Bičepangre 12 - O Debleskro Lab 2024 (Sinte-Manouche)

O Yakobo vell maredo, oun o Petro vell stildo

¹ An ko tsiro moukas o baro ray Herodes i patslen te stilell, oun moukas len dava te dell.

² Yob maras o Yohanneskro phrales, o Yakobes, o rhareha.

³ Har o Herodes hayvas, kay kova mishto his an i biboldengre yaka, moukas yob ninna o Petres te taprell. Kova his an ko tsiro, kay rhan i bibolde kek shoutlo maro.

⁴ Har yon les tapran, vitsran le les an o stilepen. Oun o Herodes penas, te denn star kope star lourde yak ap leste. Star lourde dan i paash dives yak ap leste. Oun pal i paash dives dan vavar star lourde yak ap leste. Oun ninna yaake djas kova ratsyakro. Pal kol divessa, kay Passa kharenna, kamas o Herodes les glan i menshende te anell, te dell lo les glan lende i phagi.

⁵ Har o Petro an o stilepen his, mangan i tsele patsle pengro tselo djiyeha o Debles leske ap i rati oun ap o dives.

O Petro vella dran o stilepen vin

⁶ An i rat glan ko dives, kay kamas o Herodes les vin anell, te dell lo les i phagi, sovas o Petro mashkral douy lourdende. Yob his pandlo douy sasterne shellentsa, oun douy lourde dan yak glan o voudar.

⁷ Ap yek kopo his an ko stilepen i zoreli momeli, oun o Debleskro bolepaskro his koy tardo, oun das o Petres an i rig, djangras les pre, oun penas: “Ste sik pre!” Oun kol sasterne shelle peran leskre vastendar tele.

⁸ Oun ko bolepaskro penas ap leste: “Čip tiri dori troul tiro ripen, oun rib tire kirrha, oun čip tiri plaashka troul toute, oun am mantsa!” Oun yob kras kova.

⁹ Oun o Petro djas leha dran o stilepen vin. Yob djinas gar, kay kova lauter čačepen hi. Yob patsas, te dell lo souni.

¹⁰ Douy kope djan le pash kol lourdende pashel, kay yak dan. Oun kolla dikan len gar. Oun yaake van yon pash i baro sasterno voudar. Kova his ko voudar, hoy djas an o foro. Ko voudar djas kokres pre. Yon djan vin, oun van ap o drom. Har djan le i kotar drom, his ap yek kopo ko bolepaskro gar bouder koy.

¹¹ Kanna djinas o Petro, kay kova kek souni his, oun yob penas: “Kanna djinau čačepah, kay bičras o ray Yezous peskro bolepaskres mange. Oun kova las man dran o Herodeskre vasta vin, ninna dran halauter, hoy kaman i bibolde mantsa te krell.”

¹² Har kova an leskro shero vas, djas yob pash i Mariakro kheer. Lakro čavo his o Yohanni, kay ninna Marko kharedo vella. Kote his boud patsle khetne oun mangan o Debles.

¹³ O Petro das o vasteha ap o voudar, oun i boudepaskretsa vas. Lakro lab his Roda. Yoy kamas te shounell, koon koy hi.

¹⁴ Oun har yoy shounas, kay kova o Petro hi, kras li i barhtyatar o voudar gar pre, nashas pale oun penas: “O Petro hi glan o voudar tardo.”

¹⁵ Koy penan yon ap late: “Hal tou dinelo?” Yoy ačas koy pashel, kay kova yaake hi. Koy penan yon: “Kova hi o bolepaskro, kay dell yak ap leste.”

¹⁶ O Petro moukas gar tele, te dell lo ap o voudar. Har yon kanna pre kran, dikan yon les. Koy ačas lenge o mouy pre.

¹⁷ I vastentsa sikras lo len, te denn le kek gole, oun penas lenge, har o ray Yezous les dran o stilepen vin las. Oun ninna penas o Petro lenge: “Penenn kova o Yakobeske, oun kol vavar phralenge!” Palle djas yob vin, oun djas peske an i vavar foro.

¹⁸ Taysarlake dikan i lourde, kay his o Petro bouder gar an o stilepen oun poučan pendar, hoy leha djas. Oun i bari daar vas ap lende.

¹⁹ Har o Herodes penas, te vell o Petro vin anlo, oun yob bouder gar koy his, moukas lo les te rodell. Oun yon hatsan les gar. Koy poučas lo i lourdendar, kay dan yak glan o voudar, har vas nay o Petro vin. Oun palle moukas yob kolen te marell. Palle djas o Herodes dran o them Youdea, oun vas an o foro Cesarea, oun ačas i tsiro kote.

O Herodes merella

²⁰ O Herodes vas rhoyemen ap i menshende an i forya Tirus oun Sidon. Kolla lan pengro rhapen dran o Herodeskro them. Doleske bičran le khetne morshen pash leste, te vell lo pale lačo lenge. Kolla rakran koleha, kay das yak ap o Herodeskro kheer, leskro lab his Blasto, oun penan leske, te kamenn le bouder kek čingepen, oun mangan lestar, te penell yob kova o Herodeske.

²¹ I dives vas vin kerdo, kay kamas o Herodes lentsa te rakrell. Ap ko dives rivas o Herodes peskre rayengre koola an, beshas pes ap peskro raylo beshepaskro, oun rakras i baro rakepen.

²² Kol menshe dan gole: “Yaake rakrell kek mensho. Yaake rakrell i devel!”

²³ Yaake moukas pes o Herodes i menshendar te sharell, har te vals yob o Devel. Oun har yob kova kras, das les o Debleskro bolepaskro i nasslepen, te rhan i kirme les pre, oun yob meras.

²⁴ An boud gaba oun forya vas o Debleskro lab penlo. Oun boudeder oun boudeder menshe patsan ap o ray Yezouseste.

²⁵ O Barnabas oun o Saulo anan kol love i patslenge an o foro Yerusalem. Palle van le pale an o foro Antiochia. Lentsa djas o Yohanni Marko.