Bičepangre 24 - O Debleskro Lab 2024 (Sinte-Manouche)

O Paulo hi glan i pralstoune biboldende tardo

¹ Pal panč divessa vas ko baro rashay Anania an o foro Cesarea. Khetne leha van i biboldengre phoureder oun ko rakepaskro Tertulo. Yon djan pash o themeskro rayeste, o Felix, te penenn le leske, hoske yon kaman o Paules i phagi te dell.

² Har yon o Paules pash pende gole dan, rakras o Tertulo, te sikrell lo havi doosh o Paulo ap peste anas: “Mer sharah tout, maro lačo oun baro rayes Felix! An tiro gosvepen kral tou, kay nay djivah mer barhteles t'mentsa. Oun tou kral menge ninna boud lačo koova.

³ Doleske parkrah men mer pash toute hako tsiro, kay hal yaake lačo ap mende.

⁴ Me kamau tout gar yaake rah pre te rikrell. Mangau toutar, te less i tikno tsiro, te shouness an tiro baro lačepen ap mande, hoy me kanna kamau touke te penell.

⁵ Mer djinah, kay kava morsh čilačo hi, oun kay yob čingepen krella mashkral kol tsele biboldende, kay ap i tseli phoub djivenna. Yob hi i pralstouno rakepaskro kolendar, kay patsenna ap o Yezous dran Nazaret.

⁶ Yob kamas o Debleskro baro kheer praasedo te krell. Koy pashel tapram les.

⁷ Har kaman les i phagi te dell pal maro čačepen, vas ko pralstouno lourdo, o Lisias, oun tserdas les zoryah dran mare vasta.

⁸ Tou te shouneh, hoy yob penella, palle hayveh tou, kay kova čačo hi, hoy mer pral leste penam.”

⁹ Ninna i vavar bibolde rakran yaake, oun penan, kay kova lauter yaake hi, har o Tertulo penas.

O Paulo vella glan o Felix anlo

¹⁰ Kanna sikras o Felix o vasteha ap o Pauleste, te rakrell yob. Oun o Paulo penas: “Me djinau, kay hal tou, o Felix, boud bersha o čačepaskro ray an kava them. Doleske hi man kek traash, te penap touke, har lauter vas.

¹¹ Hi gar boudeder har deesh-te-douy divessa, kay vom an o foro Yerusalem, te mangap o Debles an. I vavar nay penenn touke, kay kova čačo hi.

¹² Kek dikas, kay čingroms man yekeha an o Debleskro baro kheer. Vitar gar krom i čingepen mashkral i menshende, gar an i biboldengre kangria, vitar gar an kava foro.

¹³ Yon nay sikrenn tout vitar gar, kay kova čačo hi, hoy yon pral mande penan.

¹⁴ Kava penau touke: Hi čačo, kay me djau ap ko nevo drom, hoy hi kolenge i rhorheno drom. Ap kava nevo drom mangau me ko Debles an, koles ninna mire phoure an-mangan. Oun me patsau halauter, hoy o Mose oun o Debleskre rakepangre an pengre lila činan.

¹⁵ Me patsau ninna har yon, kay kolla, kay meran, pale djido venna: kol lače oun kol čilače.

¹⁶ Doleske krau lauter te djivap yaake, te vell man hako tsiro i djoudjo dji glan o Debleste oun glan i menshende.

¹⁷ Boud bersha homs an i vavar themma. Kanna vom pale an o foro Yerusalem, te anap mire menshenge love, hoy vavar dan. Ninna vom, te rhačrap firhen o Debleske an o Debleskro baro kheer.

¹⁸ Har homs an o Debleskro baro kheer oun thovom man pal o biboldengro čačepen, his gar boud menshe pash mande, vitar kek, kay his rhoyedo oun divyo.

¹⁹ Kote dikan man bibolde, kay van dran o them Asia. Kolla hounte vans kanna kate glan toute, te penenn le touke, hoy me krom, te nay anans le doosh ap mande.

²⁰ Tou poučeh nay ninna kal morshendar kate, havi doosh yon ap mande hatsan, har me glan kol pralstoune biboldende tardo homs.

²¹ Yek koova nay anans le ap mande pre. Kova hi ko lab, hoy me glan lende gole dom: Me patsau, kay o Devel i moulen djides krella. Doleske hom kate glan t'mende tardo, te rakrenn t'mer i phagi pral mande vin.”

²² O Felix, kay boud djinas ko nevo dromestar, čivas o tselo koova ap o vavar dives, oun penas: “Te vell ko pralstouno lourdo Lisias pash mende, palle penau me, hoy me krau o Pauleha.”

²³ Oun yob moukas o Paules pale an o stilepen te anell, oun penas ap ko baro lourdeste, te krell yob o Pauleske o djipen gar phares, oun te vell nay hakeno leskre malendar pash leste, te anell lo leske rhapaske.

O Paulo hi glan o Felix oun i Drusilla tardo

²⁴ Divessa koy pre vas o Felix peskri romyah Drusilla. Koya his i biboldetsa. Oun o Felix moukas o Paules glan leste te vell. Oun o Felix oun leskri romni kaman lestar pral o patsepen ap o Yezous Kristeste te shounell.

²⁵ Oun o Paulo penas lenge, te hounte rikrenn le pen ap o Debleskro čačepen, te krenn le kek vi-ladjedo koova, oun te vell ko tsiro, kay hakeno glan o Debleste tardo hounte vell. Oun o Felix las traash, oun penas ap o Pauleste: “Kava kopo nay djah tou. Oun te hi man tsiro, moukau tout pale gole te dell.”

²⁶ Yob patsas, te dell les o Paulo love, te moukell les lo dran o stilepen vin. Doleske moukas yob les boud kope glan peste te vell, oun rakras leha.

²⁷ Har douy bersha trouyel his, vas o Festo Porcio an o foro Cesarea, oun kras kanna koy boudi, hoy o Felix glan leste kras. O Felix kamas čomone te krell, hoy his mishto an i biboldengre yaka. Doleske moukas lo o Paules an o stilepen.