Amos 9 - O Debleskro Lab 2024 (Sinte-Manouche)

O them Israel djal paash

¹ Me dikom o Debles, maro rayes, tardo pash i rhačepaskri an peskro kheer. Oun yob penas: De ap o pralstouno kotar kol barrendar, kay hidjrenn miro kheer! De yaake zoreles, te trissenn ninna i telstoune barra, oun o tselo kheer an kotya perella, oun mouk len te perell ap i sherya kal menshendar. Oun hoy lendar pral ačell, kamau te marell o rhareha. Kek nay nashell peske. Kek ačell djido.

² Ninna te paskrenn le pen tele pash i moulende, lau len kotar pre. Ninna te djan le pre bis pash o bolepen, anau len tele.

³ Ninna te khatrenn le pen pral ap i berga Karmel, rodau me len oun lau len tele. Ninna te khatrenn le pen mandar tele an o baro pani, yaake penau o panyeskro sap, te dandrell lo len.

⁴ Ninna te djan le pandles an i vavar them glan kolende, kay pandan len, moukau len kote o rhareha te marell. Me rikrau len an o yak, te krap len čilačepen, oun kek lačepen.

⁵ O baro Devel, ko ray pral o bolepen oun i phoub hi kova, kay taprell i phoub, te trissell li, oun hadell pes oun djal pale tele har o lengsto pani Nil an Egiptia. Oun i menshe rovenn pral kolende, kay meran.

⁶ Yob hi kova, kay krell peskro kheer an o bolepen, oun čivell peskro bolepaskro kheer pral i phoub. Yob dell o pani vin gole dran o baro pani, oun čorell les ap i phoub. Leskro lab hi baro Devel.

⁷ O baro Devel penell: T'mer Israelitarya han mange yaake har i menshe an o them Etiopia. T'men lom dran o them Egiptia vin, i Filistaryen lom dran o them Kreta vin, oun i Syrarya dran o them Kir. Hoy hi vavarčandes t'mentsa?

⁸ Me, o baro Devel hom o ray, oun lau ko tselo čilačepen an o yak, hoy i menshe an o them Israel krenn. Doleske thovau les krik i phoubyatar. Vin lino venn gar boud menshe, ninna te vell gar o tselo kheer Israel maredo. Kova penau me, o baro Devel.

⁹ Me rakrau oun kova djal yaake: Yaake har djob an i ziba pal hake rigya vitsedo vell, oun i djoba vin perenn, oun i barra dren ačenn, yaake krau, te vell o kheer Israel pal hake rigya vitsedo an kol themma, kay le tradedo van.

¹⁰ I tsele čilače mire menshendar hounte merenn an o kourepen, lauter kolla, kay penenn: Koy bibarht ačell dour mendar oun taprell men gar.

¹¹ O baro Devel penell: Ap ko dives krau o Davideskro kheer neves, kova hoy kanna khetne peredo hi. Kote, kay lo paash hi, krau les tseles. Kote, kay barra vin phagedo hi, čivau len pale pre. Me krau les yaake har lo glan boud tsiro his.

¹² Oun yaake lenn i Israelitarya pale dren, hoy pral ačas o themestar Edom oun kol vavar themendar, kolendar kay his mange, har o David lengro baro ray his. Kova penell o baro Devel, kay krella, te vell kova yaake.

¹³ Shounenn, penell o baro Devel, o tsiro vella, kay vell o djob yaake sik bares, te venn i činepangre khetne kolentsa, kay i phoub trouyel vitsrenn. Oun yaake boud drake hi koy, te hi gomme gar i mool kerdo i tsele drakendar, har ko tsiro vell, kay nevo djob vin vitsedo vell. Dell yaake boud drake, te nashell o mool i bare oun tikne berge tele.

¹⁴ Me anau mire menshen Israel pale an lengro them. Oun yon krenn i tele-phagede forya pale neves, oun djivenn koy dren, oun čivenn drakengre rouka an i phoub, oun piyenn lengri mool, čivenn rouka an i phoub oun rhan lengre roukengre.

¹⁵ Me anau mire menshen pale an lengro them, hoy lende dom. Oun kek nay tserdell len dran lengro them vin. Kova penell t'maro baro Devel.