Bičepangre 19 - O Debleskro Lab 2024 (Sinte-Manouche)

An o foro Efesus

¹ Har o Apollo an o foro Korint his, djas o Paulo an i themma Galatia oun Frigia, oun palle vas lo an o foro Efesus. Koy hatsas yob ninna patslen.

² Ap kolende penas yob: “Vas o Debleskro Dourho ap t'mende, har van patslo?” Koy penan yon ap leste: “Mer shounam gar, kay hi o Debleskro Dourho kay.”

³ Oun yob poučas lendar: “Ap hoy han t'mer taufedo?” Penan yon: “Mer vam yaake taufedo, har o Yohanni kova penas.”

⁴ Koy penas lenge o Paulo: “O Yohanni taufras kolen, kay kaman te sikrell, kay moukan le pengro phouro djipen. Oun yob penas i menshenge, te hounte patsenn le ap koleste, kay pal leste vella. Oun kova hi o Yezous.”

⁵ Har kol patsle kova shounan, moukan pen le ap o lab o Yezousestar, maro rayestar, te taufrell.

⁶ Oun o Paulo čivas i vasta ap lende, oun o Debleskro Dourho vas ap lende. Oun yon rakran an vavar rakepen, oun penan kova, hoy o Devel lende sikras.

⁷ Koy his nay deesh-te-douy morsha khetne.

⁸ Triin čon ačas o Paulo kote oun rakras an i biboldengri kangri. Oun les his kek traash oun penas i menshenge i bari zoryah, kay o Devel o Yezous Kristes bičras, te lell lo len dran o čilačepen vin.

⁹ Koy his ninna menshe pashel, kay kaman o Yezousestar či te djinell oun kaman gar ap leste te patsell. Oun glan i menshende rakran le djoungelo koova pral o patsepen ap o Yezouseste. Koy moukas o Paulo kol vavar patslentsa i biboldengri kangri, oun rakras hako dives an ko sikepaskro kheer, kay o Tiranno o sikepaskro hi.

¹⁰ Kova kras yob douy bersha, te shounan i bibolde oun kolla, kay kek bibolde hi, an o them Asia o Debleskro lab.

I patsle rhačrenn i dourkepangre lila

¹¹ Oun o Devel his pash o Pauleste, oun yob nay kras boud baro oun zorelo koova an o Debleskri zoor.

¹² Hi yaake, kay lan i menshe ninna i koola oun menyakre dikle, hoy ap o Pauleste his, oun čivan len ap kol nasslende, oun o nasslepen djas lendar. Oun i benga djan dran i menshende vin, oun yon van sasto.

¹³ Kote his bibolde, kay nashan an o them trouyel, oun tradan i bengen dran i menshende vin. Yon kaman ninna an o Yezouseskro lab kol bengen vin te tradell, oun yon penan ap lende: “Mer penah t'menge an o lab ko Yezousestar, kolestar o Paulo rakrella: Avenn dran ko mensheste vin!”

¹⁴ Kolla, kay kova kran, his i efta čave i biboldestar. Kova kharas Skeva oun his i baro rashay.

¹⁵ Har kaman yon i benges vin tradenn, penas yob ap lende: “O Yezouses prindjrau me, oun o Paulestar shounom ninna. Koon han t'mer?”

¹⁶ Oun ko morsh, kay o beng an leste hi, stas ap lende pre, oun das len yaake dava, kay nashan yon ratles oun nanges dran o kheer.

¹⁷ I menshe, kay an o foro Efesus djivan, shounan kova lauter. Oun i bibolde, ninna kolla, kay kek bibolde hi, lan bari traash. Oun ko lab o ray Yezousestar vas zoreles sharedo.

¹⁸ Van ninna boud kolendar, kay patslo van, oun penan glan i menshende, hoy yon čilačes kran.

¹⁹ Boud dourkepangre lan pengre lila oun rhačran len glan halauterende. Kol lila his nay panč-deesh zerya (50.000) roupene beme moldo.

²⁰ Yaake shounan boud oun boudeder o Yezousestar, maro rayestar. Oun yob kras, te vas peskro lab zorelo mank lende.

O čingepen an o foro Efesus

²¹ Pal kava koova kamas o Paulo pral i themma Macedonia oun Akaya an o foro Yerusalem te djal, oun penas: “Oun pal kova hounte dikap me o foro Rom ninna.”

²² Oun yob bičras douyen, kay boudran leske, o Timotes oun o Erastes, an o them Macedonia. Yob ačas i tsiro an o them Asia.

²³ Ap ko tsiro vas i baro čingepen an o foro Efesus pral o nevo patsepen ap o Yezouseste.

²⁴ Koy his i morsh, kova kharas Demetrio. Kova kras tikne roupene khera, hoy vi-dikan har o kheer, kay mangan i menshe i debletsa an, kay Artemis kharella. O Demetrio anas peske oun peskre boudepangre boud love dren.

²⁵ Oun yob das kol tsele morshen khetne gole, kay kran ninna koy boudi, hoy yob kras oun penas ap lende: “Morshale, t'mer djinenna, kay anell men koy boudi boud love dren.

²⁶ T'mer dikan oun shounan, kay o Paulo i menshenge penella: I devel, kay i vastentsa kerdo vella, hi kek devel. I menshe an o foro Efesus oun an o them Asia shounenn ap o Pauleskro rakepen.

²⁷ Nay vell, te rakrenn le djoungelo koova pral mari boudi. Oun mari debletsa Artemis, oun lakro baro kheer hi lenge bouder či moldo. I menshe bistrenn lakro raylepen, kay vell sharedo an o them Asia oun ap i tseli phoub.”

²⁸ Har yon kova shounan, vas i bari rholi ap lende, oun yon dan gole: “Bari hi i debletsa Artemis an o foro Efesus!”

²⁹ Oun i tsele menshe an kava foro van divyo. Oun yon tapran kol douy morshen, o Gayes oun o Aristarkes, kay van o Pauleha dran o them Macedonia. Oun lauter khetne nashan le an o khelepaskro kheer oun tserdan kol douy morshen zoryah peha.

³⁰ O Paulo kamas pash kol menshende an o khelepaskro kheer te djal. Leskre mala rikran les pale.

³¹ Ninna mank i pralstunende an ko them Asia his morsha, kay ap o Pauleste lačo his. Kolla moukan leske zoreles te penell, te djal yob gar an o khelepaskro kheer.

³² An kava kheer dan halauter gole. Ko yek das kova gole oun ko vavar das vavarčandes gole. Boud djinan gar, hoske van le khetne.

³³ Mashkral lende his menshe, kolla djan pash o Alexandro, oun penan leske, hoske i menshe yaake divyo hi. Oun i bibolde mangan lestar, te rakrell yob ap halauterende. Yob hadas i vasta pre, te sikrell lo len, kay yob kamas te rakrell lentsa.

³⁴ Har yon hayvan, kay o Alexandro i biboldo his, dan yon i rah tsiro yaake gole, har te vell kova dran yek mouy: “Bari hi i debletsa Artemis an o foro Efesus!”

³⁵ Pal kova har o moskro lenge penas, te moukenn le tele, penas yob ap lende: “Morshale an o foro Efesus, hako mensho djinella, kay an maro foro i menshe garda denna ap i bari debletsa Artemis oun ap lakro baro kheer. Oun ninna djinell hakeno, kay peras koy barreskri debletsa, kay koy tardo hi, dran o bolepen tele.

³⁶ Kek nay penella, kay kova gar čačo hi. Kanna ačenn oun moukenn! Ma krenn čomone, hoy khaytell t'men!

³⁷ Hoske anan t'mer kal menshen kate an o khelepaskro kheer? Yon rakran kek djoungele laba pral mari debletsa oun čoran či dran lakro kheer.

³⁸ O Demetrio oun kolla menshe, kay leha khetne boudrenn, yon te trashenn, te lenn le bouder kek love dren, palle nay djan le pash i čačepangre oun moskre. Kolenge nay penenn le lengro koova.

³⁹ T'mer, te hatsenn vavar koova ap kal morshende, palle hounte vell kova vin kerdo ap i tsillo.

⁴⁰ Kava dives kran t'mer i menshen divyo čičeske. Kanna hounte trashas mer, te vell kova glan i čačepangre. Oun mer nay penah lenge či, hoske kram kova.” Oun har yob kova penas, bičras lo len khere.