Bičepangre 15 - O Debleskro Lab 2024 (Sinte-Manouche)

O patslengro tsillo an o foro Yerusalem

¹ Koy van morsha dran o them Youdea an o foro Antiochia tele, oun penan kol patslenge, kay kek bibolde hi: “T'mer hounte moukenn t'men ap o mass te činell, har o Mose kova an peskre lila činas. Te moukenn t'men gar ap o mass te činell, palle nay venn t'mer gar o Debleskre čave.”

² Har o Paulo oun o Barnabas kova shounan, penan le kol morshenge: “Hi gar čačo, hoy t'mer i patslenge penan!” Koy his len i baro čingepen lentsa. Koy pre penan lenge i phrala, te djan yon douy i vavar phralentsa an o foro Yerusalem pash o Yezouseskre bičepangre oun pash i phoureder mank i patslende, te poučenn le lendar, hoy yon pral kova penenna.

³ Oun i phrala penan ap o Pauleste oun ap o Barnabeste: “Djan o Debleha!” Oun kol douy kran pen ap o drom oun van an i themma Fenicia oun Samaria. Oun kote penan le i menshenge, har kolla, kay kek bibolde hi, patslo van. Koy pral van i tsele patsle barhtelo.

⁴ Palle vas o Paulo oun o Barnabas pash i patslende an o foro Yerusalem. Oun i phoureder oun o Yezouseskre bičepangre his ninna kote, oun lan len o djiyestar pash pende pre. Oun o Paulo oun o Barnabas penan lenge, kay o Devel lentsa his, oun har boud koova yob mashkral kolende kras, hoy kek bibolde hi.

⁵ His Farisarya koy, kay ap o Yezouseste patslo van. Kolla penan ap i phralende: “Kolla, kay kek bibolde hi, hounte venn ap o mass činlo, oun lenge hounte vell penlo, te rikrenn le pen ap o Moseskre laba.”

⁶ Oun i Yezouseskre bičepangre oun i phoureder mank i patslende van khetne, te rakrenn le pral ko koova.

⁷ Har yon pen i rah tsiro čingran, stas o Petro pre, oun penas: “Mire phrala, t'mer djinenna, kay o Devel rodas man glan rah tsiro vin, oun kamas, te penap me o lačo lab o Yezous Kristestar kolenge, kay kek bibolde hi. Oun kolla shounan oun patsan.

⁸ O Devel, kay prindjrell i menshengre djia, sikras mende, kay das yob ninna kolen o Debleskro Dourho, kay kek bibolde hi.

⁹ Leske hi yon gar vavarčandes har mer, i bibolde. Yon te patsenn ap leste, palle krell lo lengro dji djoudjo.

¹⁰ Kamenn t'mer, te vell o Devel rhoyedo ap t'mende? Ma čivenn pharo koova ap lende, kay nay hidjran mare phoure gar, oun mer vitar gar!

¹¹ Mer patsah, te dell men maro ray Yezous ko djipen, hoy gar pre-herella čičeske, – kokres dran leskro lačepen. Ninna kolen, kay kek bibolde hi, dell lo kava djipen čičeske, – kokres dran leskro lačepen.”

¹² Koy čingran kol tsele menshe bouder gar lentsa, oun shounan ap o Pauleste oun o Barnabeste, har kolla lenge penan, havo baro oun zorelo koova o Devel mashkral kolende kras, kay kek bibolde hi.

¹³ Pal lengro rakepen stas o Yakobo pre, oun penas: “Mire phrala, shounenn, hoy kamau te penap!

¹⁴ O Simon ginas menge dren, hoy o Devel lauter kras, te venn ninna kolla, kay kek bibolde hi, leskre menshe, oun te venn le leske koy.

¹⁵ Kova hi ninna an o Debleskro lab činlo: O Devel penas:

¹⁶ Pal kova vau me pale pash t'mende, te krap o Davideskro kheer pale neves, kova, hoy khetne peras.

¹⁷ Kova krau, te poučenn lauter, kay pral ačan, pal mande. Ninna kolla, kay kek bibolde hi, denn man an-gole. Oun yon venn miro, oun venn mange koy.

¹⁸ O Devel krell kova kanna, hoy yob glan i rah tsiro penas.”

¹⁹ “Doleske penau me” penas o Yakobo, “mer hounte čivas gar o biboldengro čačepen ap i patslende, kay kek bibolde hi, te krenn le lauter yaake, har i bibolde krenna.

²⁰ Mer činah lenge i liil, oun penah lenge, te rhan le kek mass, hoy vas glan i figura anlo, hoy i menshe an-mangenn, har te vals li o Devel; te sovenn i morsha gar vavar djouvyentsa, vitar gar i djouvya vavar morshentsa; te rhan le kek mass i firhendar, kay o rat gar vin nashas, te piyenn le lendar vitar kek rat.

²¹ Kova, hoy o Mose penas, kova vell i menshenge an hake forya penlo. Hako Debleskro dives venn o Moseskre laba an i biboldengre kangria glan-dravedo.”

I liil ap kol patslende, kay kek bibolde hi

²² O Yezouseskre bičepangre oun i phoureder mank i patslende, khetne i tsele patslentsa rodan morshen mashkral i patslende vin, te djan yon o Pauleha oun o Barnabeha an o foro Antiochia. Kol morsha his o Youdas, koles his ninna ko lab Barsabas, oun o Silas. Kolla his pralstoune morsha mashkral kol patslende.

²³ An ko liil, hoy yon peha lan, his činlo: “Kava liil činan o Yezouseskre bičepangre oun i phoureder mank i patslende. Mer ham t'mare phrala oun činah kava liil ap i patslende, kay kek bibolde hi, oun kay djivenna an kol themma Antiochia, Syria oun Cilicia.

²⁴ Mer shounam, te van menshe mendar pash t'mende, oun kran t'men dineles, yaake te lan t'mer traash. Djinenn, kolen bičram mer gar pash t'mende.

²⁵ Doleske vam mer khetne, oun penam yek djiyeha: Mer rodah morshen vin, oun bičrah len pash t'mende. Lentsa venn ninna mare lače phrala, o Paulo oun o Barnabas.

²⁶ Kolla hi morsha, kay boudrenna maro rayeske, o Yezous Kristeske, oun lengri boudi leske hi lenge boudeder moldo har lengro djipen.

²⁷ Kol douy morshen, kay bičram kanna pash t'mende, o Youdas oun o Silas, kolla penenn t'menge kol emlige laba, hoy mer činam:

²⁸ O Debleskro Dourho oun mer kamah gar t'maro djipen phares te krell. Mer penah t'menge či vavar har kava:

²⁹ Rhan kek mass, hoy vas glan i figura anlo, hoy i menshe an-mangenn, har te vals li o Devel. Piyenn kek rat! Rhan kek mass i firhestar, kay o rat gar vin nashas! I morshenge penah, te sovenn le gar vavar djouvyentsa. Oun i djouvyenge penah, te sovenn le gar vavar morshentsa. Te rikrenn t'men ap kova, hi kova mishto. Ačenn o Debleha!”

³⁰ Koy djan le an o foro Antiochia, lan i patslen khetne, oun dan len ko liil.

³¹ Har kolla ko liil draveran, van yon lauter barhtelo pral kol laba.

³² O Youdas oun o Silas his o Debleskre rakepangre. Yon rakran kol patslentsa, oun mangan len, te ačenn le an o patsepen. Oun lengre labentsa dan yon len zoor, te djan yon doureder ap o Yezouseskro drom.

^33-34 Oun har yon i tsiro an o foro Antiochia his, moukan kol patsle len te djal. Oun yon djan pale an o foro Yerusalem pash kolende, kay bičran len.

³⁵ O Paulo oun o Barnabas ačan an o foro Antiochia. Oun yon khetne boud vavarentsa sikran i menshende o Yezouseskro drom, oun penan lenge, hoy o ray Yezous lenge penas oun kras.

O Paulo čingrell pes o Barnabeha

³⁶ Pal yek tsiro penas o Paulo ap o Barnabeste: “Djas pale pale an kol tsele forya, kay mer o Debleskro lab i menshenge penam! Dikas pal mare phralende an i vavar themma, har lenge djala!”

³⁷ O Barnabas kamas ninna o Yohanni Markes peha te lell.

³⁸ O Paulo penas ap o Barnabeste: “Kova hi gar mishto, te las o Markes peha. Yob moukas men an o them Pamfilia kokres, djas peske, oun boudras gar mentsa.”

³⁹ Oun kote čingran pen o Paulo oun o Barnabas pral o Markeste yaake, kay djas hakeno peskro drom. O Barnabas las o Markes peha, oun yon ouleran ap o shiffo an o them Ciprus.

⁴⁰ O Paulo rodas peske o Silases vin, oun djas peske leha. Oun kol patsle penan lenge: “O Devel djal t'mentsa!”

⁴¹ Oun o Paulo oun o Silas djan an i themma Syria oun Cilicia, oun yon dan i tsele patslen zoor an o patsepen.