Bičepangre 10 - O Debleskro Lab 2024 (Sinte-Manouche)

O Petro oun o Kornelio

¹ An o foro Cesarea djivas i morsh, ko kharas Kornelio. Kova his i Remaryengro pralstouno pral sheel lourdende. Kolen kharan le i lourde dran Italia.

² Kova his i lačo morsh oun patsas ap o Debleste peskre tsele menshentsa. Yob das boud i čorvelende, oun mangas o Debles hako dives an.

³ His i dives. His trinenge. Koy dikas ko morsh i Debleskro bolepaskres, har kova pash leste dren vas. Ko bolepaskro penas ap leste: “Kornelio!”

⁴ Koles his daar, har yob dikas les, oun penas ap leste: “Hoy kameh tou mandar, ray?” Oun kova penas ap leste: “O Devel shounas, har tou les an-mangal. Oun yob dikas ko lačepen, hoy tou kral i čorvelenge. Oun yob bistras kova gar.

⁵ Biče kanna morshen an o foro Yoppe, te anenn le o Simones pash toute. Kova kharella ninna Petro.

⁶ Yob hi an o kheer, kay ko Simon djivella, kay boudrell i firhengri mortsi. Leskro kheer hi pash o baro pani čiddo.”

⁷ Har o bolepaskro peske djas, kharas o Kornelio douy boudepangren oun i patslo lourdes pash peste kolendar, kay his hako tsiro pash leste.

⁸ Kolenge penas yob lauter, hoy o bolepaskro penas, oun bičras len an o foro Yoppe.

⁹ O vavar dives, har yon pash o foro Yoppe van, djas o Petro ap o kheer pral pre, te mangell lo o Debles an. His rhapaskro tsiro.

¹⁰ Koy las yob bok oun kamas te rhal. Har kran le leske i rhapen, moukas o Devel les čomone te dikell.

¹¹ Yob dikas, har o bolepen pre djas oun čomone pral tele vas ap i phoub. Kova his har i bari plarhta. Koya vas ap hake star rigya rikedo.

¹² Koy dren his boud firhe: firhe star heryentsa, sapa, oun čirkle.

¹³ Oun o Petro shounas, har yek penas: “Petro, ste pre, kre len moulo oun rha!”

¹⁴ O Petro penas: “Na-a, miro ray! An miro tselo djipen rhom me či, hoy pale-čiddo hi.”

¹⁵ Oun yob shounas i douyto kopo, har yek leha rakras oun penas: “Ma kre pale-čiddo, hoy o Devel erligo kras!”

¹⁶ Kova djas triin kope yaake. Palle djas koy plarhta pale an o bolepen.

O Petro djal an i pale-čiddo kheer

¹⁷ O Petro hayvas gar, hoske yob kova dikas, oun poučas pestar, hoy kamas o Devel leske te penell. Koy his i morsha, kay o Kornelio pal o Simoneskro kheer bičras, glan o voudar tardo.

¹⁸ Yon dan gole oun poučan: “Hi o Simon Petro pash t'mende?”

¹⁹ Har djas o Petreske kova an o shero trouyel, hoy yob dikas, koy penas o Debleskro Dourho ap leste: “Dik, triin morsha rodenn tout.

²⁰ Ste pre, dja tele, oun dja lentsa! Pats, hoy yon touke penenn! Me bičrom len.”

²¹ Koy djas o Petro tele pash lende oun penas: “Me hom kova, kay t'mer rodenna. Hoske han t'mer kay?”

²² Penan le: “O Kornelio, ko pralstouno i lourdendar, bičras men. Kova hi i lačo morsh, oun patsell ap o Debleste. I tsele bibolde rakrenn lačes pral leste. I Debleskro bolepaskro penas ap leste, te lell yob tout an peskro kheer, oun te shounell yob, hoy tou leske kameh te penell.”

²³ Oun o Petro moukas len an o kheer te vell, oun das len i isema, te ačenn le kote. O vavar dives djas yob lentsa an o foro Cesarea. Oun vavar patsle dran o foro Yoppe djan ninna leha.

²⁴ O dives koy pre vas yob an o foro Cesarea. Kote his o Kornelio peskre menshentsa oun malentsa khetne. Yob das len gole, te shounenn le halauter, hoy o Petro lenge penella.

²⁵ Oun har o Petro dren vas, djas o Kornelio pash leste, vitsras pes glan leskre pire tele, oun mangas les an.

²⁶ O Petro hadas les pre oun penas: “Ste pre! Me hom i mensho har tou.”

²⁷ Oun har yon yaake rakran, djan yon an o kheer, oun hatsan boud menshen kote, kay khetne van.

²⁸ Oun o Petro penas ap lende: “T'mer djinenna, te hi kova i biboldeske pale-čiddo, te djal lo an o kheer dren, hoy gar i biboldeskro hi. Oun kek vi-themari vell pash i biboldeste an o kheer dren. Mande sikras o Devel, te rikrap kekes pale-čiddo.

²⁹ Doleske rikrom man gar pale, te vap pash t'mende, har t'mer man kharan. Me poučau t'mendar kanna, hoy kamenn mandar.”

³⁰ Koy penas o Kornelio: “Glan star divessa, his trinenge, mangom o Debles an miro kheer an. Koy his ap yek kopo i morsh glan mande tardo. Koleskre koola his biyalo.

³¹ Oun yob penas ap mande: Kornelio, o Devel shounas tout, oun hoy tou dal kol čorvelende, dikas o Devel ninna.

³² Kanna biče morshen an o foro Yoppe, te anenn le o Petres pash toute. Kova hi an o kheer, kay ko Simon djivella, kay boudrell i firhengri mortsi. Leskro kheer hi pash o baro pani čiddo.

³³ Oun me bičrom morshen pash toute. Oun kova his mishto, kay tou val. Kanna ham mer lauter glan o Debleste khetne, te shounas lauter, hoy o Devel, maro ray, touke penas.”

O Debleskro Dourho vella ap kolende, kay kek bibolde hi

^34-35 Oun o Petro penas: “Kanna hayvau me čačepah: O Devel dikell gar koy pre, have menshendar yek vella: te vell lo i biboldendar, – te vell lo kolendar, kay kek bibolde hi. Yob dikell lačes ap hakeneste, kay trashell lestar, oun kay krell o čačepen.

³⁶ Yob moukas i biboldenge o lačo lab te penell, te hi o Yezous Kristo kova, kay anell len pash o Debleste. Yob hi gar lengro ray kokres, na-a, yob hi o ray pral halauter.

³⁷ T'mer djinenna, hoy djas an o them Galilea, oun palle an o tselo them Youdea pal ko tsiro, har kharas o Yohanni i menshen, te moukenn le pen te taufrell.

³⁸ T'mer djinenn, har das o Devel o Yezouseste dran Nazaret peskro Dourho oun peskri zoor. Oun yob djas trouyel oun kras lačo koova, oun kras lauteren sasto, kay o beng pandas. O Devel his pash leste.

³⁹ Mer dikam lauter, hoy yob an o biboldengro them oun an o foro Yerusalem kras. Koles dan le ap o troushel, oun maran les.

⁴⁰ Pal triin divessa kras o Devel les i moulendar djides. Oun o Yezous moukas pes i menshendar te dikell.

⁴¹ Yob moukas pes gar i tsele menshendar te dikell. Na-a. Men rodas o Devel vin, te dikas les. Oun har yob i moulendar djido vas, rham oun piyam mer leha. Kova penah i menshenge, oun kova hi čačo.

⁴² Yob penas menge, te penas mer i tsele menshenge, kay o Devel rodas les vin, te hi lo o čačepaskro ray, kay rakrell o čačepen vin pral i tsele menshende, pral kolende, kay djivenna, oun ninna pral i moulende.

⁴³ Kolestar rakrenn i tsele Debleskre rakepangre an pengre lila. Yon penenn, kay lell o Devel i doosh hakenestar krik, koon ap o Yezous Kristeste patsella.”

⁴⁴ Har o Petro yaake rakras, peras o Debleskro Dourho ap lauterende, kay les shounan.

⁴⁵ Kol patsle biboldenge, kay o Petreha van, ačas o rakepen krik, har yon dikan, kay peras o Debleskro Dourho ninna ap kolende, kay kek bibolde hi.

⁴⁶ Yon shounan, har kol menshe an i vavar rakepen rakran, oun o Debles sharan. Koy penas o Petro ap lende:

⁴⁷ “Kolla lan o Debleskro Dourho yaake har mer. Nay rikrah mer len pale, te moukenn le pen te taufrell?”

⁴⁸ Oun yob penas: “Moukenn t'men te taufrell, te sikrenn t'mer, kay patsenn ap o Yezous Kristeste!” Pal kova mangan le o Petres, te ačell lo triin, star divessa pash lende.