Amos 8 - O Debleskro Lab 2024 (Sinte-Manouche)

O starto dikepen: i korba, kay roukengre dren hi

¹ O baro Devel, maro ray, moukas man i korba te dikell, kay roukengre dren hi, kolenge o tsiro vas, te venn le tele činlo i roukendar.

² Oun yob poučas mandar: “Hoy dikeh, Amos?” Me penom: “I korba, kay roukengre dren hi, kolenge o tsiro vas, te venn le tele činlo i roukendar.” Koy penas o baro Devel: Yaake vas mire menshenge Israel o tsiro, te venn le tele činlo. Yon khaytenn man bouder gar.

³ An ko dives givenn i gipangre an o rayeskro kheer ropaskre gilya. An i tsele gaba oun forya hi moule menshe čiddo. Kolen vitsran le pokones koy. Kova penau me, o baro Devel.

O Devel bistrell gar i bravelengri doosh

⁴ Shounenn kova, t'mer parepangre, kay rikrenn i čorvelen tele, te ačell len bouder či djipaske!

⁵ T'mer penenn t'menge: Mou djal o Debleskro dives sik trouyel, ninna ko baro dives, hoy sikrell, kay o nevo čon vas! Palle nay krah maro djobeskro kheer pale pre, te bikras djob! O bikepaske lah mer i tikneder piri, te kras lat pherdo djob, oun boudeder love har čačo hi, oun čivah save barra ap i vaga, te rhorhas mer i ginepangre.

⁶ Ninna ko phouss, hoy o djobestar pral ačas, bikrah, har te vals lo djob. I čorvele, kay nay playsrenn gar pengri siyaan, kolen ginah menge, te boudrenn le menge, ninna te hi lengri siyaan gar bareder har douy kirrha.

⁷ O baro Devel, koles i Israelitarya sharenn, yob das pes sovel oun penas: An kek tsiro bistrau kava čilačo koova, hoy le kran.

⁸ Doleske krau, te trissell i phoub, oun hakeno an o them trashell. O tselo them hadell pes oun djal pale tele har o lengsto pani Nil an o them Egiptia.

⁹ O baro Devel, maro ray, penell: An ko dives djal o kham tele mashkral o dives. Oun mashkral o dives vell i rati pral o them.

¹⁰ T'mare bare divessa, kay hans barhtelo, venn kanna divessa, kay denn gole i bibarhtyatar. Oun t'mare gilya venna ropangre gilya. T'mer rivenn t'men an gone, oun činenn t'mare tsele balla ap o shero tele. Oun han yaake har i dad oun i day, kay pral pengro čaveste rovenn, kay meras, oun len hi kek vavar čave. Oun lauter, hoy djal an ko dives, krell i menshenge bari daar.

¹¹ I tsiro vella, penell o baro Devel, maro ray, koy bičrau i bok an o them. Kaya hi kek bok pal maro oun kek troush pal pani. Na-a, kaya hi i bok pal o lab o baro Deblestar, te shounenn le les.

¹² I menshe djan trouyel pash o Moulo Baro Pani, oun kotar doureder pash o Mashkralstouno Baro Pani, oun kotar doureder ap koy rig, kay norden hi, oun palle kote, kay o kham pre djal. Oun yon rodenn yekes, kay nay penell lenge o baro Debleskro lab, oun hatsenn kekes.

¹³ An ko dives perenn ninna saste terne morsha oun djouvya khetne i troushatar.

¹⁴ Oun kolla, kay denn pen sovel pash o rhorheno devel an Samaria, oun penenn: pash ko devel, koles o kheer Dan an-mangell, oun pash o devel o forestar Beersheba, kal menshe perenn oun stenn bouder gar pre.