.

³⁴ Doleske mangau t'men: Rhan kanna čomone! Kova hounte krenn, te ačenn djido. Kek t'mendar nashrell i bal ap o shero.”

³⁵ Oun har yob kova penas, las yob o maro, parkras pes pash o Debleste glan lauterende, phagas o maro, oun rhas.

³⁶ Har yon kova dikan, tapran le nevi zoor oun rhan ninna.

³⁷ Mer hams lauter khetne ap o shiffo douy-sheel-efta-deesh-te-shob (276) morsha.

³⁸ Oun har yon lauter čalo his, vitsran le o tselo djob an o pani, te vell o shiffo bouder gar yaake pharo.

O shiffo djal paash an o pani

³⁹ Har dives vas, dikan kol boudepangre ap o shiffo i kotar them an o pani. Kova prindjran yon gar. Kote dikan le i kotar phoub, kay o shiffo čiddo nay vals. Oun yon penan penge: Te djal kova, djah kote ap o them.

⁴⁰ Oun yon dan kol sasterne shelle tele, oun vitsran len an o pani, oun pandan kol shelle pre, hoy rikran ko kasht, hoy o shiffo ap i čači rig anell. Palle tserdan le ko baro than pre, te phourdell o baro dourho koy dren oun anell len ap o them.

⁴¹ Ap yek kopo ouleran le ap i barra, hoy tel o pani hi. Oun o shiffo his glanstounes zoreles ap i barra beshdo. Oun o zorelo pani kras o palstouno kotar paash.

⁴² Koy kaman i lourde i stilden te marell, te nashell kek peske.

⁴³ Ko baro lourdo kamas gar, te vell o Paulo moulo dino. Yob djas koy mashkral oun penas, te stenn kanna kolla an o pani, kay nay rikrenn pen pral o pani, te venn le vergel ap o them.

⁴⁴ oun te čivenn pen i tsele vavar ap i kashta an o pani, te nay venn le halauter vergel ap o them. Yaake vam mer lauter djido ap o them.