Bičepangre 11 - O Debleskro Lab 2024 (Sinte-Manouche)

O Petro rakrell i patsle biboldentsa an o foro Yerusalem

¹ Kol Yezouseskre bičepangre oun kol vavar patsle an o them Youdea shounan, kay ninna kolla, kay kek bibolde hi, ap o Debleskro lab patsan.

² Har o Petro an o foro Yerusalem vas, čingran kol patsle bibolde leha.

³ Oun yon penan ap leste: “Tou djal pash kolende, kay hi gar bibolde, oun rhal lentsa.”

⁴ Koy penas o Petro lenge, yek pal o vavar, hoy koy djas:

⁵ “Me homs an o foro Yoppe,” penas yob, “oun mangom o Debles an. Koy moukas o Devel man čomone te dikell. Me dikom čomone har i bari plarhta. Koya vas ap star rigya rikedo, oun vas tele dran o bolepen pash mande.

⁶ Har me dren dikom, dikom me boud firhe: star-heryengre firhe, sapa oun čirkle.

⁷ Oun yek rakras ap mande: Petro, mare len oun rha len!

⁸ Penom me: Na-a, ray! An miro tselo djipen rhom me či, hoy hi pale-čiddo.

⁹ Ko rakepen dran o bolepen penas pale: Ma kre pale-čiddo, hoy o Devel erligo kras!

¹⁰ Kova djas triin kope. Oun halauter djas pale an o bolepen.

¹¹ Ap yek kopo his triin morsha tardo glan ko kheer, kay djivom. Kolla van dran o foro Cesarea pash mande.

¹² Oun o Debleskro Dourho penas ap mande: Pats, hoy yon touke penenna! Dja lentsa! Oun me djom shob phralentsa an o kheer ko morshestar, kay kol triin morshen pash mande bičras.

¹³ Kova penas menge, har dikas yob i bolepaskres an peskro kheer, oun kay kova ap leste penas: Biče morshen an o foro Yoppe, te lenn le o Simones. Yob kharella ninna Petro.

¹⁴ Kova penell touke, har leh tou oun i menshe an tiro kheer o Debleskro djipen.

¹⁵ Har me, o Petro, lentsa rakrom, peras o Debleskro Dourho ap lende. Kova his yaake har pash mende an o foro Yerusalem, har o Debleskro Dourho ap mende peras.

¹⁶ Koy djan kol laba an miro shero trouyel, hoy menge maro ray Yezous penas: O Yohanni čivas i menshen an o pani. Ap t'mende čivell o Devel peskro Debleskro Dourho.

¹⁷ Me dikom, o Devel das lende ninna peskro Dourho, yaake har yob mende das, har mer patsam ap o rayeste, o Yezous Kristeste. Koon hom me, te rikrap me o Debles pre?”

¹⁸ Har yon kova shounan, čingran le bouder gar ap o Petreste. Yon sharan o Debles oun penan: “O Devel sikras ninna kolende peskro drom an o nevo djipen, kay hi kek bibolde. Yon nay moukenn pengro čilačo drom oun venn ap o Debleskro drom.”

I patsle an o foro Antiochia

¹⁹ An ko tsiro, kay o Stefano maredo vas, van i patsle palla lino. Kolla nashan dran o foro Yerusalem, oun djan an i themma Fenicia oun Ciprus, oun an o foro Antiochia. Oun yon penan kote kokres i biboldenge o Debleskro lab, oun kek vavarenge.

²⁰ Mashkral kol patslende his ninna morsha dran Ciprus oun Kirene. Kolla van an o foro Antiochia, oun penan ninna kolenge, kay kek bibolde hi, o lačo lab o ray Yezousestar.

²¹ Oun o rayeskri zoor his lentsa. Oun boud kolendar, kay kek bibolde hi, van patslo, oun van ap o Yezouseskro drom.

²² Oun i patsle an o foro Yerusalem shounan kova, oun bičran o Barnabes an o foro Antiochia.

²³ Har yob koy his oun dikas, hoy o Devel an peskro baro lačepen kote lauter kras, vas lo barhtelo oun mangas len, te ačenn le pengro tselo djiyeha pash o Yezouseste.

²⁴ O Barnabas his i lačo morsh. Yob his pherdo Debleskro Dourho. Oun les his i baro patsepen. Oun boud van patslo ap o ray Yezouseste.

²⁵ Oun o Barnabas djas an o foro Tarsus, te rodell lo o Saules.

²⁶ Har o Barnabas les hatsas, anas lo les an o foro Antiochia. Oun kol douy ačan i tselo bersh kote pash i patslende, oun penan boud menshenge o Debleskro lab. Kote dan yon i patslen ko lab Kriste.

²⁷ An kol divessa van Debleskre rakepangre dran o Yerusalem an o foro Antiochia.

²⁸ Yek lendar his o Agabo. Yob stas mashkral i patslende pre, oun penas glan-vi, hoy o Debleskro Dourho leske penas, te vell i bari bok pral i tseli phoub. Oun har o Klaudio o baro ray an o foro Rom his, vas kova yaake.

²⁹ Koy penan kol patsle an o foro Antiochia: “Mer dah mare phralen an o them Youdea yaake boud love, har hakeno nay della.”

³⁰ Oun yon dan o Barnabes oun o Saules kol love, te denn yon kol love kolende, kay hi i phoureder mank i patslende an o them Youdea.