Bičepangre 16 - O Debleskro Lab 2024 (Sinte-Manouche)

O Timoteo djal o Pauleha oun o Silaseha

¹ Yon van ninna an i forya Derbe oun Listra. Koy his i terno patslo morsh. Kova kharas Timoteo. Leskri day his i biboldetsa. Oun yoy his patslo. Leskro dad his kek biboldo.

² O Timoteo his i morsh, pral koleste rakran i patsle mishto an i forya Listra oun Ikonion.

³ Koles kamas o Paulo peha te lell ap o drom. Yob las les oun činas les ap o mass, har kova pash i bibolde hi, te čingrenn i bibolde gar koy pral. I bibolde djinan lauter, kay leskro dad kek biboldo hi.

⁴ An kol forya, kay yon van, dan yon i phralen ko liil, kay dren činlo hi, hoy o Yezouseskre bičepangre oun i phoureder mank i patslende an o foro Yerusalem vin kran. Oun yon penan lenge, te rikrenn le pen ap kol laba.

⁵ Oun i tsele patsle van zorleder an o patsepen, oun hako dives van boudeder patslo.

O Paulo hi an o foro Troas

⁶ O Paulo oun o Silas djan doureder. Oun har o Debleskro Dourho gar kamas, te penan le o Debleskro lab an o them Asia, djan le an i themma Frigia oun Galatia.

⁷ Har yon an o them Misia van, kaman le doureder an o them Bitinia te djal. Oun o Yezouseskro Dourho moukas len gar kote te djal.

⁸ Koy djan le mank o them Misia tele an o foro Troas.

⁹ Koy dikas o Paulo an i souni i morshes dran o them Macedonia. Kova mangas les oun penas: “Am vergel an o them Macedonia, oun pen menge o Debleskro lab!”

¹⁰ Koy pre rodam mer sik i shiffo, kay lell men peha an o them Macedonia. Mer djinam, kay das men o Devel gole, te penas kote i menshenge o lačo lab o Yezous Kristestar.

I Lydia vella patslo

¹¹ Mer ouleram dran o foro Troas krik, oun vam an o foro Samotrake. Ap o vavar dives djam an o foro Neapolis.

¹² Palle ouleram doureder an o foro Filipi. Kova hi i foro an ko them Macedonia. Kote djivan boud Remarya. Mer ačam i tsiro an ko foro.

¹³ Ap o Debleskro dives djam mer vin glan o foro pash o pani. Mer patsam, te venn pash o pani menshe khetne, kay mangenn kote o Debles an. Koy besham men tele, oun rakram kolla djouvyentsa, kay kote van.

¹⁴ Koy his i djouvel, kay mangas kote o Debles an. Yoy his i bikepaskretsa oun bikras ripya dran lolo than. Koya kharas Lydia. Yoy his dran o foro Tiatira. Kolake kras o ray Yezous o dji pre. Oun yoy shounas, hoy o Paulo penas, oun vas patslo.

¹⁵ Oun yoy moukas pes peskre menshentsa te taufrell, oun mangas men zoreles oun penas: “Te patsenn t'mer, kay me ap o rayeste, o Yezouseste patsau, avenn an miro kheer oun ačenn kote!” Oun yoy mangas men o tselo djiyestar, te vas mer an lakro kheer.

O Paulo oun o Silas an o stilepen

¹⁶ Yek dives, har mer djam pale pash o pani, kay yon mangan o Debles an, tapram mer i rakli, an kolate his i beng, kova das lat o dourkepen. Lakro dourkepah anas li lakre rayenge boud love dren.

¹⁷ Koya las o Paules oun men palla, oun das gole: “Kalla morsha boudrenn ko baro Debleske! Kalla sikrenn t'menge o drom pash leste.”

¹⁸ Kova das li gole hako dives. O Paulo vas rhoyedo, oun rissras pes trouyel, oun penas ap ko bengeste, kay hi an late: “Me penau touke an o Yezous Kristeskro lab: Dja dran late vin!” Koy djas o beng dran kay rakli vin.

¹⁹ Har lakre raya dikan, kay nashte anas yoy lenge bouder kek love, van le čilačo, oun tapran o Paules oun o Silases. Oun yon anan len an o foro glan i pralstunende.

²⁰ I pralstoune anan i čačepangren an ko foro khetne, oun penan: “Kalla anenn čingepen an maro foro. Yon hi bibolde,

²¹ oun penenn menge, te rikras ap save laba, hoy mer nay krah gar. Mer ham Remarya.”

²² Boud menshe, kay his koy, van čilačo ap o Pauleste oun ap o Silaseste. Oun kol čačepangre moukan lenge i koola tele te tserdell, oun penan, te denn le len i kashtentsa.

²³ Pal kova har yon len zoreles dava dan, vitsran le len an o stilepen, oun penan ap o rayeste pral o stilepen: “De mishto yak ap lende!”

²⁴ Har yon kova ap leste penan, vitsras yob len an o palstouno stilepen, oun čivas lengre pire an o kasht, oun pandas len.

²⁵ Deesh-te-douyenge an i rat sharan o Paulo oun o Silas o Debles, oun givan leske i gili. Oun kol vavar stilde shounan kova, har yon givan.

²⁶ Ap yek kopo trissas i phoub, oun ko kheer, kay o stilepen his, peras khetne. I voudya stan pre, oun ap i stilde peran i sasterne shelle tele.

²⁷ Har o ray pral o stilepen pre djangras oun dikas, kay kol voudya an o stilepen pre his, patsas lo, kay kol stilde nashan penge. Koy las yob peskro rharo, oun kamas pes te marell.

²⁸ Koy das o Paulo zoreles gole: “Ma mare tout! Mer ham lauter kate!”

²⁹ Oun o ray pral o stilepen mangas i momeli, oun djas sik pash i stilde. Yob trissas oun moukas pes glan o Pauleste oun o Silaseste tele te perell.

³⁰ Oun yob anas len vin, oun penas ap lende: “T'mer raya, hoy krap, te lap o Debleskro djipen?”

³¹ Penan le ap leste: “Pats ap o rayeste, o Yezouseste! Yaake leh tou oun tire menshe o Debleskro djipen.”

³² Oun o Paulo oun o Silas penan leske, oun kol tsele vavarenge an leskro kheer, o Debleskro lab.

³³ An koy rati thovas o ray pral o stilepen lengro rat tele, oun moukas pes oun peskre tsele menshen te taufrell.

³⁴ Yob las len dren an peskro kheer, das len te rhal oun te piyell, oun his barhtelo peskre tsele menshentsa, kay van yon patslo ap o Debleste.

³⁵ Har dives vas, bičran kol čačepangre pengre klisten pash o rayeste pral o stilepen oun penan leske, te moukell lo o Paules oun o Silases te djal.

³⁶ Kova vas pash o Pauleste oun penas leske: “I čačepangre bičran man, te penap t'menge, te han t'mer gar bouder stildo. Avenn vin oun djan t'maro drom. Kek krell t'menge čilačepen!”

³⁷ O Paulo penas ap kol klistende: “Mer ham Remarya. T'mare pralstoune moukan men dava te dell glan i tsele menshende. Yon rakran kek čačepen pral mende vin, oun vitsran men an o stilepen. Oun kanna kamenn yon men čorrhanes dran o stilepen vin te anell. Yaake djal kova gar, har yon kamenna. Kolla čačepangre, kay kran kova, kolla hounte venna pash mende oun hounte anenn men dran o stilepen vin. Kova penenn lenge!”

³⁸ Kol kliste penan kova i čačepangre morshenge. Har kolla shounan, kay o Paulo oun o Silas Remarya hi, lan yon traash,

³⁹ oun djan pash lende, mangan pen tele glan lende, anan len dran o stilepen vin, oun mangan len, te djan le dran o foro vin.

⁴⁰ Oun o Paulo oun o Silas djan pale an o kheer, kay i Lydia djivell. Oun har yon kote pengre phralen dikan, penan yon lenge: “Ma darenn! Ačenn o Debleha!” Palle djan yon dran ko foro vin.