Bičepangre 17 - O Debleskro Lab 2024 (Sinte-Manouche)

O čingepen an o foro Tessalonika

¹ Oun o Paulo oun o Silas van an i forya Amfipolis oun Apolonia oun djan doureder an o foro Tessalonika. Koy his i biboldengri kangri.

² Har pash o Pauleste kova yaake his, djas lo pash lende dren, oun penas lenge ap triin Debleskre divessa o Debleskro lab.

³ Yob sikras lende, kay an o Debleskro lab činlo hi, har ko baro ray, kay o Deblestar vella, hounte las boud douka ap peste, oun stas i moulendar pre. “Oun me penau t'menge,” penas o Paulo, “kava Yezous, kolestar rakrau, kova hi ko baro ray, kolestar o Devel penas, te vell yob.”

⁴ Mank i biboldende his save, kay patsan kova, hoy o Paulo lenge penas. Oun yon rikran pen ap i rig o Paulestar oun o Silasestar. Ninna boud, boud griche, kay lan o biboldengro patsepen an, patsan kova, hoy o Paulo penas. Mank lende his ninna boud an-dikle djouvya.

⁵ I bibolde, kay gar ap o Yezouseste patsan, zilveran ap o Pauleste oun ap o Silaseste. Oun yon djan ap o drom, rodan čilače morshen, oun lentsa kran le i menshen an ko foro divyo. Oun yon djan pash ko kheer, kay djivas o Yason. Yon patsan, te vans o Paulo oun o Silas pash leste. Oun i bibolde oun i čilače kaman len dran o kheer vin te anell glan i tsele menshende.

⁶ Har yon kol douyen gar hatsan, lan le o Yason oun vavar patslen, oun anan len glan kolende, kay his pralstoune pral ko foro, oun dan gole: “Kalla menshe krenn ap i tseli phoub čingepen. Kalla van kanna ninna kate pash mende,

⁷ oun djivenn pash o Yason. Yon krenn gar, hoy o baro ray an o foro Rom lenge penella, oun penenn: I vavar hi o baro ray. Leskro lab hi Yezous.”

⁸ Har kol menshe oun kol pralstoune pral ko foro kova shounan, van le rhoyedo.

⁹ O Yason oun i vavar patsle hounte dan len love, te moukan le len te djal.

An o foro Berea

¹⁰ An koy rat bičran kol patsle o Paules oun o Silases an o foro Berea. Har yon koy van, djan yon an i biboldengri kangri.

¹¹ I bibolde an o foro Berea shounan feteder ap o Debleskro lab, har kol bibolde an o foro Tessalonika. Yon shounan o Debleskro lab pengro tselo djiyeha, oun rodan hako dives an o Debleskro lab, te djinenn le, te hi kova čačo, hoy o Paulo penas.

¹² Boud lendar van patslo, ninna boud bravele griche, djouvya har morsha.

¹³ Har shounan kol bibolde an o foro Tessalonika, te penas o Paulo ninna i menshenge an o foro Berea o Debleskro lab, van le kote oun kran čingepen. Yon kaman, te venn i menshe rhoyedo ap lende.

¹⁴ Koy bičran kol patsle o Paules sik doureder pash o baro pani. O Silas oun o Timoteo ačan an o foro Berea.

An o foro Athen

¹⁵ Kolla, kay djan o Pauleha, anan les an o foro Athen. Glan kova, har yon khere djan penas o Paulo lenge, te penenn le ap o Silaseste oun ap o Timoteste, te venn yon yaake sik har djala pash leste.

¹⁶ Yaake rah kamas o Paulo an o foro Athen te ačell. Kote dikas lo boud barrengre morshen, djouvyen oun firhen, hoy kran i menshe pengre vastentsa, oun hoy yon an-mangenna. Oun kova doukas les an peskro dji.

¹⁷ Yob rakras an i biboldengri kangri ap i biboldende, oun ninna ap kol grichende, kay lan o biboldengro patsepen an. Oun hako dives rakras lo mashkral an o foro ap kol menshende, kay yob kote dikas.

¹⁸ Mank lende his ninna sikle morsha, kay kharan Stoykarya oun Epikurarya. Kolla čingran leha. Har rakras o Paulo pral o Yezouseste, oun penas, kay kras o Devel o Yezouses i moulendar djido, penan le: “Hoy kamell ko dinelo rakepaskro te penell?” Vavar penan: “Yob rakrell pral vavar deblende, kolen mer gar prindjrah.”

¹⁹ Yon lan o Paules peha, oun anan les ap i platsa, hoy kharella Areopag. Oun yon penan: “Nay peneh tou menge, havo nevo patsepen hi kova, hoy tou peneh kate i menshenge?

²⁰ Kova, hoy tou menge peneh, hi menge nevo. Mer kamah te djinell, hoy hi kova.”

²¹ I tsele menshe an o foro Athen, ninna kol vi-themarya, kay djivenn pash lende, kolen his či vavar an o shero, har te shounenn le i nevo koova, oun te rakrenn le pral kova.

²² Oun o Paulo his mashkral lende ap o Areopag tardo, oun penas: “Morshale an o foro Athen, me dikau, kay hi t'menge t'mare debla boud moldo.

²³ Me djom an t'maro foro trouyel, oun dikom ko koova, hoy t'menge moulno hi, oun hoy t'mer an-mangenna. Oun me hatsom i bar, kay anenn le rhapen i debleske. Ap ko bar hi činlo: Ko debleske, kay prindjrah gar. Oun me penau t'menge: Ko Devel, kones t'mer an-mangenna, ninna te prindjrenn les gar, pral koleste rakrau me kanna.

²⁴ Ko Devel kras o bolepen oun i phoub, oun lauter, hoy koy pre hi. Yob hi o ray pral o bolepen oun i phoub. Yob djivell gar an i Debleskre khera, kay i menshe pengre vastentsa kran.

²⁵ Mer hounte anas les či te rhal oun te piyell. Yob das lauteren o djipen, oun yob dell len lauter kova, hoy len hounte vell djipaske.

²⁶ Ko Devel kras ko yek menshes, o Adames. Kolestar van i tsele menshe an hake themma ap i phoub. Yob das len i tsiro, har rah yon djivenna, oun ninna an havo them yon djivenna.

²⁷ Kova lauter kras o Devel, te rodenn le les, oun te hayvenn le, kay yob kay hi, oun te hatsenn le les. Oun yob hi gar dour hakenestar mendar.

²⁸ An leste djivah mer, oun halauter, hoy mer krah, krah mer an leste. Oun mer ham an leste. Ninna t'mare goseve morsha penan: Mer vah o Deblestar.

²⁹ Mer te vah o Deblestar, palle hi kova dinlepen, te patsenn t'mer, kay hatsenn o Debles an kova, hoy t'mer t'mare vastentsa kran dran sonakay, roup oun barra.

³⁰ An o phouro tsiro djinan i menshe gar, kay kova, hoy yon kran, i doosh his. Oun o Devel das len kek phagi. Kanna penell o Devel, te moukenn i menshe pengro čilačo drom, oun djan ap leskro drom.

³¹ O Devel djinell ko dives, kay rakrell lo o čačepen vin pral i tsele menshende, oun yob djal pal o čačepen. O Devel rodas i morshes vin, te vell yob čačepaskro ray. Koles kras yob i moulendar djido. Yaake sikras o Devel hakeneste, kay yob kava morshes vin rodas.”

³² Har shounan le, kay rakrell o Paulo pral i morsheste, kay moulo his oun pale djido vas, his lenge sapaske. Vavar penan: “Tou te peness menge pral ko koova i vavar kopo boudeder.”

³³ Palle djas peske o Paulo lendar.

³⁴ His morsha koy, kay djan leha oun van patslo. Mashkral lende his ninna o Dionisio, i pralstouno ap o Areopag, oun i djouvel, kay kharas Damaris, oun ninna vavar.