Bičepangre 22 - O Debleskro Lab 2024 (Sinte-Manouche)

O Paulo rakrell ap i menshende

¹ T'mer morsha, phrala oun dada, shounenn, hoy kamau t'menge te penell!

² Har yon shounan, kay rakrell yob hebretikes, dan le bouder gar gole. Oun yob penas:

³ Me hom i biboldo, oun vom boldo an o foro Tarsus, an ko them Cilicia. Baro vom an o foro Yerusalem. Miro sikepaskro his o Gamaliel. Kova sikras mande, te djivap yaake, har mare phoure djivan. Yaake har t'mer pal o Moseskre laba djivenna, djivom me ninna o tselo djiyestar.

⁴ Me lom kolen palla, kay djan ap o nevo drom – me lom len yaake palla, te marom len. Morshen oun djouvyen pandom, oun vitsrom len an o stilepen.

⁵ Ko baro rashay oun kol tsele biboldengre phoureder nay penenn, kay kova čačo hi, hoy penau kate. Har kamom an o foro Damaskus te djal, dan man i rashaya lila peha i biboldenge an o foro, te nay pandap ninna kote kolen, kay djan ap ko nevo drom, te anap len an o foro Yerusalem, te lenn le kote pengri phagi.

O Paulo penell i menshenge, har vas lo patslo ap o Yezouseste

⁶ Yaake djom ap o drom an o foro Damaskus. Har me homs i paash dives glan o foro Damaskus, vas ap yek kopo i bari momeli dran o bolepen troul mande.

⁷ Me perom ap i phoub, oun shounom, har yek ap mande penas: Saulo, Saulo, hoske leh tou man palla?

⁸ Me penom: Koon hal tou, mo ray? Oun yob penas ap mande: Me hom o Yezous dran Nazaret, koles tou palla leh.

⁹ Kolla morsha, kay pash mande his, dikan nay koya momeli. Yon shounan gar kol laba, hoy yob ap mande penas.

¹⁰ Me poučom: Ray, hoy krap? Oun o ray penas ap mande: Ste pre oun dja an ko foro Damaskus! Kote vell touke penlo, hoy tou hounte kress.

¹¹ Koy bari momeli his yaake zorelo, kay kras li man korelo. Oun kolla, kay pash mande his, lan man ap o vast, oun anan man an o foro Damaskus.

¹² Koy his i patslo morsh. Kova kharas Anania. Yob rikras pes ap kova, hoy an o Moseskre lila tardo hi. Kova his an-diklo pash i tsele biboldende, kay kote djivan.

¹³ Kova vas pash mande oun penas: “Miro phraal Saulo, tou dikess pale.” Oun ap yek kopo dikom me pale.

¹⁴ Palle penas lo ap mande: “Ko Devel mare dadendar rodas tout vin, te djiness tou, hoy yob kamella, oun te dikess tou koles, kay hi kek čilačepen an leste, oun shouness, hoy yob penella.

¹⁵ Tou hounte rakress lestar glan i tsele menshende oun peness, hoy tou dikal oun shounal.

¹⁶ Oun kanna ste pre! De leskro lab an-gole! Oun mouk tout te taufrell, oun tiri doosh tele te thovell!”

¹⁷ Har me pale an o foro Yerusalem vom, oun an o Debleskro baro kheer o Debles an-mangom, vas o Debleskro Dourho zoreles ap mande.

¹⁸ Oun me dikom o Yezouses, oun yob rakras ap mande: Dja yaake sik har djala dran o foro Yerusalem. Kal menshe kate patsenn gar, hoy tou pral mande peneh.

¹⁹ Me penom: Ray, yon djinenna, kay me kolen, kay ap toute patsenn, an o stilepen vitsrom, oun me moukom len an i biboldengre kangria i čoupniyah te dell.

²⁰ Me homs barhtelo, har maran le o Stefanes, koles, kay toutar rakras. Me homs pashel tardo, har maran le les. Oun kolla, kay maran les, ap kolengre koola dom yak.

²¹ O ray Yezous penas ap mande: Dja dran o foro Yerusalem vin! Me bičrau tout an i vavar themma pash kolende, kay kek bibolde hi.

O Paulo oun o pralstouno lourdo

²² Har kol tsele menshe o Pauleskre laba shounan, dan le lauter gole: “Anenn les krik oun denn les moulo!”

²³ Yon dan bari gole, tserdan pengre koola i rholyatar pendar tele oun vitsran čik an o bolepen.

²⁴ Koy penas ko baro lourdo, te anenn le o Paules an o lourdengro kheer, oun te denn le les dava i čoupniyah, te penell yob, hoske kol bibolde yaake rhoyemen ap leste hi.

²⁵ Har yon les pandan, te denn le les i čoupniyah, penas o Paulo ap ko baro lourdeste, kay kote pashel tardo hi: “Nay denn t'mer yekes i čoupniyah, kay hi i Remari, oun vas gomme gar glan i čačepangre anlo?”

²⁶ Ko baro lourdo djas pash peskro pralstuneste, oun penas ap leste: “Hoy kameh te krell? Kava morsh hi i Remari.”

²⁷ Koy djas ko pralstouno pash o Pauleste, oun poučas lestar: “Pen mange: Hal tou i Remari?” Penas lo: “Ava!”

²⁸ Koy penas ko pralstuno: “Me dom boud love, te vap i Remari.” Penas o Paulo: “Me vom yaake boldo.”

²⁹ Oun kolla, kay kaman les dava te dell, djan penge sik. Oun ko pralstouno daras, har shounas lo, kay hi o Paulo i Remari, oun te moukas lo i Remares te pandell.

³⁰ O vavar dives kamas o pralstouno lourdo vin te hatsell, havi doosh kol bibolde ap o Pauleste pre anan. Oun yob las les dran o stilepen vin, oun penas, te venn kol bare rashaya oun kol tsele pralstoune bibolde khetne. Oun yob anas o Paules glan lende.